TAME fase na, wo wulu alu e dibi été. Ja’a alu é nto abui, ô nji ko woñe na wo ye jañ e zen, amu ô bili lambe a yôñe mvo’é. Éyoñe wo sulu lambe bebé, wo yene jôm é ne wo fefel. Éyoñe wo lôm éfufub ôyap, ô ne ngule ya yene mam me ne ôsu.

Kalate Zambe a ne ane lambe nyi a zen éziñ. Avale bia te yene mvus, Mejô me Zambe me ne volô bia na, bi dañe minju’u bia bese bia tôbane mie môs ane môs, mbia émo nyi. Ve Kalate Zambe a nji su’u valé. A faé fe bia éfufube mfa’a ya mam ma ye bobane melu ma zu, nalé a volô bia na bi yem a tôñe zene ja soo bia mevak. (Besam 119:105) Aval avé a bo de?

Bi tame zu yene mezene mebaé Kalate Zambe a ve bia nya ndi nleme asu melu ma zu: 1 a volô bia na bi bi nsôñan ényiñ, a 2 ye’ele fe bia aval avé bi ne bi mbamba élat a Nté wongan.

Kalate Zambe a ve mbamba melep asu na bi dañe minju’u miangan, ve a nji bo ve zezé kalate a ve melep. A nji jô bia na bi simesane ve mam ma fombô biabebien, a ye’ele bia na bi nji bo étame si va, bôte bevo’o be ne fe mfi. Ényiñe jangan é ne bi nya nsôñane fo’o ve nge bia ba’ale ôsimesan ôte.

Tame yene ñye’elane ya Kalate Zambe wu: “Môt a ve, a nyô a nyoñ, nyô a ve a dañe yen ébotan.” (Mam Minlôman 20:35) Ye ô ngenan ô simesane môs ô nga volô môt a mbe a yi biôme bi mo? Nge éyoñ ô nga nyoñ éyoñe ya vô’ôlô nyo mvôé a mbe a kate’e wo mam me mbe nye nlem été? Ye ô nji wô’ô mvaé ya volô môte na, môse wé ô wulu nye mvo’é?

Bia bi benya meva’a éyoñe bia ve, teke sôñe jôm éziñe yat. Ntili bekalate éziñ a nga jô na:  “Bôt abui ba simesane na, ô vo’o saéne môt, teke na ba bulane wo a lôt abime wo te ve nye​—ve nalé a ne boban nge wo bo de teke sôñe jôm éziñe yat.” Ve nya ajô a ne na, bia dañe wô’ô mevak, a bi ma’an éyoñe bia ve​—e dañe dañ éyoñe bia ve bôte be vo’o bulane bia biôm bia ve be. Mboon ôte wo liti na, bia nyoñe bôte bevo’o ngap. A nde fe, bia wulu ba’aba’a a Nté wongan émien, nnye ate a yene mvam bia bo bôte bevok ane bia te kôlé nye. (Minkana 19:17) A nyane mvolan ôse bi ne ve môt a ne éngôngol, a ka’a fe bia na a ye ya’ane bia a ényiñe ya nnôm éto e paradis e si va​—nya ndi nleme asu melu ma zu nnye le!​—Besam 37:29; Luc 14:12-14. *

Kalate Zambe a ye’ele fe bia na, bi ne bi nya nsôñane ényiñ nge bia kañe nya Zambe, Yéhôva. Mejô mé ma tindi bia na bi ve nye duma; a yiane na bi lu’u nye a bo nye mewôk. (Ecclésiaste 12:13; Nlitan 4:11) Éyoñe bia bo nalé, bia bo beta jam: Bia ve Nté wongane nlem avak. Émien a jô bia na: “Bo’o fek, a ve nleme wom mevak.” (Minkana 27:11) Tame fas: éyoñe bia nyoñe mintyi’ane mia lu’an a nkômbane Zambe, bia ve Ésa wongane ya yôb été ava’a nlem. Amu jé? Amu a nyoñe bia ngap, a yi fe na biabebien bi yene mfi ya tôñe melebe mé. (Ésaïe 48:17, 18) Ye jam afe e ne ve bia nya nsôñane ényiñ ane e kañe Njôô ya biôm bise, a e bo mam ma ve nye nlem avak?

Kalate Zambe a ye’ele fe bia na, bi ne bi mbamba élat a Nté wongan. Kalate Zambe a jô na: “Suba’ane Zambe bebé, ndemben a ye subu mia bebé.” (Jacques 4:8, Mfefé Nkôñelan) Biyoñe biziñ bi ne sôane na, bi ne ngule ya bo amvôé a Nté wongan, nyô a ne ngul ése. Ve Kalate Zambe a ve bia ndi nleme na, nge bia “jeñe Zambe,” bia ye “bo ngule ya yene nye,” amu “a nji bo môt ase ya be bia ôyap.” (Mam Minlôman 17:27, Mfefé Nkôñelan) Melebe Kalate Zambe a ve a lat a amvôé bi ne bi a Zambe me ne nya mfii asu ényiñe jangane ya melu ma zu. Aval avé?

Tame fas: Ja’a bia bo aya, bi se ngule ya sa’ale nsiñe wongan a su’ulan: awu. (1 Becorinthien 15:26) Ve, Zambe a to nnôm éto. A ye wu môs éziñ, a nde fe, a yi na bemvôé bé be nyiñe nnôm éto. Kalate Zambe a belane mbamba bifia bi asu na, a liti mame Yéhôva a yi asu bôte ba jeñe nye: “Nleme wôé ô [bu’uban] ényiñe melu mese.”​—Besam 22:26.

Aval avé ô ne bi mbamba élat a Zambe a bu’ubane je nnôm éto? Kele’ ôsu a yé’é yeme nye a zene ya Kalate Zambe. (Jean 17:3; 2 Timothée 3:16) Sili’i nye mvolane wé asu na ô tu’a wô’ô Mejô mé. Kalate Zambe a ve bia ndi nleme na, nge bia “sili Zambe” fek a nlem ôse, a ye ve bia je. * (Jacques 1:5) Jeñe’ a ngul ése na ô bo mame wo yé’é, bo’ fe na Mejô me Zambe me bo “lambe ya mebo [môé], a éfufube ya zene [jôé]”​—ataté den akekui nnôm éto.​—Besam 119:105.