TRAEM TINGBAOT: San i godaon longtaem finis, mo yu stap wokbaot long wan rod we i no gat laet. Be yu no harem se yu lusum rod, from we yu holem wan toslaet. Taem yu saenem i godaon, yu luk samting we i stap stret long fored blong yu. Taem yu saenem i go longwe, hem i soemaot rod we yu mas folem.

Baebol i olsem toslaet ya. Yumi tokbaot finis se, Baebol i save givhan long yu blong yu winim ol samting we oli stap stret long fored blong yu, hemia ol trabol we yu fesem evri dei. Be Baebol i mekem moa. Hem i givim save long saed blong fiuja, we i soemaot rod blong harem gud olwe. (Ol Sam 119:105) ?Olsem wanem Baebol i mekem olsem?

Bambae yumi tokbaot tu samting we Baebol i mekem, blong givim hop long yumi: 1 Yumi no harem se laef i blong nating nomo, mo 2 yumi save olsem wanem blong fren olwe wetem God.

Baebol i givim gudfala advaes blong winim ol trabol, be hem i no wan buk blong advaes nomo. Hem i no pulum yumi blong yumi tingbaot nomo ol wari blong yumi, be i tijim yumi se yumi haf blong bigfala plan blong God. Taem yumi kasem save long samting ya, yumi harem se laef blong yumi i no blong nating nomo.

Traem tingbaot stamba trutok ya long Baebol se: ‘Man i harem gud moa taem hem i givim samting, i bitim we hem i kasem samting.’ (Ol Wok 20:35) ?Yu save tingbaot wan taem we narafala i sot long wan samting, nao yu givhan long hem? O, ating yu givim taem blong yu, blong lesin long wan fren we i wantem tokbaot sam problem blong hem. ?Olsem wanem? ?Yu bin harem gud taem yu mekem narafala ya i glad?

 Yumi glad moa taem yumi givim samting, we yumi no gat tingting blong kasem bak wan samting. Wan man blong raetem ol buk i talem se: “Sipos yu no gat tingting blong kasem samting taem yu givhan long narafala, bambae yu kasembak moa i bitim samting we yu givim.” Yes, taem yumi givhan long narafala we i no save givimbak samting long yumi, yumi kasem wan pei. Yumi stap wok wetem God, mo hem i tingbaot kaen fasin blong yumi olsem wan lon mane we yumi givim long hem. (Ol Proveb 19:17) Hem i tinghevi long samting we yumi mekem blong givhan long puaman, mo hem i promes blong givim pei long yumi, hemia laef we i no save finis long paradaes long wol. !Hemia wan nambawan hop blong fiuja!—Ol Sam 37:29; Luk 14:12-14. *

Antap long hemia, Baebol i tijim yumi se taem yumi wosipim tru God ya Jehova, yumi stap yusum gud laef blong yumi. Baebol i talem se i stret nomo we yumi presem hem, yumi ona long hem, mo yumi obei long hem. (Prija 12:13; Revelesen 4:11) Taem yumi mekem olsem, yumi mekem wan samting blong sapraes: Yumi mekem God i harem gud. Yes, hem i talem se: ‘Sipos yu waes, bambae mi glad we mi glad.’ (Ol Proveb 27:11) Traem tingbaot. Taem yu folem ol advaes blong Baebol blong mekem wan waes desisen, Papa blong yumi long heven i glad. ?From wanem? From we hem i lavem yu, mo i save se sipos yu folem ol advaes blong hem, bambae i givhan long yu. (Aesea 48:17, 18) Tru ya, i no gat wan samting we yu save mekem, we i moa gud i winim we yu wosipim King blong heven mo wol, mo yu laef long fasin we yu mekem hem i glad.

Mo tu, Baebol i tijim yumi olsem wanem blong kam wan fren blong God, i se: “Yufala i mas kam klosap long God, nao hem bambae i kam klosap long yufala.” (Jemes 4:8) Ating samtaem yumi harem se yumi no naf blong kam fren blong God ya we i gat olgeta paoa. Be Baebol i promes se sipos yumi “lukaot” God, bambae yumi “faenem hem,” from we hem “i no stap longwe nating long yumi.” (Ol Wok 17:27) Advaes ya se yumi mas kam wan fren blong God, bambae i givhan long yumi long fiuja. ?Bambae i givhan olsem wanem?

Tingbaot: Nating se yumi traehad, yumi no naf blong ronwe long bigfala enemi blong yumi, ded. (1 Korin 15:26) Be God i no save ded. Hem i laef olwe, mo i wantem se ol fren blong hem tu oli laef olwe. Long ol klia tok, Baebol i talem samting we Jehova i wantem blong ol man we oli lukaotem hem, i se: “Bambae oli gat gudfala laef oltaem.”—Ol Sam 22:26.

?Yu mas mekem wanem blong fren gud olwe wetem God? Yu mas gohed blong stadi Baebol blong kasem save moa long hem. (Jon 17:3; 2 Timoti 3:16) Prea long hem blong i givhan long yu blong kasem save long Baebol. Sipos yu “gohed blong askem long God” blong i givim waes, Baebol i promes se bambae hem i givim. * (Jemes 1:5) Mo tu, yu mas traehad blong folem ol samting we yu lanem. Yusum Tok blong God olsem wan laet blong “soemaot rod” mo “lidim” yu, naoia mo long fiuja gogo i no save finis.—Ol Sam 119:105.