JEN ba bwe elukwõn boñ im kwõj etetal ilo juon ial̦ emarok. Meñe em̦õj kadede an tulo̦k al̦ im emarok ak kwõjjab lukkuun inepata bwe kwõnaaj jebwãbwe kõnke ewõr juon am̦ kein romrom elukkuun kajoor. Kwõl̦ak romrom lal̦l̦o̦k, elukkuun alikkar am̦ loe ta ko rej pãd im̦aan ial̦ eo am̦. Im ke kwõj kameram m̦aanl̦o̦k, joñan an kajoor meram in, kwõj loe men ko rettol̦o̦k ilo am̦ etetal ilo ial̦ eo.

Ilo kõkkar, Baibõl̦ ej ãinwõt juon kein romrom ñan kõj. Ãinwõt ad kar etale ilo katak ko im̦aan, Naanin Anij emaroñ jipañ kõj ñan jel̦ã kilen kõm̦adm̦õdi apañ ko jej iiooni kiiõ jãn raan ñan raan ilo lal̦ in, ãinwõt an juon kein romrom jipañ eok ñan loe ta ko rej pãd im̦aam. Bõtab ebar wõr men ko jet Baibõl̦ ej jipañ kõj kaki. Ej kameraml̦o̦k ak kwal̦o̦k kõn wãween naaj mour ilju im jekl̦aj, im ej bareinwõt kõm̦m̦an bwe jen lo im l̦oore ial̦ eo ej tõll̦o̦k kõj ñan juon mour elem̦õn̦õn̦õ im ej ñan indeeo. (Sam 119:105, UBS) Ewi wãween?

Jen etale ruo wãween ko Baibõl̦ ej letok juon ad kõjatdikdik kõn ilju im jekl̦aj: 1 Ej jipañ kõj ñan kile bwe ewõr tokjãn ad mour im 2 ej katakin kõj kõn wãween ad maroñ ejaake juon jem̦jerã epaak ippãn Rũkõm̦anm̦an eo ad ñan indeeo.

Meñe Baibõl̦ eo ej letok naanin tõl ko rem̦m̦an jemaroñ lõki kõn wãween ad kõm̦adm̦õdi apañ ko jej iiooni, ak ejjab baj juon bok ñan jipañ wõt kõj. Baibõl̦ eo ej bar katakin kõj bwe jen l̦õmn̦ak kõn ankilaan Anij, juon men el̦apl̦o̦k an aorõk jãn ad l̦õmn̦ak kõn kõj make im apañ ko jej iiooni. Eñin ej wãween eo wõt jemaroñ m̦õn̦õn̦õ im kile bwe ewõr tokjãn ad mour.

Ñan waanjoñak, l̦õmn̦ak kõn naanin kakapilõklõk in ilo Baibõl̦ me ej ba: “El̦apl̦o̦k m̦õn̦õn̦õ ilo lel̦o̦k jãn bõk.” (Jerbal 20:35, UBS) Kwõmaroñ ke l̦õmn̦ak kõn juon iien me kwaar jipañ juon eo ear pãd ilo aikuj? Ak bõlen ke kwaar m̦õn̦õn̦õ in lel̦o̦k iien ko am̦ ñan roñjake an juon m̦õttam̦ kwal̦o̦k kõn eñjake ko an? Kwõj ke kile am̦ m̦õn̦õn̦õ kõn am̦ kar jipañ juon armej bwe en em̦m̦an an mour?

Jej lukkuun m̦õn̦õn̦õ ñe jej lel̦o̦k ñan jipañ ro jet im jab kõtmãne bwe ren bar karo̦o̦ltok jouj eo ad. Juon rijeje ear ba: “Ñe kwõj lel̦o̦k ñan jipañ ro jet im jab kõtmãne bwe ren bar karo̦o̦lwaj jouj eo am̦, ilo m̦ool  enaaj l̦apl̦o̦k jeraam̦m̦an ko kwõj bũki jãn men ko kwõj lil̦o̦k.” Em̦ool bwe ñe jej m̦õn̦õn̦õ in lel̦o̦k ñan jipañ ro jet, el̦aptata ñan ro me rejjab maroñ karo̦o̦ltok jouj eo ad, jej lo juon jeraam̦m̦an el̦ap. Jej kaalikkar bwe el̦apl̦o̦k ad l̦õmn̦ak kõn ankilaan Anij, im bwe jej jerbal ippãn Rũkõm̦anm̦an eo ad, eo im ej watõk bwe ej m̦uri ippãd ñe jej kwal̦o̦k jouj ñan ro jet. (Jabõn Kõnnaan 19:17, UBS) El̦ap an Jeova kaorõk men ko jej kõm̦m̦ani ñan ro rettã, im ej kallim̦ur ñan kõj bwe enaaj karo̦o̦ltok jouj eo ad ilo an naaj letok ñan kõj mour indeeo ilo pedetaij eo ijin ioon lal̦!​—Sam 37:29; Luk 14:12-14, UBS. * (Lale kõmel̦el̦e eo itulal̦.)

