YAK idọhọ ke asan̄a ke usụn̄ mbubreyo. Kpa ye oro eyo ofụkde owo idem, idem inyekke fi sia ikan̄ (torch) emi akamade enen̄ede ayama. Edieke etuenede ikan̄ oro ke isọn̄, un̄wana esie ayanam okụt ebiet emi ekpesịnde ukot. Edi edieke anyande enye ke iso, un̄wana esie ayanam ada okụt n̄kpọ ke anyan usụn̄.

Bible etie nte ikan̄ oro. Se iketịn̄de ke mme ibuotikọ oro ẹbede owụt ke Bible ekeme ndin̄wam nnyịn iyọ mme mfịna oro isisobode ke usen ke usen ke idiọk ererimbot emi. Edi enye anam se ikande oro. Enye anam ifiọk se iditịbede ke ini iso, ndien emi anam ifiọk nte ikpodude uwem man ikop inemesịt. (Psalm 119:105) Didie ke enye anam emi?

Yak ineme n̄kpọ iba emi Bible etịn̄de oro anamde nnyịn idori enyịn ke n̄kpọ ọyọfọn ke ini iso: 1 Enye anam ifiọk ntak emi nnyịn idude uwem, onyụn̄ 2 ekpep nnyịn se ikpanamde man idi ufan Abasi ke nsinsi.

Bible ọnọ nnyịn ata eti item aban̄a nte ikpọkọkde mfịna nnyịn. Edi enye itiehe nte mme n̄wed eken emi ẹtịn̄de nte owo ọkpọkọkde mfịna esie sia enye ọdọhọ nnyịn isinam se inemde Abasi esịt inyụn̄ in̄wam mbon en̄wen, utu ke ndikere mban̄a idem nnyịn kpọt. Edieke inamde emi, iyenen̄ede ikop inemesịt.

Yak ida se Bible etịn̄de ke Utom 20:35 ke uwụtn̄kpọ. Itien̄wed oro ọdọhọ ete: “Inemesịt odu ke ndinọnọ akan ke ndibọbọ.” Ndi emeti ini emi akan̄wamde owo emi mînyeneke n̄kpọ, m̀mê ini emi ekenen̄erede akpan̄ utọn̄ ọnọ ufan fo etịn̄ se ifịnade enye? Anaedi esịt ama enem fi ke ini akanamde oro.

Esịt esinen̄ede enem nnyịn ke ini inọde owo n̄kpọ inyụn̄ idorike enyịn ndibọ n̄kpọ ndomokiet nto owo oro. Ete kiet ekewet ke n̄wed esie ete:  “Idụhe-du nte an̄wamde owo ndien afo etre ndibọ se ikande se akanamde ọnọ owo oro, ama akam edi ukûdorike enyịn ndibọ utịp ke se akanamde.” Edi, ke ini in̄wamde owo​—akpan akpan ke ini in̄wamde mbon emi mîdikemeke ndin̄wam nnyịn n̄ko​—iyọbọ utịp. Iyenem Abasi esịt, enye oyonyụn̄ ọdiọn̄ nnyịn sia enye ada eti n̄kpọ oro inamde inọ mme owo nte inọ enye ebuọt. (Mme N̄ke 19:17) Esinem enye ndikụt nte inamde nti n̄kpọ inọ mbon oro ẹyomde un̄wam, ndien enye ọn̄wọn̄ọ ke iyanam nnyịn idu uwem ke nsinsi ke Paradise ke isọn̄. Idụhe se inemde nnyịn ntem!​—Psalm 37:29; Luke 14:​12-14. *

N̄ko, Bible ọdọhọ ke imekeme ndinen̄ede n̄kop inem uwem edieke ikponode Jehovah Abasi. Enye ọdọhọ itoro Abasi, ikpono enye, inyụn̄ ikop uyo esie sia enye odot itoro, ukpono, ye ubọn̄. (Ecclesiastes 12:13; Ediyarade 4:11) Iyenem Abasi esịt ke ini inamde mme n̄kpọ emi. Enye ọdọhọ nnyịn ete: “Nyene ọniọn̄, nyụn̄ dat mi esịt.” (Mme N̄ke 27:11) Ata akwa ifet ke Abasi ọnọ nnyịn emi! Ke ini idade mme item Bible ibiere n̄kpọ, iyanam Ete nnyịn eke heaven okop idatesịt. Ntak-a? Sia enye ekere aban̄a nnyịn onyụn̄ oyom ikop uyo imọ man n̄kpọ ọfọn ye nnyịn. (Isaiah 48:​17, 18) Idụhe se ifọnde nte ndida uwem nnyịn nnam n̄kpọ nnọ Abasi emi odotde ndikara ofụri enyọn̄ ye isọn̄, nnyụn̄ nnam se inemde enye esịt.

Bible ọdọhọ idi ufan Abasi. Enye ọdọhọ ete: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Ndusụk ini, imekeme ndikere m̀mê owo osụk ekeme ndinam ufan ye Abasi emi okobotde kpukpru n̄kpọ. Bible ọdọhọ ke ekeme, ntak edi oro enye ọdọhọde ke edieke iyomde Abasi, ke iyokụt enye sia enye iyomke usụn̄ ikpọn̄ nnyịn owo kiet kiet. (Utom 17:27) Edieke idide ufan Abasi nte Bible ọdọhọde, iyadia ufọn ke nsinsi. Ntak idọhọde ntre?

Ke uwụtn̄kpọ, ọkpọkọm itịme didie, idụhe owo nnyịn ndomokiet emi ekemede ndifehe mbọhọ n̄kpa. Enye edi akakan asua nnyịn. (1 Corinth 15:26) Edi Abasi ikemeke ndikpa, enye ododu ke nsinsi onyụn̄ oyom mme ufan esie ẹdu uwem ke nsinsi. Ntak edi oro enye ọdọhọde mbon oro ẹmade enye ete: “Esịt mbufo akpakam odu uwem ke nsinsi.”​—Psalm 22:26.

Nso ke akpanam man edi ufan Abasi ke nsinsi? Ana aka iso ekpep Ikọ esie man etetịm ọdiọn̄ọ enye. (John 17:3; 2 Timothy 3:16) Bọn̄ akam ben̄e enye anam Ikọ esie an̄wan̄a fi. Bible ọdọhọ ke edieke ikade iso ndiben̄e Abasi ọnọ nnyịn ọniọn̄, ke enye ọyọnọ nnyịn. * (James 1:5) Ekem, domo ndinam se ekpepde ke Ikọ Abasi man enye edi “utuenikan̄ ukot [fo] ye un̄wana usụn̄ [fo]” idahaemi ye ke nsinsi.​—Psalm 119:105.