PAR ane ni iwuotho e mudho gotieno. Kata obedo ni piny oseimore, ok iluor nikech in gi toch ma rieny maber. Kimenyo piny, inyalo neno gik man machiegni gi kama iwuothee. To ka imenyo nyime tir to inyalo neno gik man mabor ahinya.

Muma bende inyalo pim gi toch ma kamano. Mana kaka waseneno e sula mokalo, Wach Nyasaye nyalo konyowa nyagore gi pek ma waromogo pile ka pile e ngimawa. To ok mano kende. Muma konyowa ng’eyo gik ma biro timore e kinde ma biro kendo okonyowa mondo waluw yo ma miyo wabedo gi mor kod kuwe mosiko. (Zaburi 119:105) E yo mane?

Wane ane yore ariyo ma Muma miyowago geno e wi kinde ma biro: 1 Omiyo ngimawa bedo maber, kod 2 opuonjowa kaka wanyalo mako osiep ma siko gi Jachuechwa.

Muma oting’o puonj ma nyalo konyowa nyagore gi chandruoge ma pile. Kata kamano, okonyo e yore mathoth moloyo mano. Muma konyowa ng’eyo wach moro maduong’ momako chuech duto kar keto pachwa mana kuom chandruoge momakowa. Ng’eyo wach maduong’no e ma nyalo miyo ngimawa obed maber.

Kuom ranyisi, ne ane puonj ma yudore e Muma ma wacho niya: “Chiwo kelo mor mogundho moloyo kawo.” (Tich Joote 20:35) Be inyalo paro kinde moro ma ne ikonyo ng’ato gi gige ringruok, kata kinde ma ne ichiko iti mos ka osiepni moro nyisi gik ma chande? Donge ne ibedo ma mor ka ne ikonyo ng’atno?

Wabedo ma mor sama wakonyo ng’ato ma ok  wagen ni obiro chulowa. Jal moro nondiko kama: “Onge ng’at ma nyalo chiwore konyo jomoko ma ok onwang’o ber mathoth, to ahinya ahinya ka ochiwore konyo ma ok ogen ni mondo ochule.” Kata kamano, sama wachiwore konyo jomoko, to ahinya ahinya joma onge nyalo mar chulowa, nitie gimoro ma wayudo. Wafwenyo ni nitie gik mang’eny motudore gi ngimawa moloyo mana chandruoge ma yudowa kod gik ma wachano timo. Watiyo kanyachiel gi Jachuech ma neno gik ma watimo ne jomoko kaka gowi ma wahole. (Ngeche 19:17) Omor ahinya gi gik ma watimo ne jochan kendo osingo ni obiro miyowa chudo maberie mogik ma en ngima ma nyaka chieng’ e paradiso e piny. Mano en geno ma jaber gadier!—Zaburi 37:29; Luka 14:12-14. *

Moloyo mago duto, Muma wacho ni ngimawa nyalo bedo maber gadier mana ka watiyo ne Jehova, ma en Nyasaye madier. Muma jiwowa ni onego wapake, wamiye luor, kendo waluw chikene. (Eklesiastes 12:13; Fweny 4:11) Sama watimo kamano, wamiyo Jehova bedo ma mor. Mano e momiyo Muma jiwowa kama: “Bedi mariek, kendo mi chunya mor.” (Ngeche 27:11) Parie ni sama watimo yiero mabeyo motenore kuom puonj manie Muma, mano miyo Wuonwa manie polo bedo ma mor sidang’! Nikech ang’o? Nikech odewwa ahinya kendo odwaro ni wabed gi ngima maber ka waluwo kaka otayowa. (Isaiah 48:17, 18) Kuom adier, be nitie gimachielo ma nyalo miyo ngimawa obed maber ma loyo tiyo ne Jaloch mar piny gi polo kendo timo gik ma miyo obedo ma mor?

Muma bende jiwowa ni mondo walos osiep gi Jachuechwa. Muma wacho niya: “Suduru machiegni gi Nyasaye to en bende nosud iru.” (Jakobo 4:8) Nitie kinde ma wanyalo bedo gi kiawa ka be wanyalo mako osiep gi Jachuech ma nyalo duto. Kata kamano, Muma singonwa ni ka ‘wadwaro Nyasaye,’ to wabiro yude nikech “ok obor gi ng’ato ka ng’ato kuomwa.” (Tich Joote 17:27) Ka wayie bedo osiepe Nyasaye kaka Muma jiwowa, mano biro konyowa nyaka e kinde ma biro. E yo mane?

Par ane wachni: Kata watem manade, ok wanyal pondo ne tho ma en jasikwa maduong’ie mogik. (1 Jo-Korintho 15:26) Nyasaye to siko nyaka chieng’. Ok obi tho kendo odwaro ni osiepene bende odag nyaka chieng’. Muma wacho gima Jehova dwaro ne joma gin osiepene kotiyo gi weche mabeyogi: “Chunyu obedi gi ngima nyaka chieng’.”—Zaburi 22:26.

Ere kaka inyalo loso osiep ma siko gi Nyasaye? Dhi nyime puonjori gik mathoth e wi Nyasaye ka itiyo gi Muma. (Johana 17:3; 2 Timotheo 3:16) Kwaye mondo okonyi winjo tiend gik misomo e Muma. Muma singonwa ni ka ‘wasiko wakwayo Nyasaye’ mondo omiwa rieko, obiro miyowa riekono. * (Jakobo 1:5) Mogik, tem matek mondo iluw gik ma ipuonjori mondo Wach Nyasaye obedni kaka ‘taya mar tiendi’ kod ‘ler mar yori,’ kendo isik kitimo kamano nyaka chieng’.—Zaburi 119:105.