EÑEIMAHINAMÍNA reguataha rehóvo peteĩ tape iñypytũetereívare. Ajeʼíma ningo oike hague kuarahy, péro nde reikuaa nerekañymoʼãiha, pórke reguereko nde pópe peteĩ lintérna ohesape porãitereíva. Reapuntáramo pe yvýre, rehecha porã mbaʼépa oĩ upepete, ha reapuntáramo ne renonderãme, ohesape ndéve mombyryeterei peve.

Heta hendáicha la Biblia ojogua upe lintérnape. Ko múndope ningo oiko heta mbaʼe ñahaʼarõʼỹva, péro jahecha haguéicha umi artíkulo ohasa vaʼekuépe, Ñandejára Ñeʼẽ ñanepytyvõ ñambohovái hag̃ua umi provlemakuéra jaguerekóva káda día. Péro ndahaʼéi upévante, avei ohesape ñane renonderã, pórke ñanepytyvõ jahecha hag̃ua moõrupipa jaha vaʼerã javyʼa hag̃ua pára siémpre (Salmo 119:105). ¿Mbaʼéichapa ojapo upéva?

Jahechamína mbaʼéichapa la Biblia ñanepytyvõ mokõi hendáicha iporãve hag̃ua ñane renonderã: 1 Jaikuaa maʼerãpa jaikove, ha 2 ñanemboʼe mbaʼéichapa ikatu jaguereko peteĩ amista odurátava pára siémpre ñande Apoharéndi.

La Biblia omeʼẽ ñandéve heta konsého iporãitereíva ñanepytyvõva ñambohovái hag̃ua ñane provlemakuéra, péro ndahaʼéi peteĩ lívro de autoajúda reínte. Ñanemboʼe ani hag̃ua ñañekonsentraiterei umi mbaʼe ñandepyʼapývarente, síno jahechakuaa hag̃ua oĩha hetaiterei mbaʼe iñimportantevéva. Sólamente ñantende porãramo upéva isentidovéta la ñande rekove.

Epensamína por ehémplo ko konsého oĩvare la Bíbliape: “Javyʼaiteve ñameʼẽvo, ñandéve oñemeʼẽ rangue” (Hechos 20:35). ¿Nemanduʼápa algúna ves reipytyvõrõ guare peteĩ nde rapicha oreko vaʼekuépe provléma ekonómiko? ¿Térãpa algúna ves repyta rejapysaka peteĩ ne amígore omombeʼu jave ndéve mbaʼéichapa oñeñandu? Umícha jave, katuete oiméne revyʼa raʼe reipytyvõ haguére ótrope oñeñandu porãve hag̃ua.

 Javyʼaitereive ningo ñakompartíramo umi mbaʼe jaguerekóva ñahaʼarõʼỹre oñemyengovia ñandéve upéva. Peteĩ eskritór heʼi vaʼekue: “Ñañehaʼãmbaitéramo ótra persóna rehehápe, kási segúro jarresivíta hetave mbaʼe la ñameʼẽ vaʼekuégui, péro sólamente jajapóramo upéva ñahaʼarõʼỹre oñemyengovia ñandéve”. Añetehápe jajesakrifikáramo ótro rehehápe, ha koʼýte umi ndorekóivare opaga hag̃ua ñandéve, katuete oñemyengoviáta ñandéve la jajapóva. Upéicha jajapóramo, ñaipytyvõ hína ñande Apoharépe ha haʼe opensa voi opytaha odeve ñandéve upévare (Proverbios 19:17). Ñandejára ovaloraiterei la jajapóva umi osufríva rehehápe, ha opromete opagataha ñandéve. ¿Mbaʼéichapa ojapóta upéva? Omeʼẽta ñandéve vída etérna peteĩ paraísope ko yvy ape ári. ¡Ajépa iporãite upe esperánsa! (Salmo 37:29; Lucas 14:12-14). *

Iñimportanteveha, la Biblia ñanemboʼe mbaʼéichapa ikatu isentidove la ñande rekove jaservívo Ñandejára tee Jehovápe. Iñeʼẽme haʼe ñanemokyreʼỹ ñamombaʼeguasu hag̃ua chupe, avei jarrespeta ha ñaneñeʼẽrendu hag̃ua chupe haʼe omereseháicha (Eclesiastés 12:13; Apocalipsis 4:11). Jajapo jave upéicha jahupyty peteĩ mbaʼe iporãitereíva: ñambovyʼa ñande Apoharépe. Haʼe ojerure voi ñandéve: “Nearandúke che raʼy, upéva chembovyʼa” (Proverbios 27:11). Epensamíntena, jadesidi porãramo jasegi rupi umi konsého oĩva la Bíbliape, ñambovyʼa hína ñande Ru yvagapeguápe. ¿Mbaʼérepa jaʼe upéva? Pórke haʼe oñeinteresa ñanderehe ha oipota jasegi igía oho porã hag̃ua ñandéve (Isaías 48:17, 18). Ha añetehápe tuichaiterei isentidove la ñande rekove jaservíramo pe persóna iñimportantevévape ha ñambovyʼáramo chupe.

La Biblia avei ñanepytyvõ jaiko hag̃ua Ñandejára amígoramo. Santiago 4:8 heʼi voi: “Peñemoag̃uíkena Ñandejárare, ha haʼe oñemoag̃uíta penderehe”. Ikatu ñapensa hasyetereiha jaiko hag̃ua ñande Apohare ipuʼakapáva amígoramo. Péro ñañehaʼãramo ñañemoag̃ui hese katuete jahupytýta upéva. Iñeʼẽ oasegura: “Haʼe noĩri voi mombyry ñandehegui” (Hechos 17:27). La Biblia ñaneakonseha jaiko hag̃ua Ñandejára amígoramo, ha jasegíramo ko konsého, jajepreparáma hína ñane renonderãme g̃uarã. ¿Mbaʼérepa jaʼe upéva?

Epensamína ko mbaʼére: ñañehaʼãvéramo jepe, ndaipóri ni peteĩva ñande apytépe ikatu vaʼerã ojehekýi pe ñemanógui (1 Corintios 15:26). Péro Ñandejára katu oiko pára siémpre. Haʼe arakaʼeve nomanomoʼãi ha oipota iñamigokuéra avei oiko pára siémpre. Isensíllo ha iporãiterei ningo la Jehová heʼi lája mbaʼépa haʼe oipota umi oñehaʼãvape g̃uarã oñemoag̃ui hese, haʼe heʼi: “Ovyʼáta hikuái opa ára g̃uarã” (Salmo 22:26, TNM).

Reiko hag̃ua Ñandejára amígoramo pára siémpre esegi vaʼerã eaprende umi mbaʼe la Biblia omboʼéva chugui (Juan 17:3; 2 Timoteo 3:16). Ejerure chupe tanepytyvõ rentende hag̃ua la releéva. La Biblia oasegura ñandéve jajeruréramo ñande pyʼaite guive Ñandejárape ñanemoarandu hag̃ua, haʼe ojapotaha upéva (Santiago 1:5). * Tekotevẽ avei rejapo umi mbaʼe reaprendéva, upéicha Ñandejára Ñeʼẽ haʼéta ndéve g̃uarã “peteĩ lámpara” ohesapéva ndéve ha “peteĩ lus” omyesakãva nde raperã (Salmo 119:105, TNM).