NONOPAMMU nga lumalakag ka ta maribbo nga dalan tadday nga gabi. Maski nu nabayag ngana nallammag i bilag, ari ka mavurung nga mawawan megafu ta egga masikan nga flashlight mu. Nu tuluammu i gukag, masingammu tu mapia i mismu arubammu. Nu tuluammu i angngayammu, nawaganna i dalammu adde ta arayyu.

Negitta i Biblia ta kunnatun nga flashlight. Gittana nekonsidera tam ta nappasa ira nga artikulo, makoffun nittam i Uvovug na Dios nga marubang i egga ta mismu arubattam​—i problema tam ira ta inaggaw taw nga awan tu seguridadna nga mundo. Ngem egga paga meyuffun na Biblia. Mangiyawa paga tu nawag ta mappange tapenu masingan anna matuttul tam i dalan nga mattuppal ta mannanayun nga pagayayya anna pakkakontento. (Salmo 119:105) Kunnasi?

Innattam i dua nga gannug nu kunnasi mangiyawa i Biblia nittam tu iddanama nga makoffun para ta mappange: 1 Mangiyawa tu gakkag ta pattolay, anna 2 tudduanna ittam nu kunnasi mapeggan tu mannanayun nga pakikofun ta Namaratu nittam.

Mangiyawa i Biblia tu mapattalakkan nga tabarang tapenu marubang i problema tam ira, ngem mas makasta yaw tu aru anne ta tanakuan ira nga libru. Imbes nga tudduanna ittam nga maffokus laman ta personal nga pakavurungan, kagian na Biblia nittam nga egga paga mas importante tatun. Tatun laman nga mapeggan tu gakkag i pattoletam.

Ikonsidera yaw nga prinsipio na Biblia: “Mas dakal i pagayaya ta pangiyawa anne ta pangalawa.” (Kingngua 20:35) Manono mu kari i tiempo nga nakoffukka ta makawag tu material? Onu baka nagginna ka ta kofummu turi ta nikagina i mataga-tagenona? Ari ka kari nagayayya ta panguffun ta tanakuan?

Daka-dakal i pagayayya tam nu mangiyawa ittam nga awan tu ekspektattam nga katalina. Kunna tadday nga autor: “Imposible nga manguffukka ta tanakuan nga awan tu mala mu nga katalina​—basta nanguffukka nga ariammu ninono nga egga bala-balo  mu.” Ngem nu manguffun ittam—mas ngana turi ta awan tu pakawayyada nga itoli i kingngua tam nira—egga malawà tam nga bala-balo. Mas dakal paga i nakua tam. Kakuruganna, makipattrabahu ittam ta mismu Namaratu megafu ta imammatanna yatun nga kinasippo nga gatuna nittam. (Proverbio 19:17) Tagibaloranna i kukukuattam ta mariga ira, anna nipromesana nga paganna ittam tu mannanayun nga inango ta paraiso nga davvun​—talaga makapagayayya nga iddanama ta mappange!​—Salmo 37:29; Lucas 14:12-14. *

I pinaka-importante, ituddu na Biblia nittam nga malegattam i kurug nga gakkag na pattolay gukaban na paddayaw ta kurug nga Dios, si Jehova. Ituddu paga natun nittam nga dayawan, ikakua, anna tuppalan yaya. (Eclesiastes 12:13; Nepakannammu 4:11) Nu kuattam yatun, matuppal tam i tadday nga gannug nga makasta nga nonopan: Mapagayayya tam i Namaratu nittam. Kunna paga: “Mammasirib ka . . . anna pagayayyatammu i futù.” (Proverbio 27:11) Nonopan yaw​—nu masirib ittam nga maddesision base ta prinsipio ira na Biblia, mapagayayya tam i futu na meddu nga Yama tam. Ngatta? Megafu ta ikavurunganna ittam anna ikayana nga mabenefisiowattam ta panuttul ta giyana. (Isaias 48:17, 18) Egga kari paga i mas mapia nga gakkag anne ta paddayaw ta Katannangan ta uniberso anna mattolay nga mamagayayya sa?

Ituddu paga na Biblia nga makikofun ittam ta Namaratu nittam. “Umaranni kamu ta Dios,” kunna na Katurakan, “ay umaranni yaya nikamu.” (Santiago 4:8) Madduda ittam nu karuan nu talaga posible i makikkofun ta makapangngua ta ngamin nga Namaratu. Ngem ipasiguradu nittam na Biblia nga nu ‘alegattam i Dios,’ ‘masimmuattam yaya,’ megafu ta “ari tu arayyu yaya ta kataggi-tadday nittam.” (Kingngua 17:27) Kuruga makoffun para ta mappange tam i tabarang na Biblia nga makikofun ta Dios. Ngatta?

Nonopan yaw: Maski anni kuattam, ariattam matammangngan i ultimo nga kalaban​—i patay. (1 Corinto 15:26) Ngem mannanayun i Dios. Ari yaya vuluvuga matay, yari tu kayàna nga mattolay gapa tu mannanayun i kokkofunna. Kinagi na Biblia ta simple ngem makakkasta nga uvovug i kayà ni Jehova para ta magala-aleg ira sa: “Mapia paray i pattuppalan na kukuad-da adde noka!”​—Salmo 22:26.

Kunnasi ka mapeggan tu kunnatun nga mannanayun nga pakikofun ta Dios? Itulu-tuloy nga maggigiammu meyannung sa gukaban na Biblia. (Juan 17:3; 2 Timoteo 3:16) Mappoffun sa nga malippawa yatun. Ipasiguradu na Biblia nga nu napafutuan nga “makimallo ta Dios” tu sirib, iyawana yatun nittam. * (Santiago 1:5) Ta ultimona, mappursigi nga iyaplika i magigiammum tapenu masserbi i Uvovug na Dios nga “allamparan nga mangirollu” anna “tulu ta [em-mu] ira nga laka-lakaran”—sangawe adde ta mannanayun.​—Salmo 119:105.