IMAGINÁ bo ta kana anochi riba un kaminda skur. Maske solo a baha basta ratu kaba, bo no ta sinti bo pèrdí i sin speransa pasobra bo tin un bon flashlight ku bo. Ora bo pone e lus abou, bo por wak bon bon kiko tin bo dilanti. Anto ora bo pone e lus dilanti, su rayonan ta iluminá un distansia bastante leu.

Den un sentido, Beibel ta meskos ku un flashlight. Manera nos a mira den e artíkulonan anterior, e Palabra di Dios por yuda nos dil ku kosnan ku ta nos dilanti—problemanan di tur dia ku nos tur ta enfrentá den e mundu insigur akí. Pero Beibel ta bai mas leu ainda. E ta duna nos un bista di futuro, ya ku e ta yuda nos mira loke nos mester hasi pa sigui riba e kaminda ku ta hiba na felisidat i satisfakshon duradero. (Salmo 119:105) Kon asina?

Ban wak dos manera ku Beibel ta duna nos speransa práktiko pa futuro: 1 E ta yuda nos haña propósito den bida i 2 e ta siña nos kon pa kultivá un amistat eterno ku nos Kreador.

Beibel ta ofresé konseho konfiabel pa yuda nos dil ku nos problemanan, pero e no ta djis un simpel manual. E ta siña nos pa no konsentrá solamente riba nos preokupashonnan personal, sino pa mira nos situashon for di un punto di bista mas general. Ta e ora ei so nos bida por haña berdadero nifikashon.

Por ehèmpel, wak e prinsipio bíbliko akí: “Tin mas felisidat den duna ku den risibí.” (Echonan 20:35) Bo ta kòrda ku bo a yega di yuda un hende ku tabatin mester di yudansa material? Òf kisas bo a sinta skucha un amigu deshogá su mes? Bo no a sinti bo satisfecho di por a yuda un hende drecha su dia?

Nos ta sinti un goso enorme ora nos duna sin spera di haña algu bèk. Un eskritor a bisa: “Ta kasi imposibel pa duna di bo mes sin ku bo ta keda sin haña mas di loke bo a duna—basta abo duna sin  spera un rekompensa.” Ma ora nos duna—foral hende ku no tin moda di paga nos bèk—nos ta risibí un rekompensa. Nos lo ripará ku bida no ta konsistí di nos preokupashonnan personal so. Sí, nos ta traha lado a lado ku e Kreador mes, kende ta mira nos aktonan di bondat komo fiansa ku nos ta dun’é. (Proverbionan 19:17) E ta apresiá mashá ora nos yuda un hende pober, i e ta primintí di paga nos bèk ku bida eterno den un paradeis riba tera. Esta un speransa emoshonante pa futuro!—Salmo 37:29; Lukas 14:12-14. *

Riba tur kos, Beibel ta siña ku nos por haña berdadero propósito den bida si nos adorá e Dios berdadero, Yehova. Su Palabra por animá nos pa dun’é e alabansa, onor i obedensia ku e meresé. (Eklesiástes 12:13; Revelashon 4:11) Ora nos hasi esei, nos ta logra algu mashá bunita: Nos ta alegrá nos Kreador. Sí, e ta urgi nos: “Sea sabí .  . . i hasi mi kurason kontentu.” (Proverbionan 27:11) Djis imaginá bo esaki: Ora nos tuma desishon sabí basá riba prinsipionan di Beibel, nos ta alegrá kurason di nos amoroso Tata selestial. Dikon? Pasobra e ta interesá den nos i ke pa nos saka benefisio ora nos ta sigui su guia. (Isaías 48:17, 18) Si bo wak bon, bo ta kere ku tin un propósito mas grandi ku adorá e Soberano di universo i biba di un manera ku ta alegrá su kurason?

Tambe Beibel ta siña nos pa desaroyá un amistat ku nos Kreador. E ta bisa: “Hala serka Dios, i lo e hala serka boso.” (Santiago 4:8) Tin bes kisas nos ta duda si ta realmente posibel pa ta amigu di e Kreador todopoderoso. Pero Beibel ta sigurá nos ku si nos “buska Dios,” nos lo “realmente hañ’é,” pasobra “e no ta masha leu for di kada un di nos.” (Echonan 17:27) E konseho di Beibel pa bira amigu di Dios ta masha práktiko mes pa nos futuro. Dikon?

Pensa riba esaki: Ni maske kuantu nos purba, niun di nos no por skapa di e último enemigu—morto. (1 Korintionan 15:26) Sinembargo, Dios ta eterno. E lo no muri nunka, i e ke pa su amigunan tambe biba pa semper. Ku palabranan simpel pero masha bunita Beibel ta ekspresá loke Yehova ke pa esnan ku ta busk’é: “Laga boso kurason biba pa semper.”—Salmo 22:26.

Kon lo bo por desaroyá un amistat eterno ku Dios? Sigui siña tokante Dios mediante su Palabra, Beibel. (Huan 17:3; 2 Timoteo 3:16) Pidié yuda bo komprondé Beibel. Beibel ta sigurá nos ku si nos ta sinsero ora nos ta “sigui pidi Dios” pa su sabiduria, e lo duna nos esei. * (Santiago 1:5) Finalmente, hasi esfuerso pa apliká loke bo ta siña, lagando e Palabra di Dios sirbi komo “un lampi pa [bo] pia” i “un lus pa [bo] kaminda”—awor i pa semper.—Salmo 119:105.