XIMOILJUI tinejnentia ipan se ojtli kampa tlauel tsintlayoua. Maske ya tlayoua, ta amo timajmaui pampa tijuika se foco tlen tlauel kuali tlauia. Kema titlauia tlalchi, kuali tikita kanke timoketsas, uan kema uejka titlauia, nopa tlauili kitlauilia nochi moojui.

Uelis tikijtosej nopa Biblia eli sanse kej nopa foco. Kej tikitstokej ipan nopa sekinok tlamachtili, toTeotsij iTlajtol techpaleuia ipan nochi kuesoli tlen mojmostla tikixnamiktiauij. Uan nojkia kichiua seyok tlamantli tlen tlauel ipati: kejuak uejka tlauia uan technextilia kenijkatsa tiitstosej teipa, pampa kitlauilia toojui uan techpaleuia ma timonejnemiltikaj kej kinamiki (Salmo 119:105). ¿Kenijkatsa kichiua?

Ma tikitakaj ome tlamantli kampa Biblia techpaleuia ipan tonemilis: 1 Kichiua kuali ma tijyolmatikaj ipan tonemilis uan 2 technextilia kenijkatsa uelis kuali timouampojchiuasej iuaya toTeotsij.

Maske Biblia kuali techtlajtolmaka uan techpaleuia ma tikixnamikikaj tokuesoljuaj, nojkia techpaleuia ipan sekinok tlamantli. Technextilia amo ma timosentlalikaj san ipan tlen tojuantij techpano, uan ma tikilnamikikaj amo san toselti tiitstokej. Tlaj kuali tijkuamachilisej ni, techpaleuis ma tiyolpaktokaj uan kuali ma tijyolmatikaj.

Ximoiljui ipan tlen kiijtoua ni texto: “Más pakilistli kiselia tlen temaka se tlenijki, uan axkeja tlen kiselia” (Hechos 20:35). ¿Tikilnamiki kema tijpaleuik se akajya katli amo kipixtoya tlen ika mopanoltis? ¿Ipa kuali tijtlakakilijtok se mouampo katli kinekiyaya kiijtos nochi tlen kiyolmatiyaya? ¿Tiyolpajki pampa ipan nopa tonali tijpaleuik se maseuali?

Tlauel tiyolpakij kema titemakaj se tlenijki ika  nochi toyolo maske tojuantij amo tleno tijselisej. Se tlakatl kiijkuilok: “Amo aka kineki temakas tlen kipia tlaj amo tleno kiselia, san uelis kichiuas se akajya katli temaka ika nochi toyolo maske amo tleno kiselia”. Kema amo san ipan tojuantij timoiljuiaj uan tikinmakaj sekinok tlen tijpiaj, kej katli amo kema techkuepilisej, kichiua ma tijselikaj se tlamantli. Tijchiuaj se tlamantli tlen tlauel ipati, kejuak titekitij iuaya toTeotsij, uan ya kiijtoua techtlaxtlauis pampa tijnextiaj titeikneliaj (Proverbios 19:17). ToTeotsij tlauel kipatiita kema tikinpaleuiaj katli tlaijiyouiaj, uan kiijtojtok techtlaxtlauis ika se nemilistli tlen amo kema tlamis ipan Xochimili. ¡Nelia tlauel kuali tlen toTeotsij techmakas! (Salmo 37:29; Lucas 14:12-14). *

Nojkia, Biblia kiijtoua tlauel kuali tiitstosej uan tiyolpakisej tlaj timosentlaliaj tijtekipanosej toTeotsij Jehová. ITlajtol techyololinia ma tijueyichiuakaj, ma tijuejkapantlalikaj uan ma tijneltokakaj (Eclesiastés 12:13; Apocalipsis [Revelación] 4:11). Tlaj tijchiuasej nopa, tijchiuasej se tlamantli tlen tlauel ipati: uelis tijyolpakiltisej toTeotsij. Ya techiljuia ni: “Xieli titlalnamiki, tinotelpoka, uan techmakas miak pakilistli” (Proverbios 27:11). Ximoiljui ipan ni tlamantli: kema tijchiuaj tlen Biblia tetlajtolmaka uan kuali tijtlapejpeniaj tlen tijchiuasej, tlauel tijyolpakiltiaj toTeotsij Jehová. ¿Kenke yolpaki? Pampa ya kitekipachoua tlen techpano uan kineki ma tijkauakaj ma techyakana pampa kimati kiampa kuali tiitstosej (Isaías 48:17, 18). ¿Onka seyok tlamantli tlen kichiuas kuali ma tijyolmatikaj tlaj amo tijueyichiuasej Katli kinamiki kinauatis nochi uan tijyolpakiltisej?

Biblia nojkia technextilia kenijkatsa kuali timouampojchiuasej iuaya toTeotsij. Santiago 4:8 kiijtoua: “Ximonechkauikaj kampa toTeko uan yajaya inmechnechkauis”. Uelis timoiljuiaj amo kema uelis timouampojchiuasej iuaya toTeotsij, Katli kipia miak chikaualistli. Maske kiampa timoiljuiaj, Biblia kiijtoua tlaj tijtemouaj toTeotsij, kena uelis tijpantisej pampa ya “itstok nechka sejse [...] tojuantij” (Hechos 17:27). Tlauel techpaleuis kuali tiitstosej teipa tlaj tijchiuaj tlen Biblia tetlajtolmaka uan timouampojchiuaj iuaya toTeotsij. ¿Kenke techpaleuis?

Ximoiljui ni: maske tijchiuasej miak tlamantli, amo kema tiuelisej toselti timomakixtisej tlen mikilistli (1 Corintios 15:26). Uan toTeotsij nochipa itstos. Ya amo kema mikis, uan kineki iuampoyouaj nojkia ma itstokaj nochipa. ToTeotsij kinextia kenijkatsa kineki ma itstokaj katli kitemouaj ika ni yejyektsi tlajtoli: “Nochi [...] pakisej para nochipa” (Salmo 22:26).

¿Tlake uelis tijchiuas tlaj tijneki timouampojchijtos nochipa iuaya toTeotsij? Nojua ximomachtijto Biblia uan kuali xikixmati (Juan 17:3; 2 Timoteo 3:16). Xikiljui ma mitspaleui tijkuamachilis iTlajtol. Biblia kiijtoua toTeotsij techmakas tlalnamikilistli tlaj tijtlajtlaniaj ika nochi toyolo * (Santiago 1:5). Uan nojkia xijchiua kampeka tijchiuas ipan monemilis tlen timomachtia, kiampa toTeotsij iTlajtol elis “keja se tlauili” tlen mitsnextilis kenijkatsa kinamiki timonejnemiltis uan ‘kitlauilis moojui uan kiampa axtimotepotlamis’ (Salmo 119:105).