KON U TAKI i wawan e waka a wan dunguu pasi a neti. I nai buuya, bika yu abi wan bun adaaya. Te i leti en, yu e si bun. Te i wai en go na a pasi, yu e si go te a fesi.

Beibel de enke wan adaaya. Enke fa u be taki aini den artikel a fesi, a Wowtu fu Gadu poi yeepi wi anga den polobelema di e miti wi ala dei aini a goontapu ya. Ma a ná so wawan Beibel e yeepi u. Ai yeepi u fu sabi san o pasa aini a ten di e kon tu. Ai soi u san u mu du fu abi wan libi di e gi u piisii fu alaten (Psalm 119:105). Fa ai yeepi u?

Meke u luku tu fasi fa Beibel e yeepi u fu biibi taki sani o go moo bun aini a ten di e kon: 1 Ai meke u piisii aini a libi, anga 2 ai leli u fa u sa toon mati anga Gadu, a sama di meke u.

Beibel e soi u san u mu du te wi abi polobelema. Ma a ná dati wawan. Ai soi u taki wi á mu e poti pakisei a den booko-ede fu u wawan. Ai yeepi u tu fu poti pakisei a den moo pelensipali sani. Efu u wooko anga san a taki wi o piisii aini a libi.

Beibel taki: „Wan sama di e gi taawan sani o de koloku moo enke te taawan e gi en sani” (Toli 20:35). I man membee wan leisi di i be yeepi wan sama di be de a nowtu? Efuso kande i sabi ete fa i be sidon aliki di wan mati fi i be wani puu koko neen ati. Yu á fii bun di i yeepi wan taawan noh?

 Wi e moo fii bun te u nai yeepi sama fu di u wani den yeepi u baka. Wan man sikiifi taki: „A nai pasa makiliki taki wan sama gi taawan sani, da a á fende wan sani baka.” Winsi fa u nai suku wini a sama te wi e gi den sani, tokuso u sabi taki a sama di meke u, o pai u namo fu san u du. Gadu taki te wi e yeepi den sowtu sama ya, da a leti enke wi e leni en sani. Neen seefi o pai u (Odo 19:17). Ai teke en fu bigi te wi e yeepi den pootiman. Ai paamisi u taki a o pai u anga teego libi aini wan paladeisi a goontapu ya. Dati a wan moin paamisi tuutuu!​—Psalm 37:29; Lukasi 14:12-14. *

Ma Beibel e soi u tu taki a sani di o meke u piisii, a te wi e dini Yehofa, a tuu Gadu. Beibel e gi u taanga-sikin fu gi Gadu gaandi, bika neen meke u. Ai gi u taanga-sikin tu fu gafa en anga fu aliki en (Peleikiman 12:13; Openbaring 4:11). Te wi e du den sani ya, wi e meke Gadu piisii. A taigi u taki: „Soi taki i koni. Meke mi piisii” (Odo 27:11). Pakisei a sani ya. Te wi e du sani enke fa a sikiifi aini Beibel, da wi e meke Yehofa, u Dda di de a hemel piisii. Saide? Bika ai booko en ede anga u. A wani u du san a taki fu u sa fende wini (Yesaya 48:17, 18). Nawan sani o meke u piisii enke te wi e libi a wan fasi di e meke Gadu piisii.

Beibel e gi u taanga-sikin tu fu toon mati anga Gadu, bika a sikiifi taki: „Kon koosube a Gadu, da enseefi o kon koosube a yu” (Yakowbesi 4:8). Kande son leisi wi e denki taki wi á poi toon mati anga Gadu. Ma Beibel e soi u taki efu ’wi e suku Gadu, wi o fende en, bika a á de faawe fu u’ (Toli 17:27). Efu u toon Gadu mati, a o yeepi u aini a ten di e kon. Fa a o yeepi u?

Pakisei a sani ya: Winsi san u du, nawan fu u poi lon gi dede, a gaan feyanti fu u (1 Korentesama 15:26). Ma Gadu e libi fu teego. Noiti a o dede, neen meke a wani den mati fi en libi fu teego tu. Beibel e soi san Yehofa wani du gi den sama di e dini en. A taki: „U mu libi fu teego.”​—Psalm 22:26.

San o yeepi i fu toon Gadu mati fu teego? I mu e leisi Beibel da a sani ya o yeepi fu kon sabi Gadu (Yohanisi 17:3; 2 Timotiyesi 3:16). Meke a yeepi i fu fusutan Beibel. Beibel e soi taki efu wi e „tan begi Gadu” fu a gi u koni, a o gi wi en * (Yakowbesi 1:5). A lasiti sani di u mu du, u mu wooko anga den sani di u leli, da Beibel o de ’enke wan abeni gi u. A o yeepi u fu si pe u mu poti u futu. A o meke u si pe u mu waka’. A ná nownow wawan, ma fu teego.​—Psalm 119:105.