DAE rehọ iẹe nọ whọ rrọ edhere bi kpohọ obojọ evaọ aso ẹdẹjọ. Dede nọ oria kpobi u mu ebi no, whọ riẹ obonọ whọ be nya keme who kru etọche nọ o bi lo gaga họ obọ. Whọ tẹ nẹ etọche na rri otọ, whọ rẹ ruẹ oware kpobi nọ o rrọ aro ra vevẹ. Yọ whọ tẹ nẹe rri obaro, whọ rẹ ruẹ oware nọ o rrọ ugbo thethabọ.

Ebaibol na ọ wọhọ etọche otiọye na evaọ idhere buobu. Evaọ izoẹme nọ e vrẹ na, ma ta kpahe epanọ ehrẹ Ebaibol e sai ro fiobọhọ kẹ omai whaha ebẹbẹ jọ evaọ akpọ idabolo nana, epanọ ma sai ro ku ejọ họ, gbe epanọ ma sai ro thihakọ ebẹbẹ nọ ma sai kuhọ họ. Rekọ Ebaibol na ọ ta kpahe eware efa. Wọhọ ukpẹ, Ebaibol na ọ ta kpahe epanọ uzuazọ o te jọ evaọ obaro, gbe oware nọ ma re ru re ma sai wo evawere. (Olezi 119:105) Evaọ oghẹrẹ vẹ?

Joma ta kpahe idhere ivẹ jọ nọ Ebaibol na ọ rọ kẹ omai ẹruore kpahe obaro: 1 O fiobọhọ kẹ omai riẹ ẹjiroro nọ Ọghẹnẹ ọ rọ ma omai, yọ 2 o wuhrẹ omai epanọ ma sai ro mu usu nọ o rẹ tọ kugbe Ọghẹnẹ.

Ebaibol na ọ kẹ omai ehrẹ nọ i re fiobọhọ kẹ omai ku ebẹbẹ jọ họ je thihakọ efa. Ghele na, orọnikọ oware nọ ma re ru kpahe ebẹbẹ mai ọvo Ebaibol na ọ ta kpahe he. Ebaibol na o fiobọhọ kẹ omai riẹ nọ Ọghẹnẹ ọ ma omai re ma wo evawere jẹ reawere uzuazọ, yọ ma wo obọ evaọ ẹjiroro nana. Nọ ma te wo onana họ iroro, ma ti ru oware nọ u fo jẹ wereva evaọ uzuazọ.

Wọhọ oriruo, Ebaibol na ọ ta nọ: “Ẹkẹ evawere e mae rrọ vi emio.” (Iruẹru Ikọ 20:35) Dai roro kpahe oke jọ nọ who ro fiobọhọ kẹ ohwo jọ, hayo nọ whọ rọ gaviezọ kẹ ogbẹnyusu ra jọ nọ o je horie eva riẹ kpobi kẹ owhẹ. Kọ eva e gbẹ were owhẹ inọ who fiobọhọ kẹ ohwo na, hayo nọ who ru ogbẹnyusu ra oma sasa?

Ma re wo evawere nọ ma te fiobọhọ kẹ amọfa ababọ oware nọ ma re rẹro inọ a ti ru kẹ omai zihe. Ọzae jọ nọ o re kere ebe ọ ta nọ: “Nọ ma te fiobọhọ  kẹ amọfa, eware nọ i re te omai obọ i re bu viọ enọ ma ro fiobọhọ kẹ ae na​—otẹrọnọ ma ruọghọ na ababọ irẹro oware jọ nọ u ti te omai obọ zihe.” Ma tẹ maki fiobọhọ kẹ ahwo nọ ma riẹ nọ a sai zihe kẹ omai vievie he, ma ti wo evawere. Onana yọ osa ulogbo. Uzẹme riẹ họ, ma te fiobọhọ kẹ amọfa yọ Ọghẹnẹ ma bi fiobọhọ kẹ na, keme o re rri obufihọ otiọye na wọhọ ẹsenọ ma bi momo kẹe. (Itẹ 19:17) Ọghẹnẹ o re rri eware nọ ma bi ru kẹ iyogbere ghaghae, yọ ọ ya eyaa nọ ọ te rọ uzuazọ ebẹdẹ bẹdẹ evaọ aparadase hwosa kẹ omai​—osa nọ a rẹ ruẹ obọ riẹ hẹ!​—Olezi 37:29; Luk 14:​12-14. *

