လံာ်စီဆှံ ဘၣ်ထွဲလိာ်သးဒီး နတၢ်အိၣ်မူခါဆူညါ
ဆိကမိၣ်ကွၢ် နလဲၤတၢ်လၢမုၢ်နၤခီ ဘၣ်ဆၣ် နတသူၣ်ကိၢ်သးဂီၤတၢ်ဘၣ်. မ့ၢ်လၢ နဟးစိာ်ဒးမံအဃိန့ၣ်လီၤ. ဖဲနလ့လီၤဒးမံ လၢနခီၣ်ထံးအခါ နထံၣ်တၢ်အိၣ်လၢ နမဲာ်ညါဂ့ၤဂ့ၤလီၤ. ဘၣ်ဆၣ် ဖဲနလ့ဃီၤဒးမံ ဆူနမဲာ်ညါအခါ မ့ၣ်အူအတၢ်ကပီၤန့ၣ် လဲၤကပီၤဝဲဖးယံၤအဃိ နထံၣ်စိတၢ်သ့ဖးယံၤန့ၣ်လီၤ.
ဒ်န့ၣ်အသိး လံာ်စီဆှံန့ၣ် လီၤဂာ်ဒ်ဒးမံအသိးလီၤ. ဖဲပဆိကမိၣ်ကွၢ်က့ၤ တၢ်ဂ့ၢ်လၢထးအခါ ကစၢ်ယွၤအကလုၢ်ကထါန့ၣ် မၤစၢၤပှၤဒ်သိး ပမၤဘၣ်ထီၣ်က့ၤ ပတၢ်ကီတၢ်ခဲလၢ အချ့ကသ့အဂီၢ်လီၤ. တကးဒံးဘၣ် လံာ်စီဆှံန့ၣ် ဒုးသ့ၣ်ညါပှၤဘၣ်ဃးဒီး တၢ်အိၣ်မူခါဆူညါ ဒီးဒုးထံၣ်ပှၤကျဲလၢ ကဆှၢပှၤဆူတၢ်မူလီၤထူလီၤယိာ် လၢအပှဲၤဒီးတၢ်မုာ်တၢ်ခုၣ်န့ၣ်လီၤ. (စံးထီၣ်ပတြၢၤ ၁၁၉:၁၀၅) လၢကျဲဒ်လဲၣ်.
ဒ်သိးပကအိၣ်ဒီး တၢ်မုၢ်လၢ်လၢ ခါဆူညါအဂီၢ် လံာ်စီဆှံမၤစၢၤပှၤသ့လၢ ကျဲခံဘိလီၤ. ၁ လံာ်စီဆှံမၤစၢၤပှၤ ဒ်သိးပတၢ်အိၣ်မူ ကပှဲၤဒီးအခီပညီ ဒီး ၂ လံာ်စီဆှံမၤစၢၤပှၤဒ်သိး ပကအိၣ်ဒီးတၢ်ရ့လိာ်သးဒီး ပတၢ်ဘၣ်တ့ကစၢ်န့ၣ်လီၤ.
၁ တၢ်အိၣ်မူလၢ အပှဲၤဒီးအခီပညီ
ဒ်သိးပလဲၤခီဖျိ တၢ်ကီတၢ်ခဲကန့ၢ်အဂီၢ် လံာ်စီဆှံအတၢ်ဟံးစုနဲၣ်ကျဲတဖၣ် မၤစၢၤပှၤသ့ဝဲလီၤ. တကးဒံးဘၣ် လၢပကသးစၢၢ်ဆၢ ပနီၢ်ကစၢ်တၢ်ဘၣ်ယိၣ်အလီၢ် လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပကသးစၢၢ်ဆၢ တၢ်လၢအရ့ဒိၣ်တဖၣ်န့ၣ်လီၤ. ပမ့ၢ်မၤဒ်န့ၣ်န့ၣ် ပတၢ်အိၣ်မူကပှဲၤဒီး အခီပညီလီၤ.
