ELENGANYENI ukuti muleenda mu musebo ubushiku ninshi nakufiita. Nangu ca kuti kale bwilile, namwishiba ukuti tamwalube pantu namukwata ica kusanikilako. Nga mwasanika pa nshi, mulemona fyonse ifili apo mulenyanta. Na kabili nga mwacisanika ku ntanshi, mulemona bwino uko muleeya pantu kulebuuta.

Baibolo kuti twaipashanya ku ca kusanikilako ulubuuto. Nga fintu ifipande fifumineko filandile, Icebo ca kwa Lesa cilatwafwa ukwishiba ifya kupwisha amafya ayo tukwata cila bushiku. Na lyo line, Baibolo ilatwafwa na mu fintu fimbi. Ilalenga twaishiba ifyo ifintu fikaba ku ntanshi kabili ici cilalenga twaba ne nsansa. (Amalumbo 119:105) Bushe itwafwa shani?

Lekeni tumone ifintu fibili ifyo Baibolo yalandapo ifitwafwa ukuba ne subilo: 1 Ilatwafwa ukwishiba ifyo twingaba ne nsansa 2 ilatwafwa ukwishiba ifyo twingatwalilila ukuba ifibusa fya kwa Lesa.

Baibolo ilatupanda amano pa fyo twingacita nga tuli na mafya, kabili ifyo ilanda filatwafwa na mu fintu fimbi. Baibolo ilatwafwa ukukanalatontonkanya fye pa fitukumine, lelo ilalenga twalatontonkanya na pa fintu fimbi. Ne ci cilalenga tuleba ne nsansa.

Ku ca kumwenako, tontonkanyeni pa mashiwi ya mu Baibolo ayatila: “Mwaba insansa ishingi mu kupeela ukucila ishaba mu kupokelela.” (Imilimo 20:35) Bushe muleibukisha ilyo mwayafwile umuntu uwalekabila indalama? Nelyo bushe muleibukisha ilyo mwalekutikisha ninshi cibusa wenu alemweba ifyali ku mutima? Bushe tamwatemenwe ilyo mwayafwile uyo muntu?

Tulaba sana ne nsansa nga ca kuti ilyo tuleyafwa bambi tatuleenekela ukuti nabo bakatwafwa ku ntanshi. Umwaume umo uulemba ifitabo atile: “Ilingi line nga wayafwa umuntu ukwabula ukwenekela  ukuti uo wayafwa alakucitila icili conse, kulaba ukupokelela ifintu ifingi ukucila na pa fyo wapeele.” Kanshi nga twaitemenwa ukwafwa maka maka balya abashingacitapo icili conse pa fyo twabafwa, tulapokelala icilambu. Nga tulecita ifi, ninshi tatulecita ifye ifingatuwamina. Na kuba, ninshi tulebombela pamo na Kabumba, uumona ukuti nga tuleyafwa bambi ninshi tulemukongwesha. (Amapinda 19:17) Alatemwa nga twayafwa abapiina, kabili alitulaya ukuti nga tulecita ifyo akatupeela umweo wa muyayaya mu paradaise pano isonde.—Amalumbo 37:29; Luka 14:12-14. *

Na kabili Baibolo ilatusambilisha ukutila kuti twaba ne nsansa nga tulepepa Lesa wa cine Yehova. Icebo cakwe citweba ukuti tulingile ukulamulumbanya, ukumucindika, no kulamumfwila. (Lukala Milandu 12:13; Ukusokolola 4:11) Nga twacita ifi, tulalenga Kabumba wesu ukuba ne nsansa. Na kuba atweba ukuti: “Ube na mano, kabili ulenge umutima wandi ukusekelela.” (Amapinda 27:11) Nga tulekonka ifyo Baibolo ilanda, tulalenga Shifwe wa mu muulu ukuba ne nsansa. Cinshi twalandila ifi? Pantu alatusakamana kabili afwaya ifintu filetuwamina nga tulekonka ifyo atweba. (Esaya 48:17, 18) Kanshi takwaba icacindama icacila pa kulapepa Kateka wa mu muulu ne sonde no kulacita ifilenga aleba ne nsansa.

Baibolo itweba no kuti tulingile ukuba ifibusa fya kwa Kabumba wesu. Itila: “Palameni kuli Lesa, na o akapalama kuli imwe.” (Yakobo 4:8) Inshita shimo kuti tulemona kwati te kuti tube cibusa wa kwa Kabumba wa maka yonse. Lelo Baibolo itweba ukuti nga ‘twafwaya Lesa, . . . tukamusanga,’ pantu “taba kutali kuli ifwe umo umo.” (Imilimo 17:27) Ifintu fikatuwamina ku ntanshi nga twaba ifibusa fya kwa Lesa nga fintu Baibolo ilanda. Fikatuwamina shani?

Tontonkanyeni pali ici: Nangu twingesha shani na maka, te kuti tufumyepo imfwa. (1 Abena Korinti 15:26) Na lyo line, Lesa tafwa, takatale afwa, kabili afwaya ifibusa fyakwe ukuba no mweo wa muyayaya. Baibolo ilatweba ifyo Yehova afwaya ukucitila abamumfwila ilyo itila: “Shi imitima yenu ibe no mweo umuyayaya.”—Amalumbo 22:26.

Kuti mwatwalilila shani ukuba ifibusa fya kwa Lesa? Mufwile ukutwalilila ukusambilila pali ena mu Cebo cakwe Baibolo. (Yohane 17:3; 2 Timote 3:16) Mulemulomba ukuti alemwafwa ukumfwikisha Amalembo. Baibolo itweba ukuti nga ‘tulelomba kuli Lesa’ amano, akatupeela. * (Yakobo 1:5) Na kabili mufwile ukulaesha na maka ukulacita ifyo mulesambilila. Nga mulecita ifi, Icebo ca kwa Lesa cikaba kwati “ni nyali ku makasa [yenu], kabili “ulubuuto mu nshila [yenu]” pali ino nshita e lyo na ku ntanshi.—Amalumbo 119:105.