Maero na, Ebaibol na o wuhrẹ omai nọ ma sai wo evawere nọ ma tẹ be gọ Jihova, Ọghẹnẹ uzẹme na. Ebaibol na ọ ta nọ ma jiri Ọghẹnẹ, kẹe orro, je yoẹme kẹe keme ọye ọ ma omai. (Ọtausiuwoma Na 12:13; Eviavia 4:11) Ma te ru ere, eva e te were Ọghẹnẹ. Ọghẹnẹ ọ jọ Ebaibol na ta kẹ omai nọ: “Wo areghẹ, re who ru omẹ eva were.” (Itẹ 27:11) Dai roro iei​—nọ ma te bi ru lele ehrẹ nọ e rrọ Ebaibol na, ma re ru eva were Jihova, Ọsẹ oyoyou mai na. Fikieme? Keme ọ be daezọ mai, yọ ọ gwọlọ nọ ma nya lele ekpọvio nọ ọ kẹ omai re eware i woma kẹ omai. (Aizaya 48:​17, 18) Evaọ uzẹme, oware nọ o mai wuzou evaọ uzuazọ họ, re ma gọ Jihova nọ ọ ma odhiwu gbe akpọ na, je yeri uzuazọ mai evaọ edhere nọ o rẹ wha evawere sei.

Ebaibol na o wuhrẹ nọ ma mu usu okpekpe kugbe Jihova. Ebaibol na ọ ta nọ: “Wha si kẹle Ọghẹnẹ, o re ti si kẹle owhai.” (Jemis 4:8) Ẹsejọ o rẹ jọ bẹbẹ kẹ omai re ma rọwo nọ ohwo ọ sai jọ ogbẹnyusu Ọghẹnẹ. Rekọ Ebaibol na ọ kẹ omai imuẹro nọ ma tẹ “gwọlọ Ọghẹnẹ,” ma te “ginẹ ruẹ e riẹ, keme o thabọ no omai omomọvo ho.” (Iruẹru Ikọ 17:27) Re ma sai wo uzuazọ evaọ obaro, ma re ru lele ohrẹ nọ Ebaibol na ọ kẹ omai na re ma wo usu kugbe Ọghẹnẹ. Fikieme onana u ro wuzou?

Roro kpahe onana: Makọ epanọ mai ahwo-akpọ ma daoma te kẹhẹ, ohwo ọvo ọ sae va uwhu abọ họ. (1 Ahwo Kọrint 15:26) Rekọ Ọghẹnẹ o re whu hu. Ọ rrọ no ebẹdẹ rite ebẹdẹ, yọ ọ gwọlọ nọ idibo riẹ a rria bẹdẹ bẹdẹ re. Evaọ Ebaibol na, Jihova ọ rọ eme nana dhesẹ oware nọ o wo họ iroro kẹ enọ e be gwọlọ iẹe, inọ: “Uzuazọ o bọ izi rai bẹdẹ!”​—Olezi 22:26.

Ẹvẹ whọ sai ro mu usu okpekpe kugbe Ọghẹnẹ? Gbẹ hai wuhrẹ kpahe Ọghẹnẹ evaọ Ebaibol na. (Jọn 17:3; 2 Timoti 3:16) Yare iẹe re o fiobọhọ kẹ owhẹ wo otoriẹ Ebaibol na. Ebaibol na ọ kẹ omai imuẹro nọ ma tẹ be “hae yare Ọghẹnẹ” kẹ areghẹ, ọ te rehọ iẹe kẹ omai. * (Jemis 1:5) Ofariẹ, daoma fi eware nọ who bi wuhrẹ họ iruo, jẹ kuvẹ kẹ Ẹme Ọghẹnẹ re ọ jọ “ukpẹ kẹ awọ [ra]” gbe “elo kẹ edhere” ra​—enẹna gbe bẹdẹ bẹdẹ.​—Olezi 119:105.