XINGANEKA kuila eie ua mu kuenda mua vundu. Né muene o dikumbi dia boba kiá thembu, maji ki uala ni uôma, mukonda eie ua mu kuenda ni kandeia kambote bhu maku. Kioso ki u muikina bhoxi u tena kumona kiambote o ima ia kala kupholo. Kioso ki u muikina dingi dikanga u tena kumona kiambote o dikanga dioso di ua-nda kuenda.

O Bibidia ia difuangana ue ni kandeia kaka. Kala ki tua mono kiá mu milongi kudima o Mak’â Nzambi, a tena ku tu kuatekesa kudibhana ni maka ku muenhu uetu, kala o ibhidi i tuene mu dibhana na-iu ku mundu iú uaiibha. Maji o Bibidia i tu kuatekesa dingi mu maukexilu a mukuá. Iene i tu bhana ue kidielelu kia lungu ni hádia, i tu kuatekesa kumona ni kukaiela o njila i tu bhekela o kutululuka ni kuzediua kua kidi. (Jisálamu 119:105) Kiebhi ki i bhanga kiki?

Tu mone maukexilu aiiadi a londekesa kuila o Bibidia i tu bhana kidielelu kia tokala kia lungu ni hádia: 1 I tu kuatekesa kukala ni kidielelu ku muenhu, ni 2 i tu longa kiebhi ki tu tena kukala ni ukamba u nangenena ni Mubhangi uetu.

O Bibidia i tu bhana itendelesu ia tokala i tu kuatekesa kudibhana ni ibhidi. Maji o Bibidia ki divulu ngó phala ku tu kuatekesa. Mu veji dia ku tu suínisa ngó ku tala ku ibhindamu ietu, o Bibidia i tu longa kudimona kala tu mbandu ia foto ia dikota. Kiene ngó ki tua-nda tena kuzediua mu kidi.

Xinganeka o kitendelesu kiki kia Bibidia: “O kubhana kota mu kuzediuisa, o kutambula ndenge.” (Ikalakalu 20:35) U tena kuxinganeka o kizuua ki ua kuatekesa muthu ua bhindamene kima? Nange uevu kiambote kamba dié ua ku kundu o maka a kexile mu bhita nau ku muenhu? O kuila ki ua divu kiambote mu kukuatekesa muthu kubhita kiambote o kizuua?

Tu divua kiambote kioso ki tu kuatekesa muthu sé kukingila ku tu bhana kima. Sai musoneki uambe: “Ki bhonza kiavulu muthu kubhana kima sé kukingila kutambula kima kia beta-o-kota, kifua kubhana kima sé  kuxinganeka kutambula kisakidilu.” Maji, kioso ki tu dibhakula phala kukuatekesa muthu—benge-benge ió kala ni kia ku tu vutuila—tu katula mbote. Mu kidi, tu bhanga mbandu ia foto muala athu avulu. Kioso ki tu kuatekesa muthu, tua mu kalakala kumoxi ni Mubhangi uetu. Muene u mona o mbote i tua bhange kala dikongo kua muene. (Jisabhu 19:17) Muene u bhana valolo ku ioso i tu bhanga phala kukuatekesa o athu a bhindama, muene anga u kanena kuvutuila o mbote ietu mu ku tu bhana o muenhu ua kalelaku mu palaízu mu ixi​—kiki kidielelu kia dikota!—Jisálamu 37:29; Luka 14:12-14. *

Kia beta-o-kota, o Bibidia i tu longa kuila, tu tena kusanga o kuzediua kua kidi, se tu bheza o Nzambi ia kidi, Jihova. O Mak’â mê a tu tendelesa ku mu bhana o kijingu, ni ku mu belesela ni muxima uetu uoso. (Ndongixi 12:13; Dijingunuinu 4:11) Se tu bhanga kiki, tua-nda bhanga o kima kia beta-o-kota: O kusangulukisa o muxima ua Mubhangi uetu. Mu kiki, muene u tu tangela uixi: “Dimuka . . . u tanese o muxima uami.” (Jisabhu 27:11) Mu kiki, xinganeka—kioso ki tu sola kima ni kikuatekesu kia itumu ia Bibidia, tu sangulukisa o muxima ua Tat’etu ia kazola. Mukonda diahi? Mukonda muene ua tu zolo, iu ua mesena kuila, tu katula mbote mu kubelesela o itendelesu iê. (Izaia 48:17, 18) O kuila sai dingi kima kia soko ni ujitu u tuala nau ua kubheza o Ngana ia ngongo ioso ni kukala ni ukexilu u sangulukisa o muxima uê?

O Bibidia i tu longa ue kukala ni ukamba uambote ni Mubhangi uetu. Iene iamba: “Zukamenu kua Nzambi, muène u mi zukama enu.” (Tiiaku 4:8) Nange tu kala ni phata, se tu tena muene kukala dikamba dia Muteni-ia-ioso, ni Mubhangi ua ima ioso. Maji o Bibidia i tu tangela kuila, se tu ‘sota Nzambi’ tua-nda “di bonga-nê” mukonda “Muène kana muthu ua mu kala dikanga.” (Ikalakalu 17:27) O kitendelesu kia Bibidia kia lungu ni kukala dikamba dia Nzambi, ki tu bhangesa kuxikina kuila, ku hádia tua-nda tena kuzediua ku muenhu. Mu ukexilu uebhi?

Xinganeka kiambote: Né muene se tu bhanga ioso, sé-ku muthu mudietu u tena kulenga o nguma ietu isukidila-ku—o kalunga. (1 Kolindo 15:26) Maji Nzambi kene ni dizubhilu. Muene nuka ua-nda fua, mukonda dia kiki, ua mesena kuila, o makamba mê a kala ua ku muenhu katé ku hádia ni hádia. O Bibidia i jimbulula kiambote o kima kia mesena Jihova phala o makamba mê, iene iamba: “O mixima ienu i di sanze katé ku hadia!”—Jisálamu 22:26.

Kiebhi ki u tena kukala ni ukamba ua kalelaku ni Nzambi? Suluka mu ku di longa ia lungu ni muene, bhu kaxi ka Bibidia. (Nzuá 17:3; 2 Timote 3:16) Sota o kikuatekesu kia Nzambi phala kutendela kiambote o milongi ia Bibidia. O Bibidia i tu longa kuila, se tu bhinga unjimu ‘kua Nzambi,’ muene ua-nda tu bhana. * (Tiiaku 1:5) Sota ue ku kumbidila o milongi i u dilonga. Ehela o Mak’â Nzambi kukala “kandeia ka inama [ié], ni “muanga u [ku], muikina mu njila.”—Jisálamu 119:105.