ဆိကမိၣ်ကွၢ် လံာ်စီဆှံအတၢ်ဟံးစုနဲၣ်ကျဲတခါ လၢအတဲဝဲလၢ– “ဟ့ၣ်တၢ်န့ၣ်ဘၣ် တၢ်ဆိၣ်ဂ့ၤအါန့ၢ်ဒိးန့ၢ် တၢ်တက့ၢ်လီၤ.” (မၤတၢ် ၂၀:၃၅) အဒိ ဖဲနမၤစၢၤဘၣ် ပှၤဂၤလၢ လိၣ်ဘၣ်တၢ်မၤစၢၤ လၢနီၢ်ခိတကပၤ မ့တမ့ၢ် ဖဲနလဲၤမၤမုာ်ထီၣ်က့ၤ ပှၤဂၤအသးခီဖျိ နလဲၤတဲသကိးတၢ်ဒီးအီၤ ဒီးဒိကနၣ်အီၤအခါန့ၣ် နတူၢ်ဘၣ်ဒ်လဲၣ်. ဖဲနမၤစၢၤဘၣ်အဝဲသ့ၣ်အခါ နဘၣ်ဆိၣ်ဂ့ၤ ခီဖျိနတူၢ်ဘၣ်တၢ်သးခု ဒ်လံာ်စီဆှံတဆၢအံၤတဲဝဲအသိး တမ့ၢ်ဘၣ်ဧါ.
ပမ့ၢ်သးအိၣ်ဟ့ၣ်တၢ် ဒီးပမ့ၢ်တမုၢ်လၢ်တၢ်လၢ ပကဒိးန့ၢ်ဘၣ်က့ၤတၢ်နီတမံၤဘၣ်န့ၣ် ပကပှဲၤဒီးတၢ်သးခုနီၢ်နီၢ်န့ၣ်လီၤ. ပှၤကွဲးလံာ်ဖိတဂၤ ကွဲးဝဲလၢ– “ဖဲနမၤစၢၤပှၤဂၤ လၢတၢ်သးအိၣ်နီၢ်နီၢ် ဒီးနမ့ၢ်တမုၢ်လၢ်လၢ နကဒိးန့ၢ်ဘၣ်က့ၤ တၢ်လၢပှၤဂၤအအိၣ်နီတမံၤဘၣ်န့ၣ် နကဒိးန့ၢ်က့ၤတၢ် အါန့ၢ်ဒံးနဟ့ၣ်ပှၤဂၤန့ၣ်လီၤ.” ဘၣ်ဆၣ် ဖဲပမၤစၢၤဘၣ်ပှၤတဂၤဂၤလၢ အဟ့ၣ်ဆၢက့ၤပှၤ တန့ၢ်နီတမံၤဘၣ်အခါ နီၢ်နီၢ်န့ၣ် ပကဒိးန့ၢ်ဘၣ်က့ၤတၢ်တမံၤမံၤလီၤ. ဘၣ်မနုၤအဃိ ပတဲဒ်န့ၣ်သ့လဲၣ်. ဖဲန့ၣ်အဆၢကတီၢ် ပတဆိကမိၣ်ထဲ ပနီၢ်ကစၢ်လၢၤဘၣ်, ဒီးလီၤဂာ်ဒ် ပမၤသကိးတၢ်ဒီး တၢ်ဘၣ်တ့ကစၢ်န့ၣ်လီၤ. ခီဖျိလၢ ပမၤစၢၤပှၤဂၤဒ်အံၤအဃိ လီၤဂာ်ဒ်သိး ပဒုးလိၢ်တၢ်လၢ ကစၢ်ယွၤအအိၣ်လီၤ. (ကတိၤဒိ ၁၉:၁၇) ကစၢ်ယွၤပာ်လုၢ်ပာ်ပှ့ၤဝဲ ပှၤလၢအမၤစၢၤဝဲ ပှၤလၢလိၣ်ဘၣ်တၢ်မၤစၢၤတဖၣ်န့ၣ်လီၤ. ဒီးကစၢ်ယွၤအၢၣ်လီၤဝဲလၢ ကဟ့ၣ်ပှၤခိၣ်ဖးလၢအမ့ၢ်ဝဲ ပကအိၣ်မူဘၣ်လီၤထူလီၤယိာ်လၢ ဟီၣ်ခိၣ်ပၤရဒံစူးအပူၤန့ၣ်လီၤ. အဝဲအံၤမ့ၢ်ဝဲတၢ်မုၢ်လၢ်လၢ အဂ့ၤကတၢၢ်လၢပဂီၢ်လီၤ.—စံးထီၣ်ပတြၢၤ ၃၇:၂၉; လူၤကၣ် ၁၄:၁၂-၁၄. *
