FA Ye kɛ ɛlua awozinli adenle bie azo kenle ko nɔsolɛ nu. Ɔwɔ nu kɛ maanle nu ɛyɛ kisii noko wɔ adwenle ɛtɛsɛkyele ɔluakɛ ɛlɛ tɔɔkye bie mɔɔ ɔta kpalɛ la wɔ ɛ sa nu. Ɛfa tɔɔkye ne ɛnea aze a, ɛnwu debie biala mɔɔ la ɛ nyunlu la. Saa ɛto ye wɔ ɛ nyunlu a, ɛnwu ye kɛ ɔta ɔkɔ moa.

Wɔ adenle bie azo, Baebolo ne le kɛ tɔɔkye ɛhye la. Kɛ mɔɔ yɛzuzu nwo wɔ edwɛkɛ mɔɔ li ɛhye anyunlu la anu la, Nyamenle Edwɛkɛ ne kola boa yɛ maa yɛdi ngyegyelɛ mɔɔ yɛyia bɛ alehyenlɛ biala wɔ ɛtane ewiade ɛhye anu la anwo gyima. Noko Baebolo ne yɛ dɔɔnwo. Ɔmaa yɛnwu kɛ yɛlɛ kenle bie mɔɔ ta, na ɔmaa yɛfa ɛbɛlabɔlɛ adenle mɔɔ yɛ anyelielɛ nee ahunlundwolɛ la azo. (Edwɛndolɛ 119:105) Adenle boni azo?

Bɛmaa yɛzuzu ndenle nwiɔ mɔɔ Baebolo ne bahola aboa yɛ yeamaa yɛanyia anyelazo wɔ kenle bie la anwo: 1 Ɔmaa yɛnyia ɛbɛlabɔlɛ kpalɛ, yɛɛ 2 Ɔmaa yɛnwu mɔɔ yɛyɛ a, yɛ nee yɛ Bɔvolɛ ne banyia agɔnwolɛvalɛ dahuu la.

Baebolo ne fa folɛdulɛ mɔɔ baboa yɛ yeamaa yɛali yɛ ngyegyelɛ nwo gyima la maa yɛ, noko tɛ ɛhye angome. Kɛ anrɛɛ ɔbaboa yɛ yeamaa yɛava yɛ adwenle yeazie yɛ ngome yɛ boɛyɛlɛ zo la, ɔmaa yɛnwu ninyɛne yɛkɔ moa. Ɛhye a bahola aboa yɛ amaa yɛanyia ɛbɛlabɔlɛ kpalɛ a.

Fa Baebolo ngyinlazo ɛhye kɛ neazo: “Anyelielɛ dɔɔnwo wɔ ɛmaanlɛ nu tɛla ɛlielɛ.” (Gyima ne 20:35) Ɛkakye mekɛ bie mɔɔ awie hyianle moalɛ na ɛboale ye la ɔ? Anzɛɛ bie a ɛnyianle mekɛ ɛmaanle ɛ gɔnwo bie wɔ mekɛ mɔɔ ɔlɛka ye ahonle nu edwɛkɛ yeahile wɔ la. Asoo ɛ nye anlie kɛ ɛmaanle awie asa hanle mɔɔ ɔkpondɛ la kenle zɔhane ɔ?

Yɛ nye die kpalɛ saa yɛkyɛ debie na yɛ nye ɛnla kɛ yɛbanyia bie yɛazie ɔ bo zo a. Abɔlɔba bie hanle kɛ: “Ɔle kɛ asɛɛ debie biala mɔɔ ɛbava wɔamaa la, ɛbanyia ye mɔnwo​—kyesɛ ɛdawɔ mumua ne ɛ  nye la ye ade kɛ ɛbanyia wɔ kpalɛyɛlɛ ne anwo ahatualɛ.” Noko saa yɛfi yɛ ahonle nu yɛkyɛ debie​—titili saa yɛkyɛ menli mɔɔ bɛnrɛnyia bie bɛnrɛzie ɔ bo zo la debie a​—yɛnyia nwolɛ ahatualɛ. Yɛndwenle yɛ ngome yɛ nwo. Nɔhalɛ nu, yɛ nee Bɔvolɛ mumua ne mɔɔ nwu nyeleyɛlɛ subane ɛhye kɛ ɔle bosea la a ɛlɛyɛ gyima a. (Mrɛlɛbulɛ 19:17) Ɔ nye sɔ mɔɔ yɛyɛ yɛmaa ehyiavolɛma la kpole kpalɛ na yebɔ ɛwɔkɛ kɛ ɔbava dahuu ngoane wɔ paladaese azɛlɛ ne azo yeadua yɛ kakɛ​—nɔhalɛ nu, kenle bie anyelazo ɛhye yɛ anyelielɛ!​—Edwɛndolɛ 37:29; Luku 14:12-14. *

