IMAGINA bo ta cana anochi riba un caminda scur. Maske solo a baha basta rato caba, bo no ta sinti bo perdi y sin speransa pasobra bo tin un bon flashlight cu bo. Ora bo lusa abou, bo por wak bon bon kico tin bo dilanti. Anto ora bo lusa dilanti, su rayonan ta ilumina un distancia bastante leu.

Den un sentido, Bijbel ta mescos cu un flashlight. Manera nos a mira den e articulonan anterior, e Palabra di Dios por yuda nos deal cu cosnan cu ta nos dilanti; problemanan di tur dia cu nos tur ta enfrenta den e mundo insigur aki. Pero Bijbel ta bay mas leu ainda. E ta duna nos un bista di futuro, ya cu e ta yuda nos mira loke nos mester haci pa sigui riba e caminda cu ta hiba na felicidad y satisfaccion duradero. (Salmo 119:105) Con asina?

Ban wak dos manera cu Bijbel ta duna nos speransa pa futuro: 1 E ta yuda nos haya proposito den bida y 2 e ta siña nos con pa forma un amistad eterno cu nos Creador.

Bijbel ta duna conseho confiabel pa yuda nos deal cu nos problemanan, pero e no ta djis un simpel manual. E ta siña nos pa no concentra solamente riba nos preocupacionnan personal, sino pa mira nos situacion for di un punto di bista mas general. Ta e ora ey so nos bida por haya berdadero nificacion.

Por ehempel, wak e principio biblico aki: “Tin mas felicidad den duna cu den ricibi.” (Echonan 20:35) Bo ta corda cu bo a yega di yuda un hende cu tabatin mester di yudansa material? Of kisas bo a sinta scucha un amigo desahoga su mes? Bo no a sinti bo satisfecho di por a yuda un hende drecha su dia?

Nos ta sinti un goso enorme ora nos duna sin spera di haya algo bek. Un escritor a bisa: “Ta casi imposibel pa duna di bo mes sin cu bo ta keda sin  haya mas di loke bo a duna—basta abo duna sin spera un recompensa.” Pero ora nos duna, vooral hende cu no tin moda di paga nos bek, nos ta ricibi un recompensa. Nos lo ripara cu bida no ta consisti di nos preocupacionnan personal so. Si, nos ta traha lado a lado cu e Creador mes, kende ta mira nos actonan di bondad como fianza cu nos ta dun’e. (Proverbionan 19:17) E ta aprecia hopi ora nos yuda un hende pober, y e ta priminti di paga nos bek cu bida eterno den un paradijs riba Tera. Esta un bunita speransa pa futuro!—Salmo 37:29; Lucas 14:12-14. *

Ademas, Bijbel ta siña cu nos por haya berdadero proposito den bida si nos adora e Dios berdadero, Jehova. Su Palabra por anima nos pa dun’e e alabanza, honor y obediencia cu e merece. (Eclesiastes 12:13; Revelacion 4:11) Ora nos haci esey, nos ta logra algo masha bunita: Nos ta alegra nos Creador. Si, e ta urgi nos: “Sea sabi ... y haci mi curason contento.” (Proverbionan 27:11) Djis imagina bo esaki: Ora nos tuma decision sabi basa riba principionan di Bijbel, nos ta alegra curason di nos amoroso Tata celestial. Dicon? Pasobra e ta interesa den nos y kier pa nos saca beneficio ora nos ta sigui su guia. (Isaias 48:17, 18) Si bo wak bon, bo ta kere cu tin un proposito mas grandi cu adora e Soberano di universo y biba di un manera cu ta alegra su curason?

Bijbel ta siña nos tambe pa forma un amistad cu nos Creador. E ta bisa: “Hala cerca Dios, y lo e hala cerca boso.” (Santiago 4:8) Tin bes kisas nos ta duda si ta realmente posibel pa ta amigo di e Creador todopoderoso. Pero Bijbel ta sigura nos cu si nos “busca Dios”, nos lo “realmente hay’e”, pasobra “e no ta masha leu for di cada un di nos.” (Echonan 17:27) E conseho di Bijbel pa bira amigo di Dios ta masha practico mes pa nos futuro. Dicon?

Pensa riba esaki: Ni maske cuanto nos purba, niun di nos no por scapa di e ultimo enemigo: morto. (1 Corintionan 15:26) Sinembargo, Dios ta eterno. E lo no muri nunca, y e kier pa su amigonan tambe biba pa semper. Cu palabranan simpel pero masha bunita Bijbel ta expresa loke Jehova kier pa esnan cu ta busc’e: “Laga boso curason biba pa semper.”—Salmo 22:26.

Con lo bo por forma un amistad eterno cu Dios? Sigui siña tocante Dios mediante su Palabra, Bijbel. (Juan 17:3; 2 Timoteo 3:16) Pidie yuda bo compronde Bijbel. Bijbel ta sigura nos cu si nos ta sincero ora nos ta “sigui pidi Dios” pa su sabiduria, e lo duna nos esey. * (Santiago 1:5) Finalmente, haci esfuerso pa aplica loke bo ta siña, lagando e Palabra di Dios sirbi como “un lampi pa [bo] pia” y “un luz pa [bo] caminda”, awor y pa semper.—Salmo 119:105.