လံာ်စီဆှံပာ်ဖျါန့ၢ်ပှၤ လီၤတံၢ်လီၤဆဲးလၢ ပမ့ၢ်ဘူၣ်ထီၣ်ဘါထီၣ်ယဟိဝၤယွၤန့ၣ် ပတၢ်အိၣ်မူကပှဲၤဒီး အခီပညီန့ၣ်လီၤ. တကးဒံးဘၣ် လံာ်စီဆှံတဲစ့ၢ်ကီးလၢ ပကဘၣ်ဟ့ၣ်ယဟိဝၤယွၤလၢ တၢ်လၤကပီၤ, တၢ်ယူးတၢ်ယီၣ် ဒီးပကဘၣ်ဒိကနၣ်အကလုၢ်န့ၣ်လီၤ. (စံၣ်တဲၤတဲလီၤတၢ် ၁၂:၁၃; လီၣ်ဖျါ ၄:၁၁) ပမ့ၢ်မၤဒ်န့ၣ်န့ၣ် မ့ၢ်ဒၣ်ပမၤသးခု ယဟိဝၤယွၤအသးလီၤ. လၢတၢ်န့ၣ်အဃိ အဝဲသဆၣ်ထီၣ်ပှၤလၢ ပကဘၣ် ‘ကူၣ်တၢ်သ့, ဒီးမၤခုအသး’ န့ၣ်လီၤ. (ကတိၤဒိ ၂၇:၁၁) ဆိကမိၣ်ကွၢ်တက့ၢ်, လၢပတၢ်အိၣ်မူအပူၤ ပမ့ၢ်မၤထွဲ လံာ်စီဆှံတၢ်ဟံးစုနဲၣ်ကျဲန့ၣ် မ့ၢ်ပမၤသးခုပပၢ်အိၣ်လၢ မူခိၣ်အသးလီၤ. ဘၣ်မနုၤအဃိလဲၣ်. ခီဖျိလၢကစၢ်ယွၤအဲၣ်ပှၤ ဒီးအဝဲသ့ၣ်ညါဝဲလၢ ပမ့ၢ်လူၤပိာ်ထွဲအတၢ်ဟံးစုနဲၣ်ကျဲန့ၣ် ကကဲဘျုးလၢပဂီၢ်အဃိလီၤ (ယၡါယၤ ၄၈:၁၇, ၁၈) လၢတၢ်န့ၣ်အဃိ ပမ့ၢ်ဘူၣ်ထီၣ်ဘါထီၣ် ယဟိဝၤယွၤလၢအမ့ၢ် တၢ်ပၢကစၢ်အဒိၣ်ကတၢၢ် ဒီးမၤသးခုအသးန့ၣ် ပတၢ်အိၣ်မူကပှဲၤဒီးအခီပညီန့ၣ်လီၤ
၂ ကဲထီၣ်တၢ်ဘၣ်တ့ကစၢ် အတံၤသကိး
လံာ်စီဆှံသိၣ်လိစ့ၢ်ကီးပှၤလၢ ပကဘၣ်ဂုာ်ကျဲးစၢးကဲထီၣ် တၢ်ဘၣ်တ့ကစၢ် အတံၤသကိးန့ၣ်လီၤ. လံာ်စီဆှံတဲဝဲလၢ “သုးဘူးသုသးဆူယွၤအအိၣ်တက့ၢ်, ဒီးကသုးဘူးအသး ဆူသုအိၣ်လီၤ.” (ယၤကိာ် ၄:၈) ဘၣ်ဆၣ် တဘျီတခီၣ်ပကဆိကမိၣ်ဘၣ်လၢ ပကဲထီၣ်သ့တၢ်လၢာ်ကစၢ် အတံၤသကိးကသ့ဧါ. လံာ်စီဆှံအၢၣ်လီၤပှၤလၢ ပမ့ၢ် “ဃုယွၤ” န့ၣ်ပက “ထံၣ်န့ၢ်အီၤ” မ့ၢ်လၢအ “အိၣ်တယံၤဘၣ်ဒီးပှၤနီတဂၤဘၣ်.” (မၤတၢ် ၁၇:၂၇) လံာ်စီဆှံ အတၢ်ဟ့ၣ်ကူၣ်လၢ ပကဘၣ်ဂုာ်ကျဲးစၢးကဲထီၣ် ကစၢ်ယွၤအတံၤသကိးန့ၣ် မ့ၢ်ဝဲတၢ်ဟံးစုနဲၣ်ကျဲလၢအဂ့ၤကတၢၢ် လၢပတၢ်အိၣ်မူခါဆူညါအဂီၢ်လီၤ. ဘၣ်မနုၤအဃိ ပတဲဒ်န့ၣ်သ့ဝဲလဲၣ်.
