JÜLÜJATAA PAAʼIN warai pümüin aipaʼa suluʼupünaa wanee wopu. Mayaapejeʼe piyuushitpain, nnojoishi maaʼawaataain müin pia süka eein pümaʼana wanee jooki koʼukat maʼin. Pünaküle mmoluʼumüin, piʼrüin eepünaainjachire pülatüin, shiasaʼa pünaküle püpüleerua, piʼrüin tü wopukot sutuma suwarala tü jookikat.

Tü Wiwüliakat müsü aka saaʼin tia jookikat. Wekirajaaitpa anain suluʼu tü palajatkalüirua ekirajaaya, sükaaliinjain waya tü Wiwüliakat süpüla eejiraain waya sümaa tü alatawaikat wamüin. Alanaʼaleepejeʼe maʼin shia suulia suchuwala wanee jooki, süka jamüin, müin weʼrakai saaʼin sutuma tü kasa eejeetkat mapeena otta suʼunirüin waya suluʼupünaa tü wopu sünainmüinjatkat talata aaʼin waneepia (Salmo 119:105). ¿Kasa sükaaliinjaka aka waya tü Wiwüliakat?

Wekirajaa sünain piamasü kasa sükaaliinjaka aka waya tü Wiwüliakat süpüla anainjatüin wakuwaʼipa watta kaʼi: 1 Wayaawata aaʼu sutuma kasapülajanain nukumajaka waya Maleiwa otta 2 shikirajüin waya süpüla aleewain waya waneepia nümaa chi Kakumalakai waya.

Süküjain tü Wiwüliakat tü waaʼinrajatkat süpüla eejiraain waya sümaa tü alatakat wamüin. Nnojotsü shiain wanee karaloʼuta aküjaka neʼe tü waaʼinrajatkat süpüla talatüinjatüin waaʼin. Shikirajüin waya sünain nnojoluinjatüin jülüjüin neʼe waaʼin tü alatakat wamüin, shia jülüjainjatka waaʼin kasapülajanain nukumajaka waya Maleiwa. Wayaawatapa saaʼu tia, aneerü maʼin waaʼin.

Jülüja paaʼin tü sümakat tü Wiwüliakat: «Anakuaippaʼireʼeya chi wayuu aapakai nuulia chi aapünakai amüin» (Aluwataaushikana [Hechos] 20:35). ¿Sotusüche paaʼin wanaa sümaa pükaaliinjain wanee wayuu alatirakai mülia? ¿Sotusüche paaʼin soʼu paapajüin tü nüküjakat wanee paʼaleewain pümüin süchiki mojuin maʼin naaʼin? Talatüsü maʼin paaʼin sutuma pükaaliinjain naya, ¿aashimüin?

Talatüsü waaʼin wakaaliinjale na waneinnua sümaa nnojoluin waʼatapajüin keeʼirakain shia atumawaa.  Anuu nünüiki wanee wayuu ashajüi karaloʼuta: «Wainmaleejeeria kasa anasü weʼraka sünainjee akaaliinjaa na waneinnua nnojorüle waʼatapajüin keeʼirakain shia natuma». Shiapejeʼe keeʼirakeerüin wamüin wakaaliinjale na wayuu maʼletsekana, süka jamüin, waʼyanaajiraain nümaa chi Kakumalakai kasa süpüshuaʼa jee müshi kojuyaalakai naaʼin woulia sutuma tia (Proverbios 19:17). Kojutusü maʼin nümüin Maleiwa tü waaʼinrakat napüleerua na müliakana otta nuwalaajeerü shia wamüin naashin, kateerü woʼu nutuma süpüla kaʼikat süpüshuaʼa yaa saaʼu tü Mmakat paʼaraiisüpa shia. ¡Anataʼaleesüjaʼa maʼin tü waʼatapajakat! (Salmo 37:29; Lucas 14:12-14). *

