HANDURAWA nga naglakaw ka sa ngitngit nga dalan sa lawom nga kagabhion. Bisag dugay nang misalop ang adlaw, wala ka mobati nga nasaag kay naghawid kag siga kaayo nga flashlight. Kon imong iiwag kini paubos, klaro nimong makita kon unsay anaa sa imong atubangan. Ug kon imo kining iiwag sa unahan, ang siga niini moabot ngadto sa layo.

Sa pipila ka paagi, ang Bibliya sama niana nga flashlight. Ang nag-unang mga artikulo naghisgot nga ang Pulong sa Diyos makatabang nato sa pagsagubang nianang anaa mismo sa atong atubangan​—ang adlaw-adlawng mga problema nga ginaatubang natong tanan niining walay kasegurohang kalibotan. Pero labaw pa ang mahimo sa Bibliya kay niana. Kini naghatag usab ug sanag nga hulagway sa umaabot, nga makahimo kanato sa pagkakita ug pagsubay sa dalan nga motultol sa walay kataposang kalipay ug katagbawan. (Salmo 119:105) Sa unsang paagi?

Atong hisgotan ang duha ka paagi diin ang Bibliya makahatag natog praktikal nga paglaom sa umaabot: 1 Kini makatabang nato aron makabatog katuyoan ang atong kinabuhi, ug 2 kini nagtudlo kanato kon unsay himoon aron kita mahimong higala sa atong Maglalalang sa walay kataposan.

Ang Bibliya dunay kasaligang tambag kon unsaon pagsulbad sa atong mga problema, apan dili kini ordinaryong libro nga naghatag ug mga tambag. Ang Bibliya wala magdasig kanato sa pagpokus lang sa atong mga problema, kondili kini nagtudlo kanato sa pagtan-aw sa atong kaugalingon ingong bahin sa mas dako nga hulagway. Pinaagi lang niana nga mahimong may tinuod nga kahulogan ang atong kinabuhi.

Tagda pananglitan kini nga prinsipyo sa Bibliya: “Adunay labaw nga kalipay sa paghatag kay sa pagdawat.” (Buhat 20:35) Diha bay panahon nga nakatabang kag tawo nga naglisod sa pinansiyal? O kaha dihang  imong gihatagag panahon ug atensiyon ang imong higala nga nagpahungaw sa iyang mga kaguol? Dili ba nalipay ka nga nakatabang kag tawo nga nahimong malipayon nianang adlawa?

Kita malipay gyod kon kita manghatag nga dili magdahom ug balos. Usa ka awtor miingon: “Kon magmahinatagon ka, makadawat ka gayod ug balos nga mas labaw pa kay sa imong gihatag​—basta nanghatag ka nga wala maghunahuna ug balos.” Pero, kon itanyag nato ang atong kaugalingon sa pagtabang ilabina niadtong walay ikabalos, kita makadawat ug balos. Kita mahimong bahin sa mas dako nga hulagway. Sa pagkatinuod, kita nagtrabaho uban mismo sa atong Maglalalang, kinsa naglantaw sa maong maayong mga buhat ingong utang niya kanato. (Proverbio 19:17) Gipabilhan gyod niya ang tanan natong himoon alang sa mga kabos, ug nagsaad siya nga kita iyang balosan ug kinabuhing walay kataposan diha sa paraisong yuta​—usa ka nindot kaayong paglaom sa umaabot!​—Salmo 37:29; Lucas 14:12-14. *

Labaw sa tanan, ang Bibliya nagtudlo nga makaplagan nato ang tinuod nga katuyoan sa kinabuhi pinaagi sa pagsimba sa matuod nga Diyos, si Jehova. Ang iyang Pulong nagdasig nato sa pagdayeg, pagpasidungog, ug pagsunod kaniya kay siya takos niana. (Ecclesiastes 12:13; Pinadayag 4:11) Kon ato kanang himoon, mapalipay nato ang atong Maglalalang. Gani, kita iyang gisugo: “Magmaalamon . . . ug lipaya ang akong kasingkasing.” (Proverbio 27:11) Hunahunaa​—kon kita mohimog maalamong mga desisyon base sa mga prinsipyo sa Bibliya, atong mapalipay ang kasingkasing sa atong mahigugmaong langitnon nga Amahan. Ngano? Kay kita iyang gimahal ug gusto niya nga makabenepisyo kita pinaagi sa pagsunod sa iyang giya. (Isaias 48:17, 18) Duna pa bay makalabaw niini nga katuyoan kay sa pagsimba sa Soberano sa uniberso ug magkinabuhi nga makapalipay niya?

Ang Bibliya nagtudlo sab nato kon unsay himoon aron mahimo kitang higala sa atong Maglalalang. Kini nag-ingon: “Duol sa Diyos, ug siya moduol kaninyo.” (Santiago 4:8) Usahay magduhaduha tingali kita kon tinuod ba gayod nga mahimo kitang higala sa labing makagagahom nga Maglalalang. Pero ang Bibliya nagpasalig kanato nga kon kita “mangita sa Diyos,” kita “makakaplag gayod kaniya,” kay ‘siya dili halayo sa matag usa kanato.’ (Buhat 17:27) Ang tambag sa Bibliya bahin sa pagpakighigala sa Diyos praktikal kaayo alang sa atong umaabot. Sa unsang paagi?

Konsideraha: Bisag unsaon natog paningkamot, walay usa kanato ang makaikyas sa dakong kaaway​—ang kamatayon. (1 Corinto 15:26) Apan ang Diyos walay kataposan. Siya dili gyod mamatay, ug gusto niya nga ang iyang mga higala mabuhi sab sa walay kataposan. Pinaagi sa simple pero nindot paminawon nga mga pulong, gipakita sa Bibliya kon unsay gusto ni Jehova alang niadtong nagapangita kaniya: ‘Mabuhi unta [kamo] hangtod sa kahangtoran.’​—Salmo 22:26.

Unsay imong himoon aron mahimo kang higala sa Diyos sa walay kataposan? Padayon sa pagkat-on bahin kaniya pinaagi sa iyang Pulong, ang Bibliya. (Juan 17:3; 2 Timoteo 3:16) Pangayo kaniyag tabang aron imong masabtan ang Kasulatan. Ang Bibliya nagpasalig nato nga kon kita kinasingkasing nga ‘magpadayon sa pagpangayo sa Diyos’ ug kaalam, ihatag niya kini kanato. * (Santiago 1:5) Dayon, ipadapat ang imong nakat-onan, ug himoa ang Bibliya ingong “lampara sa [imong] tiil” ug “kahayag sa [imong] alagianan”​—karon ug hangtod sa hangtod.​—Salmo 119:105.