ဆိကမိၣ်ကွၢ်– ဒုၣ်ဒါလၢအမ့ၢ်တၢ်သံန့ၣ် ပဃ့ၢ်ဟးဆှဲးအီၤ တန့ၢ်နီတဂၤဘၣ်. (၁ ကရံၣ်သူး ၁၅:၂၆) ဘၣ်ဆၣ်သနာ်က့ ကစၢ်ယွၤမ့ၢ်ပှၤလၢအမူဝဲ လီၤထူလီၤယိာ်ဒီး အဝဲအဲၣ်ဒိးဝဲလၢ အတံၤသကိးတဖၣ် ကမူဘၣ်ဝဲ လီၤထူလီၤယိာ်စ့ၢ်ကီးလီၤ. အဃိ လံာ်စီဆှံပာ်ဖျါန့ၢ်ပှၤလၢ ယဟိဝၤယွၤအဲၣ်ဒိးလၢ ပကအိၣ်မူဘၣ် “လီၤထူလီၤယိာ်လီၤ.”—စံးထီၣ်ပတြၢၤ ၂၂:၂၆.
ဒ်သိးပတၢ်ရ့လိာ်သးဒီး ကစၢ်ယွၤကဂၢၢ်ကျၢၤဝဲ ထီဘိအဂီၢ် ပမၤကသ့ဒ်လဲၣ်. ပမၤအီၤသ့ခီဖျိလၢ ပဆဲးမၤလိအါထီၣ်ကစၢ်ယွၤအဂ့ၢ်လၢ လံာ်စီဆှံအပူၤန့ၣ်လီၤ. (ယိၤဟၣ် ၁၇:၃; ၂ တံၤမသ့း ၃:၁၆) ဒ်သိးပကနၢ်ပၢၢ်တၢ်ဂ့ၢ်လၢ ပမၤလိလၢလံာ်စီဆှံပူၤအဂီၢ် ပဘၣ်ဃ့ကစၢ်ယွၤအတၢ်မၤစၢၤလီၤ. လံာ်စီဆှံတဲဝဲလၢ ပမ့ၢ်လီကီတၢ်ကူၣ်သ့န့ၣ် ပကဘၣ် “ဃ့လၢယွၤ” အအိၣ်ထီဘိဒီး အဝဲကဟ့ၣ်လီၤပှၤလီၤ. * (ယၤကိာ် ၁:၅) ဒီးအလီၢ်ခံကတၢၢ်တမံၤန့ၣ် ပကဘၣ်ဂုာ်ကျဲးစၢးမၤထွဲတၢ်လၢ ပမၤလိတဖၣ်န့ၣ်လီၤ. ပမ့ၢ်မၤဒ်န့ၣ်န့ၣ် မ့ၢ်ဒၣ်ပပျဲယွၤအကလုၢ်ကထါ ဒ်သိးကကဲထီၣ် ‘မ့ၣ်အူဒၢတဖျၢၣ်လၢပခီၣ်အဂီၢ်, ဒီးတၢ်ကပီၤတဖျၢၣ်လၢ ပကျဲအဂီၢ်’ န့ၣ်လီၤ.—စံးထီၣ်ပတြၢၤ ၁၁၉:၁၀၅.
