SAMINA HUMÁ héibuguña lan lídangiñe aban üma búrigati guñoun. Íbini lüha lan láludun weyu masandirutün heferidiruña lan ladüga anihein lan aban buiti igemeri huma. Dan hegemechunbei ǘnabun aban harihini le lídanbei émeri furangu. Ani dan le hegemechun hubaruaguóun ábatima gayara lan harihín diseun.

Lidan saragu katei ítara tiña Bíbülia kei aban igemeri. Kei wafurendeiruni lidan burí arütíkulu le lubaragiñebei le, íderagua tumutiwa Lererun Bungiu lun wagagibudagun luma turobuli lánina sagü weyu le lunbei wawanduni lidan ubóu le ídanbei gayara lan lasuseredun furumiñeguarügü katei. Gama lumoun, adügatu lanwoun lira: adügatu lun buidu lan wabagari ámuñegü, ladüga íderagua tumutiwa afalarei ani arihei émeri le lunbei lanügüniwa lidoun aban ibagari lau ugundani lun súnwandan (Sálumu 119:105). Ida liña tadügüni?

Ariha wamá bián katei le ídanbei tíderaguniwa Bíbülia lun buidu lan wabagari ámuñegü: 1 Íderagua tumutiwa lun gasuuni lan wabagari ani 2 arufudahatu woun ida luba lan gamadagua wamá lun súnwandan luma le Adügübaliwa.

Rutu Bíbülia adundehani buiti lun wagagibudagun luma waturobulin, íbini mámarügü tan aban líburu lánina adundehani. Íderagua tumutiwa ariha moun lumuti lan wetenirun luágurügü le adügübei lun wadiheridun, íderagua tumutiwa giñe ariha aban lan fánreinti súdiniti wagía lídangiñe aban katei le súdinitimati. Gasuunibei wabagari lau gunfuranda wamani katei le.

Kei hénpulu, samina humá luagu adundehani tídangiñe Bíbülia le: “Fuleseiwatimati le íchugubei sügǘ lau le eresibirubei” (Adügaü 20:35). Haritaguatün san híderagun somu gürigia le maseinsuti? O díreihadün san dan lun haganbuni humada dan le  nidiheri lan? Ma sanditün ugundani lau hagundaaragüdüniña amu gürigia?

Gúndaatimatiwa dan le wíchigun magurabahanga ni kata. Ariñagati aban abürühati: “Siñati bíchugun houn amu meresibirunga lóugiñe lídangiñe le bíchugubei, dan létima wadügüni magurabahanga ni kata”. Gama lumoun, dan le wadügün katei hawagu amu—hóuntima ha siñabei hafayeiruniwa—, resibitiwa afayeiruahaü. Aba lídangiñehadiwa lan aban katei le súdinitimati. Lugundun lau wadügüni lira, wídehaña luma Bungiu le adügübaliwa ani aba labahüdüniwa haganagua ha ladúeirubaña ladüga óuseraadiwa lan lau areiduni (Ariñawagúni 19:17). Wéiriti lebegi le wadügübei hawagu ha asufurirubaña lun Bungiu ani füramase haali lafayeirubadiwa lan lau ibagari magumuchaditi danme ábanhali paraísu Ubóu. Ma lubuidun emenigini! (Sálumu 37:29; Lúkasi 14:12-14). *

Gama lumoun, lubaragiñe sun katei arufudahatu Bíbülia woun gayara lan wadariruni lisuuni wabagari ánhawa áhuduragua lun Bungiu le inarüniti, Heowá. Ínchaha tumutiwa Lererun lun wíchuguni sun alawahóuni, uéiriguni luma sun gaganbadi le yuubei lun (Apurichihati 12:13; Arufudúni 4:11). Adügatiwa aban katei hanarimeti lubuidun dan le wadügüni lira: Gayaraati wagundaaragüdüni Wáguchi. Ligía aba lubéi lariñagun woun: “Chula bau, niráü, ábame bagundaaragüdünina” (Ariñawagúni 27:11). Ráramagua humá asaminara: Dan le desidírü wamá buidu lau gaganbadi wama lun adundehani le tídanbei Bíbülia, gúndagüda wamuti Bungiu. Ka uagu? Ladüga berese lan wau ani busenti lun gaganbadi wamá lun ladundehan lun buidu lan lidin woun. (Isaíasi 48:17, 18). Le linarün katei, ka amu katei íchugubei ugundani inarüniti woun lidan wabagari kei wáhuduragun lun Suntigabafu, le Labureme sun Ubóu ani gúndagüda wameime?

Arufudahatu Bíbülia woun kaba lan wadüga lun gamadagua wamá luma le Adügübalin sun katei. Kei hénpulu, ariñagatu: “Yarafa humá lun Bungiu, ábame giñe layarafadun hun” (Santiagu 4:8). Másiñati hénrengu lan wafiñerun gayara lan wayarafadun lun Bungiu Suntigabafu. Gama lumoun, chouru tumuti Lererun woun ánhawa lan áluahei wadarirubei lan ladüga “madise lan Bungiu luéi kada aban wádangiñe” (Adügaü 17:27). Wafalaruni adundehani le tídanbei Bíbülia lun gamadagua wamá luma Bungiu ligía aban igaburi buiti lun waranserun lubá ámuñegü. Ka uagu?

Samina huméi le: Íbini wáfaagun saragu, siñati lanurahan ni aban wádangiñe luéi wágani le wéiritimabei, óunweni, (1 Korintuna 15:26). Luagu amu oubaü, móunwedaditi Bungiu. Móunwenbei ani busenti giñe lun hawinwandun lumadagu lun súnwandan. Ariñaga lumuti Heowá le labusenrubei lidan murusun lubuidun dimurei burí le: “Winwan humá lun súnwandan” (Sálumu 22:26, TNM).

Ida luba gayara lan gamadagua humá luma Bungiu lun súnwandan? Sigí humá afurendeira luagu tidan Bíbülia to Lererun (Huan 17:3; 2 Timotéu 3:16). Amuriaha humá ídemuei luma lun gayara lan gunfuranda humanu Bíbülia. Chóurugüda tumuti Bíbülia woun ánhawa lan asigira amuriaha lichú aau luma Bungiu tau sun taruman wanigi, líchugubei lan woun * (Santiagu 1:5). Ani lagumuhóun, áfaagua humá lun hadügüni le hafurendeirubei lidan hibagari, ítara, ábanbei “igemeri” Lererun Bungiu lun hugudi luma “larungounga” lun hémeri (Sálumu 119:105).