SOKA ñgeno ukahi nokuenda menthiki limwe enene. Namphila ekumbi lianyingila-le kohale, ove kusukalala unene mokonda watyinda otyimimikilo. Tyina umimikila pohi utala liwa-liwa etyi tyikahi komutwe wove. Tyina umimikila vali komutwe, tyikukuatesako okutala apa moliate iya noku moinako.

Mononkhalelo mbumwe, Ombimbiliya ikahi ngotyimimi. Ngetyi tuapopia monthele yokualamba, Ondaka ya Huku ipondola okutukuatesako okutetulula ovitateka via nthiki na nthiki tukala navio mouye uno. Mahi Ombimbiliya ipondola okulinga vali ovipuka ovikuavo. Ombimbiliya tupu ituavela emimikilo konthele yetyi matyikamoneka komutwe wandyila iya itukuatesako okuvasa nokuendela mondyila yeeta ehambu lihapu. (Salmo 119:105) Ñgeni ngotyo?

Matutale ononkhalelo onombali, Ombimbiliya ituavela ekevelelo konthele yetyi matyiya komutwe wandyila: 1 Itukuatesako okuvasa omuenyo ukahi nawa iya 2 itulongesa oñgeni tupondola okukala noupanga uhapu Nomutungi wetu.

Ombimbiliya ituavela onondonga mbukahi nawa konthele yoñgeni tupondola okutetulula ovitateka vietu. Ombimbiliya kaituavela vala ondundo yokusukalala vala novitateka vietu muene, mahi tupu itulongesa okusoka ku vakuetu. Omuenyo wetu maukala vala nawa inkha tulinga ngotyo.

Tala onondonga ombu mbo Mbimbiliya: “Okuava tyihambukiswa vali tyipona okupewa.” (Atos 20:35) Okuti uhinangela onthiki wakuatesileko omunthu ankho wesukisa okukuateswako? Ine hamwe weliavele pala okutehelela tyina epanga liove lipopia konthele yovitateka viae? Okuti uhinangela oñgeni welitehelele nthiki imwe etyi walingila-ko mukuenyi otyipuka tyemuetela ehambu?

 Tupondola okuvasa ehambu limwe enene, tyina tuava atuhakevela okukondolelwa. Omuhoneki umwe wapopia okuti: “Tyotyili tyina ulinga atyiho opo ukuateseko vakuenyi, utambula vali unene tyipona etyi waava. Tyina waava, uhakevelele okukondolelwa.” Ngotyo tyina tukuatesako vakuetu—haunene vana vehemetyivili okutukondolela —nonthue matuyambwa. Tukahi nokusoka kuvakuetu. Tyotyili, atuho tukahi nokuundapa Nauna utala ovipuka tulilingila vakuetu ngatyina Oe tuevilingila, Jeova. (Provérbios 19:17) Huku upanda atyiho tulinga nohole iya wetulaa okuketuavela omuenyo uhapu momphangu yombembwa pano pohi. Tyotyili tuna ekevelelo ewa komutwe wandyila!—Salmo 37:29; Lucas 14:12-14. *

Tyakolela vali, Ombimbiliya itulongesa okuti tupondola okukala nomuenyo una ehambu tyina tuumbila Huku yotyotyili, Jeova. Ondaka ya Huku itukuatesako okunoñgonoka oñgeni matumuhambukiswa, nokumunkhimaneka iya nokutavela onondonga mbae. (Eclesiastes 12:13; Apocalipse 4:11) Inkha tulinga ngotyo, matuyambwa monkhalelo imwe ihuvisa: Matuhambukiswa Omutungi wetu. Huku utupopila okuti: “Kala nonondunge . . . iya hambukiswa omutima wange.” (Provérbios 27:11) Soka kuetyi: Tyina tulinga omatokolo elikuata nonondonga mbo Mbimbiliya, tuhambukiswa omutima wa Tate yetu wo keulu. Omokonda yatyi? Omokonda ututekula iya utuhandela ouwa utundilila mokulandula ehongolelo liae. (Isaías 48:17, 18) Petupu vali otyipuka otyikuavo tyipondola okutuetela ehambu, tyipona okuumbila Omutumini Omunene vali womouye auho nokutyinda omuenyo monkhalelo imuhambukiswa!

Ombimbiliya tupu itulongesa okuti tupondola okukala omapanga Omutungi wetu. Ovihonekwa vipopia okuti: “Fuenei ku Huku, opo nae afuene kuonwe.” (Tiago 4:8) Pamwe tupondola okulipula inkha tyitavela okukala noupanga Nomutungi wepondolo aliho. Mahi Ombimbiliya itupameka okuti inkha “tuovola Huku,” tyotyili “matumuvasi,” mokonda “Huku kekahi kokule na kese umwe puonthue.” (Atos 17:27) Ombimbiliya itulondola okuti okukala epanga lia Huku tyakolela pala komutwe wandyila. Ñgeni ngotyo?

Soka kuetyi: Ovanthu vapondola okulinga atyiho, mahi petupu nawike upondola okuholama kondyale yetu onene—ononkhia. (1 Coríntios 15:26) Mahi, Huku kankhi. Huku nalumwe mankhi iya Ngwe uhanda ukale epanga liae opo nove utualeko nomueyo uhapu. No nondaka onongwa, Ombimbiliya ipopia okuti Jeova uhanda opo vana vemuovola: “Vakaleko nomuenyo uhapu pala apeho.”—Salmo 22:26.

Oñgeni upondola okukala noupanga uhapu na Huku? Tualako okulilongesa konthele yae mo Mbimbiliya. (João 17:3; 2 Timóteo 3:16) Muiita ekukuateseko opo unoñgonoke Ovihonekwa. Ombimbiliya itupopila okuti inkha “tutualeko okuita ku Huku” ounongo, meutuavela-o. * (Tiago 1:5) Konyima, linga ononkhono mbokuendela muetyi ulilongesa, opo uyeke Ondaka ya Huku ikale “otyimimi tyonomphai [mbove]” iya “notyimimi tyondyila [yove]”—pahetyino no komutwe wandyila.—Salmo 119:105.