ZAN mui lakah naa chawk hei ti u sih. A mui tuk cang ko nain a ceu tukmi dahmei naa ken caah lam ka tlau tiah na ruat lo. Na hmaika na ceuh tikah na kalnak ding lam kha fiang tein na hmuh. Hmaileipi na ceuh tik zongah lamhlapi tiang kha fiang tein na hmuh.

Baibal cu, cu bantuk dahmei bantuk a si. A hmasa capar hna ah kan hmuh bantukin zeithil hmanh a fiang lomi hi vawlei ah nifate kan tonmi buaibainak hna tawnghtham awkah Baibal nih a kan bawmh khawh. Mah lawng hmanh a si rih lo. Hmailei zong a kan hmuhter khawh. Zungzal lawmhnak le hnangamnak a pemi lam kha a kan hmuhter i a kan zulhter khawh. (Salm 119:105) Zeitin in dah?

Hmailei ruahchannak a kan pemi lam pahnih kha i ruah hna u sih: 1 Nunnak sullam a ngeihter i 2 Pathian he zungzal in hawikom si khawhnak lam a kan cawnpiak.

Baibal nih buaibainak hna tawnghtham khawh awkah a ṭhami ruahnak cheuhnak a kan pek khawh. Asinain Baibal cu ruahnak cheuhnak a pemi cauk sawhsawh men a si lo. Kanmah pumpak kongkau lawng si loin a biapi deuhmi kongkau ah lungthin chiah dingin a kan cawnpiak. Cutin kan tuah lawngah kan nunnak cu sullam a ngei lai.

Tahchunhnak ah, mah Baibal phunglam hi ruathmanh: “Pek leiah hin hmuh lei nakin lunglawmhnak a um deuh.” (Lamkaltu 20:35) A chambaumi pakhat kha na bawmh hei ti u sih. Asiloah na hawi pakhat nih a lungchung bia aan chimhmi kha na ngaihpiak hei ti u sih. Na bawmh khawh caah naa nuam a si ko lo maw?

Hmuh ṭhan ding kha i ruahchan loin kan pek tikah lawmhnak nganpi kan hmu. Caṭialtu pakhat nih “hmuh ṭhan ding timi ruahchannak um loin  pek timi cu a si kho lomi a si” tiah a ti. Asinain a kan pe ṭhan kho lomi hna kha kan pek hna ahcun ṭhatnak kan hmu lai. A tak ti ahcun kannih cu Pathian he rian a ṭuanṭimi kan si. Pathian nih mi kan bawmhmi hna kha amah cawih bantukin a ruah. (Phungthlukbia 19:17) Pathian nih misifak pawl kan bawmhmi hna kha a sunsak tuk i a nuam tukmi vawlei paradis ah zungzal nunnak kaan pek hna lai tiah bia a kan kamh. Mah cu a ṭha tukmi hmailei ruahchanhnak a si.—Salm 37:29; Luka 14:12-14. *

A hmaanmi Pathian Jehovah kan biaknak thawngin sullam a ngeimi nunnak kan hmu kho tiah Baibal nih a kan cawnpiak. Pathian nih hmuh awkah aa tlakmi thangṭhatnak, upatnak le nawlngaihnak pek awk zongah a kan forh. (Phungchimtu 12:13; Biathlam 4:11) Cutin kan tuah ahcun a kan Sertu Pathian cung hmanhah ṭhatnak a um kho. Cucaah Pathian nih ‘fim u law ka lung ka lawmhter tuah u’ tiah a kan forh. (Phungthlukbia 27:11) Baibal phunglam cungah hrambunh in biakhiahnak kan tuah ahcun vancung kan Pa lung kan lawmhter lai. Zeicahtiah Pathian nih a kan zohkhenh i a lamhruainak zulhnak thawngin ṭhatnak hmu hna seh ti a kan duh. (Isaiah 48:17, 18) Van le vawlei Uktu kha kan biak i a lung a lawmhtermi lam in kan nunmi nakin a ṭha deuhmi nunnak sullam a um ti lo.

Baibal nih Pathian he hawikom si khawhnak lam zong a kan cawnpiak. Baibal nih “Pathian cu naih u law aan naih ve hna lai” tiah a ti. (Jeim 4:8) A ṭhawng bikmi Sertu he hawikom si khawh a si taktak maw tiah a caan ah kan lung a hring men lai. Asinain Baibal nih Pathian kha kan “kawl” ahcun kan “hmuh” lai, “Pathian cu aho kan sin hmanh hin aa hlat lo” tiah bia a kan kamh. (Lamkaltu 17:27) Pathian hawi si u timi Baibal ruahnak cheuhnak cu hmailei caah aa tlak tukmi a si. Zeiti lam in dah?

Mah hi ruathmanh: Zeitluk in kan i zuam hmanhah kan ral ngan bik a simi thihnak in ahohmanh kan luat kho lo. (1 Korin 15:26) Asinain Pathian cu zungzal in a nungmi a si. Cucaah a hawile zong zungzal in nung hna seh ti a duh. Jehovah nih amah a kawlmi hna kha “zungzal in thluachuak in um ko hna seh” ti a duh tiah Baibal nih a ti.—Salm 22:26.

Pathian he zungzal hawikom si khawh awkah zeitindah na tuah khawh? Baibal in a kong na hlathlai zungzalnak thawngin a si. (Johan 17:3; 2 Timote 3:16) Baibal hngalhthiam awkah Pathian sinah bawmhnak hal. Fimnak pek awkah lungtak in ‘Pathian sin thla kan cam’ ahcun a kan pek lai tiah Baibal nih a ti. * (Jeim 1:5) Cun na hngalhmi kha na nunnak ah hman i zuam. Baibal cu ‘na ke caah meiinn,’ ‘na lam caah ceunak’ siter zungzal.—Salm 119:105.