El̦aptata, Baibõl̦ ej katakin kõj bwe enaaj l̦apl̦o̦k ad m̦õn̦õn̦õ im lo tokjãn ad mour kõn ad kabuñ ñan Anij eo em̦ool, Jeova. Naan ko an rej rõjañ kõj bwe jen lel̦o̦k men ko ej tõllo̦kũn an bũki ãinwõt aiboojoj, nõbar, im ad pokake e. (Ekklisiastis 12:13, UBS; Revelesõn 4:11) Ñe jej kõm̦m̦ane men in, jej kajejjet juon men elukkuun aorõk im ej jelõt Rũkõm̦anm̦an eo ad ilo juon wãween em̦m̦an. Ej rõjañ kõj im ba: “Kwõn mãlõtlõt im kam̦õn̦õn̦õik bũruõ.” (Jabõn Kõnnaan 27:11) L̦õmn̦ak m̦õk kõn men in. El̦aññe jej kwal̦o̦k ad mãlõtlõt ilo ad kõm̦m̦ani pepe ko ekkar ñan naanin kakapilõklõk ko ilo Baibõl̦, jej kam̦õn̦õn̦õik bũruon Jemãd ilañ. Etke? Kõnke el̦ap an kea kõn kõj im ekõn̦aan bwe jen lo tokjãn ko rem̦m̦an ilo ad l̦oori naanin tõl ko an. (Aiseia 48:17, 18) Innem alikkar bwe ejjel̦o̦k bar juon wãween enaaj kõm̦m̦an bwe jen m̦õn̦õn̦õ, im lo tokjãn ad mour jãn ad kabuñ ñan Eo ej Irooj Bõtata im mour ilo wãween eo ej kabuñbũruon.

Baibõl̦ ej bar katakin kõj bwe jen ejaake juon jem̦jerã ippãn Rũkõm̦anm̦an eo ad. Baibõl̦ ej ba: “Kom̦win ruwaakl̦o̦k ñan Anij, im Enaaj ruwaakwaj ñan kom̦.” (Jemes 4:8) Jet iien jemaroñ pere el̦aññe ewõr ad maroñ ñan jem̦jerãik Rũkõm̦anm̦an eo ad me eutiejtata. Bõtab Baibõl̦ eo ej kaalikkar ñan kõj bwe ñe jej “pukot Anij,” jenaaj “lo E” kõnke “Ejjab ettol̦o̦k jãn kõj otemjej.” (Jerbal 17:27) Naanin kakapilõklõk ko ilo Baibõl̦ ñan ejaake juon jem̦jerã ippãn Anij ej letok ñan kõj juon ilju im jekl̦aj em̦m̦an. Etke jej ba men in?

L̦õmn̦ak m̦õk kõn men in: Jejjab maroñ anjo̦ ioon rũkõjdat eo ad el̦ap, mej. (1 Korint 15:26) Ijoke, Anij ej pãd ñan indeeo. Eban mej im ekõn̦aan bwe ro jeran ren bar mour ñan indeeo. Baibõl̦ ej kwal̦o̦k bwe Jeova ekõn̦aan bwe ro rej kappukot e ren m̦õn̦õn̦õ im “mour ñan indeeo.”​—Sam 22:26.

Ewi wãween am̦ maroñ ejaake juon jem̦jerã ippãn Anij ñan indeeo? Eokwe, kwõn wõnm̦aanl̦o̦k wõt im katak kõn E ilo am̦ riiti Naan ko an ilo Baibõl̦. (Jon 17:3; 2 Timote 3:16) Kajjitõk ippãn bwe en jipañ eok ñan mel̦el̦e kõn kobban Baibõl̦ eo. Baibõl̦ ej kallim̦uri kõj bwe el̦aññe jej wõnm̦aanl̦o̦k im ‘kajjitõk ippãn Anij’ kõn mãlõtlõt, enaaj letok ñan kõj. * (Lale kõmel̦el̦e eo itulal̦.) (Jemes 1:5, UBS) Ãliktata, kate eok ñan l̦oori men ko kwõj katak kaki, im kõtl̦o̦k bwe Naanin Anij en ãinwõt ‘juon l̦aam̦ eo ej tõl eok,’ im ‘juon meram ñan am̦ ial̦’ kiiõ im ñan indeeo.​—Sam 119:105, UBS.