УИ НЭГУ КЪЫЩІЭГЪЭХЬЭТ пщыхьэщхьэм гъуэгу кІыфІым урикІуэу. Дыгъэр зэрытІысыжрэ куэд щІауэ щытми, уэ угузавэкъым, сыт щхьэкІэ жыпІэмэ фонарь лъэщ пІэщІэлъщ. Абы и фІыгъэкІэ гъунэгъури жыжьэри болъагъу.

Библиер апхуэдэ фонарым ебгъэщхь хъунущ. ИпэкІэ узэджа статьяхэм зэрыщыплъэгъуащи, Библиер махуэ къэс дызыІущІэ гугъуехьхэм дыпэлъэщэну къыддоІэпыкъу. Абы нэмыщІ, Библием къытхузэІуех Алыхьым тхуигъэхьэзыра гъащІэ дахэм теухуауэ. Тхыгъэ ЛъапІэм насып мыухыжым ухуэзышэ гъуэгур уегъэлъагъу икІи абы утемыкІыну къыбдоІэпыкъу (Псалом 119:105). Дапхуэдэу?

Библием гугъэ дахэ къызэрыдит ІэмалитІым и гугъу тщІынщ. Абы 1) ди гъащІэм мыхьэнэ къыхелъхьэ икІи 2) дыкъэзыгъэщІа Алыхьым дауэ ныбжьэгъу дыхуэхъуфынуми къыдгурегъаІуэ.

Библием дзыхь зыхуэпщІ хъун чэнджэщ куэд итщ, ауэ ар цІыхум зэрызигъэсэж тхылъкъым. Уи щхьэ закъуэм фІэкІа уемыгупсысу, нэгъуэщІхэм уазэрыдэІэпыкъуным нэхъыбэу уегупсысыну абы ухуегъэуш. Абы щыгъуэщ уи гъащІэм мыхьэнэ иІэ щыхъунур.

Псалъэм папщІэ, мыпхуэдэ принципым и гугъу тщІынщ: «Къыуатыным нэхърэ птыным и гъуэгур нэхъ махуэщ» (Апостолхэм 20:35). Уигу къэгъэкІыж куэд мыщІэу зыгуэрым мылъкукІэ ущыдэІэпыкъуар е уи ныбжьэгъум уи зэманыр тебгъэкІуадэу и гум илъыр къыщыбжиІэм узэредэІуар. Зыгуэрым и гъащІэр нэхъ тынш зэрыпщІам насыпыфІэ уищІатэкъэ?

Зыгуэр къытхуащІэжыну дыпэмыплъэу фІы цІыхухэм щахуэтщІэм деж, абы насыпыфІэ  дещІ. ТхакІуэ гуэрым зэрыжиІэмкІэ, «нэгъуэщІхэм зыгуэр щахуэтщІэм деж, Іэмал имыІэу куэдкІэ нэхъыбэ дгъуэтыжынущ — дауикІ, ар гукъабзагъэм къыхэкІыу тщІауэ щытмэ». Пэж дыдэу, цІыхухэм, псом хуэмыдэу зыри къытхуэзымыщІэжыфынухэм, псэемыблэжу дащыдэІэпыкъум деж, фІыгъуэ куэд догъуэт. Ди гъащІэм мыхьэнэ иІэ мэхъу. ЦІыхухэм фІы яхуэтщІэр Алыхьым езым хуэтщІам хуэдэу елъытэр икІи апхуэдэ щІыкІэкІэ дыкъэзыгъэщІа Алыхьым дыдолажьэ (Притчи 19:17). НэгъуэщІхэм яхуэтщІэр Иеговэ лъапІэу елъытэ икІи жэнэтым гъащІэ мыухыжыр тыгъэу къыдитыну дыкъегъэгугъэ. А тыгъэм хуэбгъадэ хъун зыгуэр щыІэ? (Псалом 37:29; Лука 14:12—14).

