MANAMANATU ko koe hane fano hui he puhala pouli he taha afiafi. Pete kua leva e tō he laā, nakai logona e koe kua galo tamoki a koe, ha kua fai molī kasa ne mua atu e maama. He hulu hifo e koe ne kitia maaliali ai e tau mena i mua haau. Ti ka hulu e koe ki mua, kua maamateka e puhala haau ki mua.

He falu puhala kua tatai e Tohi Tapu mo e molī kasa ia. Ne totou e tautolu he tau vala tala kua mole, na maeke e Kupu he Atua ke lagomatai a tautolu ke fehagai mo e tau mena i mua ha tautolu​—tau lekua he tau aho takitaha ne feleveia mo tautolu oti he lalolagi hikihikifano nei. Ka e lahi atu e lagomatai he Tohi Tapu. Kua foaki foki e maamaaga ke he anoiha, maeke a tautolu ke kitia mo e muitua e puhala ka takitaki atu ke he fiafia mo e makona tukulagi. (Salamo 119:105) Ke he puhala fe?

O mai a tautolu ke kitekite ke he ua e puhala kua maeke e Tohi Tapu ke foaki ki a tautolu e amaamanakiaga aoga ma e anoiha: 1 Kua lagomatai ai a tautolu ke kumi e kakano he moui, mo e 2 kua fakaako ai ki a tautolu e puhala ke ati hake e fakafetuiaga tukulagi mo e Tufuga ha tautolu.

Kua foaki mai he Tohi Tapu e tau tomatomaaga mauokafua ke fehagai mo e tau lekua ha tautolu, ka e mua atu e aoga ka fakatatai ke he tau tohi lagomatai fakatagata. Nakai fakamafana a tautolu ke hagaaki ni ke he tau tupetupe fakatagata, ka e fakaako he Tohi Tapu ke kitia ko tautolu ko e vala he matakupu lahi. Mogoia laia ka fai kakano mooli e tau momoui ha tautolu.

Ma e fakatai, manamanatu ke he matapatu fakaakoaga nei he Tohi Tapu: “Kua mua e monuina hana ke foaki atu, ke he monuina hana ke talia mai.” (Gahua 20:35) Manatu nakai e koe e magaaho ne lagomatai e koe e taha tagata ne manako ke lagomatai fakatino? Po ke foaki e koe a koe ke fanogonogo he liligi atu he kapitiga e loto haana? Logona nakai e koe e fiafia he lagomatai e taha tagata ke mitaki e aho?

Kua moua e tautolu e fiafia lahi he foaki mo e nakai amaamanaki ke fai taui mai. Taha e tagata tohi  tala ne talahau: “Ka foaki atu e koe to lahi mahaki tumau e taui ne liu moua mai​—mua atu ka foaki e koe mo e nakai manamanatu ke he ha palepale.” Ka foaki a tautolu​—mua atu ki a lautolu kua nakai maeke ke liuaki mai ha mena​—to moua e tautolu e palepale. Kua eke a tautolu mo vala he matakupu lahi. Mooli ai, kua gahua fakalataha a tautolu mo e Tufuga ne mailoga e tau gahua totonu pihia ko e tau foakiaga ne ta age ki a ia. (Tau Fakatai 19:17) Uho lahi ki a ia e tau mena ne taute e tautolu ma e tau tagata nofogati ti mavehe a ia ke foaki mai e palepale ki a tautolu, ko e moui tukulagi he lalolagi parataiso​—kua ofoofogia mooli e amaamanakiaga ma e anoiha!​—Salamo 37:29; Luka 14:12-14. *

Ka e mua atu, kua fakaako he Tohi Tapu a tautolu na maeke ke moua e kakano mooli he moui he tapuaki ke he Atua mooli ko Iehova. Fakamafana mai he Kupu Haana a tautolu ke tuku atu e fakahekeaga, lilifu, mo e omaoma kua lata a ia ke moua. (Fakamatalaaga 12:13; Fakakiteaga 4:11) Ka pihia a tautolu, kua taute e tautolu taha mena lahi mahaki ne ofoofogia ke maama: Kua tuku fakatokoluga e tautolu e Tufuga ha tautolu. Mooli ai, kua tala mai a ia ki a tautolu: “Kia iloilo ai a koe, kia fiafia ai haku loto.” (Tau Fakatai 27:11) Manamanatu la​—ka taute e tautolu e tau fifiliaga pulotu ne fakavē ke he tau matapatu fakaakoaga he Tohi Tapu, kua fakafiafia e tautolu e loto he ha tautolu a Matua he lagi. Ko e ha? Kakano kua fakaalofa a ia ki a tautolu mo e manako ke aoga e tau momoui ha tautolu he mumui ke he tau takitakiaga haana. (Isaia 48:17, 18) Mooli ha ia, to moua e tautolu e kakano uho ke tapuaki ke he Pule he lagi mo e lalolagi katoa mo e momoui ke he puhala kua fakafiafia e loto haana.

Fakaako foki he Tohi Tapu ki a tautolu ke ati hake e fakafetuiaga mo e Tufuga ha tautolu. “Kia fakatata atu a mutolu ke he Atua,” he talahau he Tohi Tapu, “ti fakatata mai ai a ia kia mutolu.” (Iakopo 4:8) He falu magaaho liga tuahā a tautolu na maeke mooli nakai ke fai fakafetuiaga mo e Tufuga malolō ue atu. Ka e fakakite mai he Tohi Tapu ka “kumi a [t]autolu ke he Iki,” to “kitia . . . a ia,” ha kua “nakai ni mamao a ia mo tautolu takitokotaha.” (Gahua 17:27) Ko e tomatomaaga he Tohi Tapu ke moua e fakafetuiaga mo e Atua kua mua atu e aoga ma e vahā anoiha ha tautolu. Ke he puhala fe?

Manamanatu: Pete he eketaha a tautolu, to nakai maeke a tautolu ni ke kautū mai he fī kelea lahi mahaki​—ko e mate. (1 Korinito 15:26) Ka ko e Atua to tumau tukulagi a ia. Nakai fakaai a ia ke mate, ti manako a ia ke he tau kapitiga haana ke momoui tukulagi foki. He fakaaoga e tau kupu mukamuka mo e hokulo i lalo, kua fakakite mai he Tohi Tapu e tau manako ha Iehova ma lautolu kua kumi ki a ia: “To fakamanavalahi [po ke fiafia] a mutolu tukulagi.”​—Salamo 22:26.

Maeke fēfē a koe ke ati hake e fakafetuiaga tukulagi pihia mo e Atua? Kia fakatumau ke fakaako hagaao ki a ia puhala he haana Kupu ko e Tohi Tapu. (Ioane 17:3; 2 Timoteo 3:16) Kumi e lagomataiaga haana ke maama e tau Tohiaga Tapu. Mavehe mai e Tohi Tapu ka manako mooli a tautolu ki ai, “kia ole atu a ia ke he Atua” ke moua e iloilo, to foaki mai e ia ki a tautolu. * (Iakopo 1:5) Ke fakaoti aki, eketaha ke fakagahua e tau mena kua iloa e koe he fakaatā e Kupu he Atua ke eke mo “hulu ia ke he [haau] tau hui” mo e “maama ke he [haau] puhala”​—he mogonei ke hoko ke he tukulagi.​—Salamo 119:105.