FWIKIJENU munakwenda mumwidima. Hela chakwila hanashimbuli kufuma hahumina itena, mukwakama wanyi nenu mukujimbelamu muloña muneluki nenu mudi natoochi. Chimwamunyika heseki mukumona yuma yejima yidihu. Nawa chimwamunyika hambidi, mukumona yuma yejima yidi munjila yidi hahalehi.

Munjila yoyimu, Bayibolu yidi neyi iyi toochi. Neyi chitwahanjeka muyibaaba yinafumihu, Izu daNzambi dinateli kutukwasha kuumika yuma yidi hambidi yetu, dikwila nawu kukala kutwamona muchihandilu chetu mukanu kaayi katama. Ilaña Bayibolu yinateli kutukwasha kubadika toochi. Yatukwashaña nikwiluka yuma chiyakekala kumbidi, kutukwasha kumona njila yikutulombola kumuzañalu wahaya nyaaka. (Masamu 119:105) Munjilanyi?

Tushinshikenu hanjila jiyedi mwatukwashilaña Bayibolu kwikala nakuchiñeja: 1 Yatukwashaña kwikala nachihandilu chachiwahi, ni 2 yatudizishaña chitunateli kwikala nawubwambu wawuwahi naNleñi yetu.

MuBayibolu mwekala kufumba kwakuwahi kwatukwashaña kumanisha kukala, nawa yabadika mukanda wudi wejima wakwashaña antu. Chatela yitulejeña nawu twakameña hayuma yatumwekenaña, Bayibolu yatukwashaña kuchiñeja. Nawa chumichi chatuleñelaña kwikala namuzañalu muchihandilu.

Chakutalilahu, toñojokenu hanichi chishina chamuBayibolu chahosha nawu: “Mukuhana mwekala muzañalu chikupu kubadika wekala mukutambwila.” (Yilwilu 20:35) Munakwanukahu mpinji yimwakwashili muntu muyuma yakumujimba? Hela mpinji yimwamukwashili kuhitila mukumutiyilila nakanañachima hampinji yayilejeleñayi kukala kwindi? Komana mwatiyaña wanyi kuwaha chimwakwashili muntu wamuchidiwu kulonda yekali namuzañalu?

Twekalaña namuzañalu neyi tuhana chakubula kukuhwelela netu akatufuntishila. Nsoneki wumu  wahosheli nindi: “Muntu kwila yahana chuma chakadi kutoñojoka nindi niyena akumwinka chuma nehi, chiña hohu neyi nahani nindi akabuli kumufuntishila.” Dichi, twakwashaña akwetu sweje-e antu abula yuma yakutufuntishila muloña tweluka netu akutukiswila. Twekalaña namuzañalu. Mwamweni, twazatilaña hamu naNleñi, welaña nindi neyi tutiyila muntu luwi dikwila nawu tunakumukongwesha. (Yishimu 19:17) Walemesha yuma yitwelilaña atuzweñi nawa watukana nindi wakatwinka wumi wahaya nyaaka muparadisa hamaseki, mwamweni iku hikuchiñeja kwakuwahi!—Masamu 37:29; Luka 14:12-14. *

Sweje-e dinu Bayibolu yatudizishaña nawu tunateli kwikala namuzañalu muchihandilu kuhitila mukudifukula kudi Nzambi walala, Yehova. Izu Dindi datukwashaña kumushimeka, kumulemesha nikumwovwahila. (Mukwakutañisha 12:13; Chimwekeshu 4:11) Neyi tukwila mwenimu tukwila chuma chalema nankashi: Tukumutiyisha Nleñi yetu kuwaha. Watuleja nindi: “Ikalaku mukwamaana, wutiyishaña muchima wami kuwaha.” (Yishimu 27:11) Toñojokenu hachumichi, neyi tufuukula chachiwahi kushindamena hayishina yamuBayibolu twazañaleshaña muchima waTata yetu wekala mwiwulu wukweti kukeña. Muloñadi? Muloña watwakamenaña nawa wakeñaña nindi tulondeleña nshimbi jindi. (Isaya 48:17, 18) Yumanyi yikutuzañalesha kubadika kudifukula kudi Mwanta wakuleña kwejima nikwila yuma yamuzañaleshaña?

Bayibolu yatudizishaña kukwata wubwambu naNleñi yetu. Nsona yahosha nawu: “Swinenu kwakwihi naNzambi, niyena wukuswina kwakwihi nanenu.” (Yakoba 4:8) Mpinji yikwawu twajinokaña neyi chakwila tunateli kukwata wubwambu naNleñi yetu wabadika. Ilaña Bayibolu yatulejaña nawu neyi ‘tukumukeñakeña Nzambi tukumuwana,’ muloña “yena hekala kwakulehi nanetu ejimaku.” (Yilwilu 17:27) Neyi tukulondela kufumba kwamuBayibolu kwakwikala amabwambu jaNzambi, twakekala nachihandilu chachiwahi. Munjilanyi?

Toñojokenu hachumichi: Hela chakwila tukuzata nañovu chamuchidinyi, kwosi wunateli kutemuka chilumbu chetu, kufwa. (1 Akorinda 15:26) Hela chochu, Nzambi wahaya nyaaka. Hamba kafwaku, nawa nakukeña amabwambu jindi niwena akashakameña haya nyaaka. Kuzatisha mazu apela nawa amawahi, Bayibolu yatulejaña nawu Yehova wakeñaña nindi antu amukeñakeñaña ekaleña namuzañalu chiyahosha nawu: “Muchima wenu wuhandi haya nyaka.”—Masamu 22:26.

Munateli kwikala ñahi nawubwambu wamuchidiwu wahaya nyaaka naNzambi? Twalekenuhu kudiza hadi yena kuhitila Mwizu dindi Bayibolu. (Yowanu 17:3; 2 Timotewu 3:16) Mulombenu yayikwashi kutiyishisha Nsona. Bayibolu yatukana nawu neyi tutwalekahu “kulomba kudi Nzambi” netu yatwinki maana, wukutwinka. * (Yakoba 1:5) Kuhiñahu, fwilenu kuzatisha yuma yimunakudiza, kwiteja Izu daNzambi dikali “inoñu dakunyendu [yenu]” nawa dikali “chejeji chamunjila [yenu],” chayinu mpinji nihaya nyaaka.—Masamu 119:105.