Абы нэмыщІ, Библием зэрыжиІэмкІэ, Алыхь пэж Иеговэ дызэрыхуэлажьэм ди гъащІэм мыхьэнэ къыхелъхьэ. Библием дыхуегъэуш дыкъэзыгъэщІа Алыхьым щытхъу къыхуэтхьыну икІи и жыІэм дыщІэтыну (Экклезиаст 12:13; Апокалипсис 4:11). Ди акъылым тхуимыгъахуэ гуэр абы щыгъуэм тхузэфІэкІынущ: Алыхьыр дгъэгуфІэфынущ! Езы Иеговэ дыкъыхуреджэ: «Тет дунейм цІыху Іущу... сигу хэгъахъуэ» (Притчи 27:11, Гъэс.). Егупсысыт: Библием ит принципхэм тегъэщІауэ Іущагъ зыхэлъ унафэхэр щытщІым деж, уафэм щыІэ фІыуэ дыкъэзылъагъу ди Адэр догъэгуфІэ. Ар пэжу пІэрэ? Пэжщ, сыт щхьэкІэ жыпІэмэ Иеговэ дифІ къелъыхъуэ икІи ди гъащІэр насыпыфІэу щытын папщІэ дызыхуэныкъуэ чэнджэщхэр къыдет (Исаия 48:17, 18). Псори зи ІэмыщІэ илъ Алыхьым ухуэлэжьэным икІи Абы и гур бгъэгуфІэным нэхърэ нэхъыфІ сыт щыІэ?

Библием къыдгурегъаІуэ дауэ Алыхьым ныбжьэгъу дыхуэхъуфынуми. Абы щыжыІащ: «Тхьэм гъунэгъу зыхуэфщІи, езыми гъунэгъу зыкъыфхуищІынущ» (Екъуб 4:8). Зыгуэрым и дежкІэ ар фІэщхъугъуейщ. Ауэ Тхыгъэ ЛъапІэм зэрыжиІэмкІэ, Алыхьыр къэтлъыхъуэмэ, Іэмал имыІэу къытхуэгъуэтынущ, сыт щхьэкІэ жыпІэмэ «Тхьэр дэ тщыщ дэтхэнэми пэжыжьэкъым» (Апостолхэм 17:27). Алыхьыр зэрыбгъэныбжьэгъум уи гъащІэр ихъуэжыфынущ. Дапхуэдэу?

Псалъэм папщІэ, дапхуэдиз къару едмыхьэлІэми, ди бий нэхъыщхьэм — лІэныгъэм — дэ дытекІуэфынукъым (1 Коринф 15:26). Ауэ Алыхьыр игъащІэкІэ щыІэнущ. Ар зэи лІэнукъым икІи хуейщ и ныбжьэгъухэми гъащІэ мыухыж яІэну. Алыхьым и ныбжьэгъухэм къапэщылъ гъащІэм Библиер мыпхуэдэу топсэлъыхь: «Тхьэр зыхуейр зыгъэзащІэ цІыхур игъащІэкІэ щыІэнущ» (1 Иуан 2:17).

Алыхьым и ныбжьэгъуу игъащІэкІэ дауэ укъэна хъуну? Алыхьым и Псалъэ Библием уеджэурэ, адэкІи Абы теухуауэ къащІэ (Иуан 17:3; 2 Тимофей 3:16). Библиер къыбгурыІуэн папщІэ Алыхьыр къыбдэІэпыкъуну елъэІу. Тхыгъэ ЛъапІэм зэрыжиІэмкІэ, Алыхьым Іущагъ къыдитыну гурэ псэкІэ делъэІуу щытмэ, Абы Іэмал имыІэу дыщІелъэІур къыдитынущ (Екъуб 1:5) *. А псом нэмыщІ, къэпщІар уи гъащІэм къызэрыщыбгъэсэбэпыным хущІэкъу, мыпхуэдэу жыпІэфын щхьэкІэ: «Уи псалъэр — си лъакъуэр зытеувэр зыгъэнэху уэздыгъэщ икІи си гъуэгум и нэхущ» (Псалом 119:105).