XNEMILI ika tinejnentiuj kampa tlayouatok. Maski youejkauj ika yokalak tonajli, tikmati kanon tiauj pampa tikitki tlen ika timotlauiluiya. Ijkuak titlauiloua ipan tlajli, kuajli tikita tlen tikpiya mixpan. Ijkuak titlauiloua moyekapan, tlauijli mitskauilia xkita ojtli kampa tias.

Biblia yeskia kentla yejon tlauijli. Ijkon ken otikitakej ipan okseki tlamachtiltin, iTlajtol toTajtsin techpaleuiya matikixnamikikan tlaueltin tlen mojmostla tikinpiyaj. San ika, xsan yejon kichiua. Biblia kentla techtlauiluiskia pampa techpaleuiya matikitakan tlenon panos ika tlayekapan niman ijkon matikmatikan tlenon tikchiuaskej tlen techpaleuis nochipa matipakikan (Salmo 119:105). ¿Kenon kichiua?

Matikitakan ome itech kenon Biblia techpaleuiya matikchiakan tlen melak kuajli ika tlayekapan: 1 Kichiua matipakikan ipan tonemilis niman 2 techmachtia kenon nochipa kuajli touikaskej iuan toTajtsin.

Biblia techmaka kuajli tlajtolpaleuilistin tlen techpaleuiya matikimixnamikikan tlaueltin, san ika, xsan itech yejon techpaleuiya. Techmachtia maka san matitlanemilikan itech tlen tejuamej techajmana, noijki itech tlen oksekimej kinajmana. Tla ijkon tikchiuaj, tipakiskej ipan tonemilis.

Xtlanemili itech yejuin tlajtolyekanalistli tlen kisa itech Biblia: “Más paki on yejuan kitemaka xken on yejuan kiselia” (Hechos 20:35). ¿Tikilnamiki ijkuak otikpaleui yakaj akin xkipiaya tomin? ¿Noso ijkuak kuajli otijkak se akin iuan timouika akin kinekiya tlajtos? ¿Xmelak ika otiyolpak pampa ouel yakaj otikpaleui?

Melak tipakij ijkuak titepaleuiyaj niman xtikchiaj itlaj tikseliskej. Se akin kimijkuiloua amoxtin okijto: “Tla titepaleuiyaj, nochipa miyek tikseliskej xijkon  ken tlen tiktemakaj, yejuin topan nochiuas tla xtikchiaj matechtlaxtlauilikan”. San ika, ijkuak tikchiuaj itlaj inpampa oksekimej, ken akin xkipiyaj kenon techkuepiliskej, kema tikseliaj se tlaxtlauijli. Tikpiyaj tlateochiualistli ika titekitij itech akin Tlachijchiujketl, akin ijkuak tikchiuaj itlaj tlen kuajli inpampa oksekimej, yejua kita kentla techuikiliskia (Proverbios 19:17). ToTajtsin melak kipatiojkaita nochi tlen tikchiuaj inpampa akin tlajyouiyaj, niman yokijto techtlaxtlauilis ika nemilistli tlen xkeman tlamis ipan tlaltikpaktli tlen nochiuas se xochitlalpan. ¡Melak kualtsin tlen tikchiaj panos ika tlayekapan! (Salmo 37:29; Lucas 14:12-14). *

Tlen melak ueyi kijtosneki, Biblia techmachtia ika tla tikueyichiuaj toTajtsin akin melauak, Jehová, uelis melak tipakiskej ipan tonemilis. ITlajtol techyolchikaua matikueyichiuakan, matiktlakaitakan niman matiktlakamatikan ijkon ken yejua kinamiki makiseli (Eclesiastés 12:13; Apocalipsis 4:11). Ijkuak ijkon tikchiuaj, tikyolpaktiaj akin otexchijchiuj. Yejua techijlia: “Xmochiua titlamachilise [...] niman xnechyolpakti” (Proverbios 27:11). Xtlanemili itech yejuin, ijkuak toyekanaj ika itlajtolyekanalisuan Biblia ijkuak tiktlapejpeniaj tlenon tikchiuaskej, tikyolpaktiaj toTajtsin iluikakchane. ¿Tleka? Pampa yejua najmana topampa niman kineki matiktlakamatikan itlayekanalis niman ijkon nochipa kuajli matikisatij (Isaías 48:17, 18). ¿Onka itlaj okse tlen kichiuas melak matipakikan xijkon ken tikueyichiuaskej niman tikyolpaktiskej akin melak Ueyixtika?

Biblia noijki techmachtia kenon kuajli touikaskej iuan akin Tlachijchiujketl. Ompa ijkuiliujtok: “Xnisiuikan Dios niman yejua mechnisiuis” (Santiago 4:8). Kanaj xnimantsin tikneltokas ika uelis touikaskej iuan akin melak kojtik Tlachijchiujketl. San ika, Biblia techmelajkaijlia ika tla tiktejtemouaj toTajtsin, tiknextiskej, pampa yejua xuejka nemi totech (Hechos 17:27). Touikaskej iuan toTajtsin melak techpaleuis ipan tlen tikchiaj ika tlayekapan. ¿Tleka?

Xnemili yejuin: maski melak tokojtiliskej, nion se itech tejuamej xuelis nomakixtis itech akin melak ueyi totlauelikniuj, mikilistli (1 Corintios 15:26). San ika, toTajtsin nochipa nemi. Yejua xkeman mikis niman kineki ika akin iuan nouikaj noijki nochipa manemikan. Ika yejuin tlajtoltin tlen melak kualtsitsintin, Biblia techijlia tlen Jehová kimijlia akin kitejtemouaj: “Xnemikan ika pakilistli ipan nemonemilis nochipa” (Salmo 22:26).

¿Kenon uelis timouikas nochipa iuan toTajtsin? Maka xkajkaua ika timomachtia itech ipan iTlajtol, Biblia (Juan 17:3; 2 Timoteo 3:16). Xtlajtlanili mamitspaleui xkasikamati. Biblia techijlia ika tla tiktlajtlaniliaj toTajtsin ika nochi toyojlo matechmaka tlamachilistli, yejua techmakas * (Santiago 1:5). Sa ika tlami, xmokojtili tikchiuas tlen tiueltiuj itech Biblia; ijkon iTlajtol toTajtsin yes kentla “se tlauijli” tlen kitlauiluis kampa tias, niman se “tlauijli” tlen kitlauiluis moojui, aman niman nochipa (Salmo 119:105).