NATU tye nee ngeno oto ende mondjila yonhumba konguloshi. Nonande okwa laula nale, ino tila molwaashi ou na otoshe i na eenghono. Eshi wa minikila pedu, owa mona nawa osho shi li mondjila. Ndele ngeenge owa minikile komesho, ouyelele wayo ohau minikile oshinano shile komesho yoye.

Sha faafana, Ombiibeli oya fa ouyelele wotoshe oyo. Ngaashi twe shi mona moitukulwa ya tetekela, Eendjovo daKalunga otadi dulu oku tu kwafela tu ungaunge nomaupyakadi akeshe efiku oo hatu shakeneke mounyuni ou wa piyaana. Ashike Ombiibeli otai tu kwafele moinima ihapu. Oi na yo ouyelele u na sha nonakwiiwa, oo tau dulu oku tu kwafela tu mone notu landule ondjila oyo tai twala kehafo tali kalelele nosho yo kewaneneno. (Epsalme 119:105) Ngahelipi mbela?

Natu ka taleni keenghedi mbali omo Ombiibeli tai dulu oku tu kwafela tu kale tu na eteelelo li na sha nonakwiiwa: 1 Otai tu kwafele tu kale tu na elalakano monghalamwenyo, notai 2 tu hongo nghee hatu dulu okupanga oukaume tau kalelele nOmushiti wetu.

Ombiibeli oya yandja omayele e shii okulineekelwa e na sha nanghee hatu dulu okuungaunga nomaupyakadi etu, noi dule kokule omambo oo a shangwa kovanhu. Ombiibeli otai tu hongo tu yandje elitulemo konakwiiwa, ponhele yoku tu ladipika tu yandje elitulemo koisho yetu yopaumwene. Kungaho opo ashike onghalamwenyo yetu tai dulu okukala i na eityo lashili.

Pashihopaenenwa, diladila kefinamhango lOmbiibeli eli tali ti: “Okuyandja oku nelao komesho yokutambula.” (Oilonga 20:35) Mbela ope na oshikando shimwe wa li wa kwafela umwe oo a li e na omhumbwe yoiniwe? Ile tashi dulika wa li wa longifa efimbo loye opo u pwilikine eshi kaume koye ta mbubula omutima waye? Mbela kwa li u wete wa pondola eshi wa twa umwe omukumo?

Ohatu mono ehafo linene ngeenge hatu yandje nopehe na okuteelela okwaalulilwa sha. Omushangimambo  umwe okwa ti: “Itashi shiiva u yandje sha nopehe na okwaalulilwa sha shi dulife pwaasho wa yandja, shimha ashike wa yandja nopehe na okuteelela u pewe sha.” Ashike ngeenge twa yandja, unene tuu kwaavo itava dulu oku tu alulila sha, ohatu mono ondjabi. Kungaho, ohatu hopaenene Omushiti wetu. Ohatu longo pamwe nOmushiti, oo ha tale ko ovo hava ulike olukeno va tulika kuye. (Omayeletumbulo 19:17) Okwa lenga neenghono osho hatu ningile eehepele, nokwa udaneka kutya ote ke tu pa ondjabi yomwenyo waalushe moparadisa kombada yedu. Olo kali fi tuu eteelelo litunhula li na sha nonakwiiwa! — Epsalme 37:29; Lukas 14:12-14. *

Komesho yaaishe, Ombiibeli otai tu hongo kutya ohatu dulu okumona elalakano lashili li na sha nonghalamwenyo mokulongela Kalunga kashili, Jehova. Otai tu ladipike tu mu longele, tu mu fimaneke notu dulike kuye. (Omuudifi 12:13; Ehololo 4:11) Ngeenge otwa ningi ngaho, ohatu hafifa Omushiti wetu. Okwe tu ladipika a ti: “Kala u neendunge, . . . hafifa omutima wange.” (Omayeletumbulo 27:11) Ngeenge hatu ningi omatokolo opandunge a kanghamena komafinamhango oo e li mOmbiibeli, ohatu hafifa Tate yetu womeulu omunahole. Omolwashike mbela? Omolwaashi oku na ko nasha nafye nokwa hala tu mone ouwa mokushikula ewiliko laye. (Jesaja 48:17, 18) Kape na vali oshinima shimwe sha fimana shi dule okulongela Omunamapangelo weshito alishe nokukala nonghalamwenyo oyo tai mu hafifa.

Ombiibeli otai tu hongo yo tu pange oukaume nOmushiti wetu. Oya ti: “Eheneni kuKalunga, opo nee Ye ta ehene kunye.” (Jakob 4:8) Omafimbo amwe otashi dulika tu kale twa limbililwa ngeenge otashi shiiva ngoo shili tu pange oukaume nOmushiti omunaenghono adishe. Ashike Ombiibeli oye tu shilipaleka kutya ngeenge otwa ‘kongo Kalunga ohatu ke mu mona,’ molwaashi “ina kala kokule nafye nande olumwe.” (Oilonga 17:27) Omayele opaMbiibeli oo kutya natu pange oukaume naKalunga otaa ti sha shi na sha nonakwiiwa yetu. Omonghedi ilipi mbela?

Diladila kwaashi: Kutya nee otu kendabale shi fike peni, kape na nande oumwe womufye ta dulu okuya onhapo omutondi munene, efyo. (1 Ovakorinto 15:26) Ashike, Kalunga ota kala ko fiyo alushe. Ke na efiku a fye, nokwa hala yo ookaume kaye va kale nomwenyo fiyo alushe. Ombiibeli oya popya kutya Jehova okwa hala ovo tave mu kongo va “kale nomwenyo fiyo alushe.” — Epsalme 22:26.

Ongahelipi to dulu okupanga oukaume tau kalelele naKalunga? Twikila okulihonga kombinga yaye okupitila mEendjovo daye, Ombiibeli. (Johannes 17:3; 2 Timoteus 3:16) Pula ekwafo kuye u ude ko Omishangwa. Ombiibeli oye tu shilipaleka kutya ngeenge otwa twikile ‘okwiindila ounongo Kalunga,’ ote ke u tu pa. * (Jakob 1:5) Kendabala okutula moilonga osho to lihongo, nokweefa Eendjovo daKalunga di kale “olamba yeemhadi” doye “nouyelele mondjila” yoye, paife nofiyo alushe. — Epsalme 119:105.