Saashin tü Wiwüliakat, talatüsü waaʼin waʼwaajüle Jeʼwaa, chi Maleiwa shiimainshikai. Otta müsia süküjain, waʼwaajüinjachin nia, kojutuinjachin nia wamüin otta woonooinjanain nümaa süka niain Kakumalain kasaka süpüshuaʼa (Eclesiastés 12:13; Alateetkat Mapeena [Apocalipsis] 4:11). Waaʼinrüle tia, talateerü naaʼin Maleiwa watuma. Anuujeseʼe nünüiki wamüin: «Kekii maʼin pia tachonchee otta pütalateʼera taaʼin» (Proverbios 27:11, TNM). Jülüjataa paaʼin tüü: anale tü kasa waneekakat sutuma woʼunirüin shia sükajee tü sümakat tü Wiwüliakat, talateerü naaʼin chi Washi iipünaajachikai watuma. ¿Jamüshi talateechika nia? Shia süka jülüjain waya naaʼin otta keeʼireesü naaʼin woʼunirüin wakuwaʼipa sükajee tü Wiwüliakat süpüla anain waya (Isaías 48:17, 18). Nnojotsü eein wanee kasa anaka maʼin atuma waaʼin suulia awaajaa chi Aluwataakai saaʼu kasaka süpüshuaʼa jee müsia atalateʼeraa naaʼin, ¿aashimüin?

Shikirajüin waya tü Wiwüliakat süpüla aleewainjanain maʼin waya nümaa chi Kakumalakai kasaka süpüshuaʼa. Müsüjeseʼe sümüin: «Müleka jürütkaale nünainmüin Maleiwa, arütkaajeechi nia jünainmüin» (Santiago 4:8). Eesüjaʼa kapüleere wamüin anoujaa sünain eein süpüla aleewain waya nümaa chi Kakumalakai kasaka süpüshuaʼa, chi pülashikai maʼin. Süküjapejeʼe tü Wiwüliakat, wanteechin anain Maleiwa wachajaale maʼin nüchiki, süka jamüin, «nnojoishi wattain Maleiwa woulia wayakana waneʼewai wakua» (Aluwataaushikana 17:27, TNM). Aleewale waya maaʼutpünaa nümaa chi Maleiwakai, sükaaliinjeena waya süpüla anain wakuwaʼipa watta kaʼi, ¿suluʼu jamüin?

Jülüja paaʼin motsomüin tüü: wayakana wapüshuaʼa wachajaain maʼin sukuwaʼipa süpüla nnojoluinjanain outuin waya, isapejeʼe wachiki tia, nnojoishii süpüla isainjanain waya suulia tü outaakat (1 Corinto 15:26). Akaisaʼa chi Maleiwakai eeshi süpüla kaʼika süpüshuaʼa, müsüjeseʼe keeʼireein naaʼin katüin noʼu süpüla kaʼika süpüshuaʼa na naʼaleewainkana. Anashaatasü maʼin tü keeʼireekat naaʼin Jeʼwaa napüleerua na achajaakana nüchiki, müsü nünüiki: «Kata joʼu süpüla kaʼikat süpüshuaʼa» (Salmo 22:26, TNM).

¿Kasaka paaʼinrajatüin süpüla aleewain pia waneepia nümaa Maleiwa? Ayataʼaya pikirajaain nüchiki suluʼu tü Wiwüliakat (Juan 17:3; 2 Timoteo 3:16). Puchunta kaaliinwaa nümüin süpüla piyaawatajatüin saaʼu tü Nünüikikat. Saashin tü Wiwüliakat, wachuntule kekiiwaa nümüin Maleiwa sümaa nnojoluin yaletayaain waaʼin, naapeerü wamüin shia * (Santiago 1:5). Piʼitaainjatü suluʼu pukuwaʼipa tü pikirajaakalü anain suluʼujee tü Wiwüliakat. Paaʼinrüle tia, meerü tü Nünüikikat Maleiwa maʼaka saaʼin wanee «ranpara» anakaka püpüleerua jee maʼaka saaʼin wanee «luusa» anakaka tü wopu puʼunajatkalü aluʼupünaa (Salmo 119:105).