WIENUN-ƆN, e su kɔ lika kun kɔnguɛ nvluniɛn’n nun. Yɛ kannin kun m’ɔ ta kpa’n o e sa nun. Kannzɛ lika w’a lu’n, sanngɛ e si kɛ e kwlá mlinman. Ɔ maan, e klun titiman e. Afin kɛ e kan kannin’n i ase’n, e wun e bo. Kɛ e man su kusu’n, e wun e ɲrun atin’n.

Biblu’n ti kɛ kannin sɔ’n sa. Kɛ nga e fa wunnin i ndɛ akpasua nga be sinnin lɛ’n nun sa’n, Biblu’n uka e maan e wun sa nga be tɔ e su cɛn kwlakwla’n be trawlɛ. Asa ekun’n, Biblu’n kan sa nga bé jú cɛn wie lele’n, be ndɛ. Ɔ maan, e si like ng’ɔ fata kɛ e yo naan cɛn wie lele e liɛ w’a yo ye’n.—Jue Mun 119:105.

Ndɛ nga Biblu’n kan’n gua e awlɛn su nzue. Yɛle kɛ: 1 Biblu’n kle e like ng’ɔ fata kɛ e yo naan e klun w’a jɔ’n. Kpɛkun 2 ɔ kle e like ng’ɔ fata kɛ e yo naan e nin Ɲanmiɛn e afiɛn w’a mantan naan y’a ɲan anannganman nguan’n.

Biblu’n man e afɔtuɛ wie mun naan y’a wun sa nga be o e bɔbɔ e su’n be trawlɛ. Sanngɛ, ɔ wla e fanngan kɛ nán e bu e ngunmin e wun akunndan. Ɔ fata kɛ e bu e wiengu’m be akunndan wie. Sɛ e nanti afɔtuɛ sɔ’n su’n yɛ e klun jɔ́-ɔ.

Biblu’n se kɛ: “Sɛ a cɛ sran like’n, ɔ ti kpa tra kɛ be cɛ wɔ like’n.” (Sa Nga Be Yoli’n 20:35) ?Ɔ wla kpɛn blɛ mɔ a tili sran kun i wun ɲanman nun’n i su? ?Annzɛ kusu ɔ wla kpɛn blɛ mɔ sran kun kɛnnin i klun ndɛ kleli wɔ mɔ a sieli ɔ su i nuan bo’n i su? ?Kɛ a yoli sɔ’n mɔ sran’n wunnin i wun fɛ’n, w’a yoman ɔ bɔbɔ ɔ fɛ wie?

Kɛ e cɛ sran like mɔ e kunndɛman kɛ ɔ cɛ e like wie’n, e klun jɔ. Bian kun seli kɛ: “Kɛ sran kun cɛ  i wiengu like’n, ng’ɔ ɲɛn i’n, ɔ tra ng’ɔ mannin’n. Sanngɛ, sɛ a cɛ sran like’n, nán kunndɛ kɛ á ɲán nun like.” Kɛ e cɛ yalɛfuɛ’m be like’n, be kwlá cɛman e like wie. Sanngɛ e ɲan su ye. Kɛ e cɛ be like’n, e kle kɛ e buman e ngunmin e wun akunndan naan e bu e wiengu’m be akunndan wie. Asa ekun’n, Ɲanmiɛn ɲrun’n, ɔ ti kɛ i bɔbɔ yɛ y’a cɛ i like’n sa. Kɛ e yo sɔ’n ɔ yo i fɛ kpa. (Nyanndra Mun 19:17) I sɔ’n ti’n, ɔ se kɛ ɔ́ yó be nga be yo sɔ’n be mo. Yɛle kɛ ɔ́ mán be anannganman nguan.—Jue Mun 37:29; Lik 14:12-14. *

Biblu’n kle ekun kɛ sɛ e waan e klun jɔ’n, ɔ fata kɛ e su Ɲanmiɛn Zoova. I nuan ndɛ’n wla e fanngan kɛ e mɛnmɛn i, e yi i ayɛ, yɛ e ɲin yi i. (Akunndanfuɛ’n 12:13; Sa Nglo Yilɛ 4:11) Kɛ e yo sɔ’n, ɔ yo i fɛ dan. I kpa bɔbɔ’n, ɔ se kɛ: “Min wa, fa akunndan nanti. Sɛ a fa akunndan nanti’n, n klun jɔ́.” (Nyanndra Mun 27:11) Kɛ e nanti afɔtuɛ nga Biblu’n man e’n su’n, e Si Ɲanmiɛn i klun jɔ. ?Ngue ti-ɔ? Afin, e ndɛ lo i, yɛ ɔ si kɛ sɛ e fa atin ng’ɔ kle e’n su’n e liɛ yó ye. (Ezai 48:17, 18) Nanwlɛ kɛ e wun kɛ, kɛ e su Ɲanmiɛn mɔ e yo i klun sa’n i klun jɔ’n, i sɔ’n yo e fɛ dan.

Biblu’n se e kɛ e fa e wun mantan Ɲanmiɛn. Ɔ se kɛ: “An fa amun wun mantan Nyanmiɛn, yɛ i kusu fɛ́ i wun mantan amun-ɔn.” (Zak 4:8) Ɔ ju wie’n, e usa e wun kɛ e nin Ɲanmiɛn m’ɔ kwla sa’n kwlaa yo’n, e kwla tra janvuɛ. Biblu’n se kɛ, ‘sɛ e kunndɛ i’n, é wún i,’ afin ɔ nin “e nun wie fi nun-man mmua.” (Sa Nga Be Yoli’n 17:27) Sɛ e kaci Ɲanmiɛn i janvuɛ dɔ nga su’n, cɛn wie lele’n e liɛ yó ye. ?Ngue ti yɛ e kwla se sɔ-ɔ?

Maan ndɛ nga tran ɔ klun: E nun wie fi e kwlá yoman nán y’a wuman. (1 Korɛntfuɛ Mun 15:26) Sanngɛ Ɲanmiɛn liɛ’n, ɔ o lɛ tititi. Ɔ wuman le. Yɛ ɔ kunndɛ kɛ i janvuɛ’m be ka lɛ tititi wie. Biblu’n kan like nga Ɲanmiɛn kunndɛ kɛ ɔ́ fá mán be nga be kunndɛ i’n, i ndɛ. Ɔ se kɛ: “Bé nyán nguan tɛnndɛn.”—Jue Mun 22:27.

?Ngue yɛ é yó naan e nin Ɲanmiɛn y’a ka janvuɛ tititi-ɔ? Maan e suɛn i nuan ndɛ’n mɔ yɛle Biblu’n, i nun like titi. (Zan 17:3; 2 Timote 3:16) Biblu’n se kɛ, sɛ e kunndɛ kɛ é sí ngwlɛlɛ’n maan e “kan kle Nyanmiɛn.” I sɔ’n ti’n, maan e srɛ i kɛ ɔ tike e ɲin naan e wun i nuan ndɛ’n i wlɛ. Sɛ e yo sɔ’n, é wún i nuan ndɛ’n i wlɛ. * (Zak 1:5) Maan e nanti like nga e suan’n su. Yɛ maan Ɲanmiɛn Ndɛ’n, ɔ yo “kɛ kannin sa, ɔ kpaja [e] bo. Ɔ kpaja [e] nyrun atin’n su weiin.”—Jue Mun 119:105.