Mɔɔ tɛla biala la, Baebolo ne kilehile kɛ saa yɛsonle Gyihova Nyamenle a, yɛbahola yɛanyia ɛbɛlabɔlɛ kpalɛ. Ye Edwɛkɛ ne maa yɛ anwosesebɛ kɛ yɛva nganvolɛ nee enililɛ yɛmaa ye na yɛdie ye. (Nolobɔvo ne 12:13; Yekile 4:11) Saa yɛyɛ zɔ a, ɛnee yɛlɛdi debie titili bie mɔɔ ɔwɔ kɛ yɛdwenledwenle nwolɛ la anwo gyima: Yɛmaa yɛ Bɔvolɛ ne anye die. Nɔhalɛ nu, ɔtu yɛ folɛ kɛ: “Nwu nrɛlɛbɛ na maa me nye ɛlie.” (Mrɛlɛbulɛ 27:11) Suzu nwo nea, saa yɛmaa yɛ kpɔkɛzilɛ ne gyinla Baebolo ngyinlazo zo a, yɛmaa yɛ anwuma Selɛ ne anye die. Duzu ati ɔ? Ɔluakɛ ɔdwenle yɛ nwo na ɔkulo kɛ ɔwie yɛ boɛ, ɔlua ye adehilelɛ mɔɔ yɛbali zo la azo. (Ayezaya 48:17, 18) Ɛbɛlabɔlɛ mɔɔ le kpalɛ la boni a tɛla anwuma nee aze Belemgbunli ne mɔɔ yɛbazonle ye na yɛamaa ɔ nye alie la a?

Eza Baebolo ne kilehile kɛ yɛva yɛ Bɔvolɛ ne agɔnwolɛ. Ɔse: “Bɛbikye Nyamenle, na ɔbabikye bɛ.” (Gyemise 4:8) Ɔdwu mekɛ ne bie a, yɛngola yɛnnwu ye saa yɛbahola yɛava Bɔvolɛ tumivolɛ bedevinli ne agɔnwolɛ a. Noko Baebolo ne maa yɛnyia anwodozo kɛ saa ‘yɛkpondɛ Nyamenle anzi adenle a, yɛbanwu ye,’ ɔluakɛ “ɔ nee yɛ nuhua ko biala avinli anwa.” (Gyima ne 17:27) Folɛ mɔɔ Baebolo ne tu yɛ kɛ yɛrayɛ Nyamenle agɔnwo la le kpalɛ maa yɛ kenle bie. Adenle boni azo?

Suzu nwo: Saa yɛbɔ mɔdenle kɛ nzɔne bɔbɔ a, yɛ nuhua biala ɛnle ɛkɛ mɔɔ bahola anriandi kpɔvolɛ kpole ne a​—ewule. (1 Kɔlentema 15:26) Noko akee, Nyamenle wɔ ɛkɛ ne dahuu. Ɔnrɛwu ɛlɛ, yɛɛ ɔkulo kɛ ɔ gɔnwo mɔ noko tɛnla aze dahuu. Wɔ mekɛ mɔɔ bɛlɛfa edwɛkɛ kɛnlɛma ɛhye bahilehile nu la, Baebolo ne hanle mɔɔ Gyihova kpondɛ amaa menli mɔɔ kpondɛ ye la anwo edwɛkɛ kɛ: “Bɛdɛnla ngoane nu dahuu.”​—Edwɛndolɛ 22:26. NW

Kɛ ɔkɛyɛ na wɔava Nyamenle agɔnwolɛ dahuu ɛ? Dua ye Edwɛkɛ Baebolo ne azo sukoa ɔ nwo debie. (Dwɔn 17:3; 2 Timote 3:16) Biza ye ɛkɛ ne moalɛ amaa wɔade Ngɛlɛlera ne abo. Baebolo ne si yɛ adua kɛ saa ‘yɛkɔ zo yɛbiza Nyamenle’ kɛ ɔmaa yɛ nrɛlɛbɛ a, ɔbava yeamaa yɛ. * (Gyemise 1:5) Mɔɔ li awieleɛ la, bɔ mɔdenle fa mɔɔ ɛsukoa la yɛ gyima na maa Nyamenle Edwɛkɛ ne ɛyɛ “kɛnlaneɛ [ɛmaa] ɛ gyakɛ yɛɛ “wienyi wɔ [wɔ] adenle nu​—ɛnɛ nee dahuu.​—Edwɛndolɛ 119:105.