^ လံာ်အဆၢ. 8 နမ့ၢ်အဲၣ်ဒိးသ့ၣ်ညါအါထီၣ် ကစၢ်ယွၤအတၢ်စံးပာ် လၢအဘၣ်ဃးဒီး ပကအိၣ်မူဘၣ်လီၤထူလီၤယိာ်လၢ ဟီၣ်ခိၣ်ပၤရဒံစူးအပူၤန့ၣ် ဝံသးစူၤကွၢ်လံာ်လၢအမ့ၢ် လံာ်စီဆှံ ကသိၣ်လိပှၤ တၢ်ဂ့ၢ်မနုၤလဲၣ် တၢ်မၤလိ ၃ လၢယဟိဝၤပှၤအုၣ်အသး ထုးထီၣ်ဝဲန့ၣ်တက့ၢ်.
^ လံာ်အဆၢ. 13 ယဟိဝၤပှၤအုၣ်သးတဖၣ် မၤလိလံာ်စီဆှံဒီးပှၤဂၤ ဒ်သိးအဝဲသ့ၣ်ကနၢ်ပၢၢ် အါထီၣ်လံာ်စီဆှံအဂ့ၢ် ဒီးတလိၣ်နဟ့ၣ်အပှ့ၤဘၣ်. ပမၤလိလံာ်စီဆှံဒီးပှၤဂၤဒ်လဲၣ်န့ၣ် ဝံသးစူၤကွၢ်တၢ်ဂီၤမူလၢအမ့ၢ် တၢ်မၤလိလံာ်စီဆှံန့ၣ် ပှၤမၤအီၤဒ်လဲၣ် န့ၣ်တက့ၢ်. တၢ်ဂီၤမူအံၤ နဃုထံၣ်န့ၢ်အီၤသ့ဖဲ jw.org/ksw န့ၣ်လီၤ. စံၢ်လီၤကွၢ် တၢ်ဂီၤမူအခိၣ်တီလၢ တၢ်ဃုကွၢ်အလီၢ်တက့ၢ်.
ကစၢ်ယွၤမ့ၢ်ပှၤလၢအမူဝဲ လီၤထူလီၤယိာ်ဒီးအဝဲအဲၣ်ဒိးဝဲလၢ အတံၤသကိးတဖၣ် ကအိၣ်မူဘၣ်ဝဲ လီၤထူလီၤယိာ်စ့ၢ်ကီး
တၢ်ဂ့ၤအဂၤလၢ နကဘၣ်သး
တၢးထီခိးတၢ်
လံာ်စီဆှံမၤဂ့ၤထီၣ် ယတၢ်အိၣ်မူ ကသ့ဒ်လဲၣ်
လံာ်လၢပျၢၤတဘ့ၣ်အံၤ အိၣ်ဒီးတၢ်ဟ့ၣ်ကူၣ်လၢ အကဲဘျုးလၢပဂီၢ်လီၤ.
တၢ်သံကွၢ်တဖၣ်လၢ အတၢ်စံးဆၢအိၣ်လၢ လံာ်စီဆှံပူၤ
ပတၢ်အိၣ်မူ ကပှဲၤဒီးတၢ်သးခုအဂီၢ် ပကဘၣ်မၤဒ်လဲၣ်
ဘၣ်ဃးဒီး ‘ပှၤဟီၣ်ခိၣ်ဖိ အတၢ်အိၣ်မူ အတၢ်ပညိၣ်န့ၣ် မ့ၢ်မနုၤလဲၣ်’ န့ၣ်မ့ၢ်နဆိကမိၣ်ဘၣ် တဘျီဘျီဧါ. ဖးကွၢ် လံာ်စီဆှံအတၢ်စံးဆၢ လၢဘၣ်ဃးဒီး တၢ်ဂ့ၢ်အံၤ.
