NGATU TJE ongurova imwe mokayenda mondjira onde nu yonḓorera. Nandarire kutja eyuva ra hiti rukuru, ko nokumuna kutja mo pandjara, orondu u nondotja ndji nondjerera ombwa meke roye. Tji wa munine pozombaze zoye, mo munu oviṋa avihe nawa mbi ri popezu na ove. Nu tji wa munine komurungu kaṱiṱi, mo yenene okumuna nawa ondjira yoye aihe okuza kokure.

Momiano tjiva, Ombeibela wina i ri tjimuna ondotja ndjo. Otja tji twa munu motupa tu twa kapita, Embo ra Mukuru ri yenena okutuvatera okutjinda omazeu weyuva arihe ngu tu muna. Posi yokutja pena otjiṋa tjarwe wina Ombeibela tji i tjita. Oyo i tu vatera kutja tu kare noumune ouwa ohunga noruyaveze, nokutuvatera okumuna ondjira ndji kovisa, nu ndji twara kouṋingandu oukarerere. (Epsalme 119:105) Mape ya vi nao?

Ngatu tare komiano vivari Ombeibela mu i yandja omaundjiro koruyaveze: 1 Oyo i tu vatera okuhara ondando mehupo, nu 2 i tu honga omuano wokutunga oupanga oukarerere kuna Omuute wetu.

Ombeibela i tupa omaronga omaṱakame, nge tu vatera okutjinda omauzeu wetu, posi yokutja oyo kai ri tjimuna omambo wokurivatera oveni. Ombeibela kai tu tunduuza okuyandja ombango komauzeu wetu uriri, nungwari i tu honga okuyandja ombango koviṋa vyarwe ovinanḓengu mbi mavi yenene okuṱuna kehupo retu. Tji twa tjiti nao, otji matu hara ondando mehupo.

Okutara kotjihorera, ripurira komurari wOmbeibela mbwi: “Mokuyandja mu nenyando tjinene pokupewa.” (Oviungura 20:35) Mo zemburuka otjikando tji wa vatera omundu ngwa ri nouhepe? Poo indu tji wa twapo oruveze rwokupuratena kepanga ndaa ri nouzeu momuinyo? Ko nakuitavera kutja wa ri nondjoroka momuinyo, mena rokutja wa vatera omukweṋu okutjinda omauzeu we?

Tu kara nouṋingandu watjiri, indu tji matu yandja nokuhina okuundjira ko okukotorerwa otjiṋa. Omutjange  umwe wa tja: “Kamaape ya oyandja nokuhina okukotorerwa ovingi pu imbi mbi wa yandja, nu tjinene tji wa yandja nokuhina okuundjira ko otjisuta.” Posi yokutja indu tji twa yandja, nu tjinene ku imba mbe hina omuano wokutukotorera, tu muna otjisuta. Nu tu rira orupa roviṋa ovinene, orondu tu ungura pu nOmuute wetu. Nu Omuute wetu u vara ovitjitwa oviwa otja imbyo otjoviyazema ku ye. (Omiano 19:17) Eye u vara oviṋa avihe mbi tu tjita okuvatera ovasyona, nu wa kwizika kutja me tu sutu nomuinyo waaruhe moparadisa kombanda yehi. Inga tjiri omaundjiro omahimise koruyaveze!—Epsalme 37:29; Lukas 14:12-14. *

Nu kombanda yaavihe, Ombeibela i honga kutja matu yenene okumuna ondando yatjiri mehupo, indu tji twe rikotamene ku Mukuru watjiri, Jehova. Embo re ri tu tunduuza kutja tu mu tange, nokumuyozika, nokumupa onḓuviro ndje mu pwira. (Omuzuvarise 12:13; Omavandururiro 4:11) Tji twa tjiti nao, tu yenenisa otjiṋa otjihimise hi: Omuute wetu u kara nonyuṋe mu eṱe. Eye u tu tunduuza nomambo nga: “Rira onongo . . . nu u yorokise omutima wandje.” (Omiano 27:11) Ripurira ku imbi: Indu tji twa tjiti ozondando nḓa zikamena komirari vyOmbeibela, tu yorokisa omutima wa Tate wetu womeyuru. Omena ratjike? Mena rokutja eye u rikendera ku eṱe, nu u vanga kutja tu mune ouwa mokukongorera omirari vye. (Jesaja 48:17, 18) Nu tjiri, kape nondando yarwe osemba ndji matu yenene okutjita, pendje nokurikotamena kOmuhonapare Erike mevaverwa arihe, momuano mbu u yorokisa omutima we.

Ombeibela wina i tu honga kutja ngatu tunge oupanga kuna Omuute wetu. Omatjangwa ye tja: “Tumbukeye ku Ndjambi, nEye ma tumbuka ku eṋe.” (Jakobus 4:8) Povikando tjiva mape ya atu keyakeya kutja, mape ya tjiri atu rire omapanga wOmuute omunamasaaehe. Nungwari Ombeibela i tu tunduuza kutja ngatu mu ‘pahe,’ nokutja matu ‘mu munu,’ orondu “Eye hapo ke ri kokure na eṱe atuhe.” (Oviungura 17:27) Eronga rOmbeibela ndi tja ngatu rire omapanga wa Mukuru, mari yenene okutuvatera moruyaveze. Omomuano uṋe?

Ripurira ku imbi: Nandarire kutja twa kondjo pu pe ṱa pi, kamaa tu yenene okuyepa omunavita indji onḓiro, momasa wetu oveni. (1 Ovakorinte 15:26) Posi yokutja, Mukuru u karerera. Eye kamaa roro okukoka, nu u vanga kutja omapanga we wina ve hupe nga aruhe. Ombeibela i ungurisa omambo omapupu nomawa, nge raisa imbi Jehova mbye zerira imba mbe mu paha. Oyo i tja: “Ngave ṋingapare nga aruhe.”—Epsalme 22:26.

Nu hapo mo yenene vi okutunga oupanga oukarerere otja imbwi kuna Mukuru? Kayende komurungu okurihonga ohunga na ye okuza mEmbo re, Ombeibela. (Johanes 17:3; 2 Timoteus 3:16) Ningira ombatero ye kutja u zuve Omatjangwa nawa. Ombeibela i tu pa ongamburiro kutja tji twa ‘kumbu ku Ndjambi’ okuningira ounongo, eye me tu pe. * (Jakobus 1:5) Nu okuzambo, ṱakamisa mbi mo rihongo, nu yandjera kutja Embo ra Mukuru ri rire ‘emunine ndi ku hongorera’ nu wina ri rire ‘ondjerera mondjira yoye,’ nai nga konga aruhe.—Epsalme 119:105.