TINGIM DISWAN. Iu wakabaot followim wanfala road wea iu no followim enitaem bifor gogo hem naet witim iu nao. Nomata hem dark finis, iu no fraet and tingse bae iu lus, bikos iu garem torchlaet wea laet strong fogud. Taem iu torchim road, iu lukim klia evri samting front long iu, and nomata samting farawe iu savve lukim tu.

Bible hem olsem torchlaet. Olsem iumi just storyim finis long olketa nara article, Bible savve helpem iumi for deal witim olketa hard taem wea iumi feisim distaem long world wea laef savve change enitaem nomoa. Bat Bible savve helpem iumi tu for savve wanem bae happen long future. Hem olsem hem showim iumi road wea iumi savve followim wea bae mekem iumi hapi and satisfae for olowe. (Sams 119:105) Hao nao Bible showim iumi samting wea bae happen long future?

Distaem bae iumi storyim tufala wei wea Bible helpem iumi for garem gudfala future: 1 Hem mekem laef bilong iumi garem mining, and 2 hem teachim iumi wanem iumi savve duim for fren gud witim God for olowe.

Bible savve helpem iumi for deal witim olketa hard samting wea kasem iumi, bat hem barava difren from eni nara buk wea savve givim advaes. Bible helpem iumi for no tingim nomoa hard taem wea kasem iumi, bat for luksavve long olketa important samting. Taem iumi savve long datwan nao bae laef bilong iumi garem mining.

Olsem example, tingim Bible principle hia: “Man wea givim samting hem barava hapi winim man wea kasem samting.” (Acts 20:35) Waswe, iu tingim enitaem wea iu helpem samwan wea needim help? Or maet iu spendem taem for lisin long samwan wea storyim evri feeling bilong hem long iu? Hao nao iu feel taem iu lukim samwan wea iu helpem, hem barava hapi?

Iumi bae hapi tumas taem iumi givim samting for helpem samwan and no expectim hem for changem bak. Wanfala man for raet hem sei: “Iumi savve taem  iumi givim samting long samwan iumi bae kasem staka samting moa winim wanem iumi givim sapos iumi givim samting long samwan and iumi no expectim hem for changem bak.” Bat taem iumi helpem olketa wea no fit for changem bak wanem iumi duim for olketa iumi kasem blessing tu. Iumi duim important samting. Iumi waka tugeta witim God, wea ting long gudfala samting wea iumi duim for narawan olsem hem garem kaon long iumi. (Provebs 19:17) God barava tinghae long gudfala samting wea iumi duim for olketa wea no garem samting and hem promis for givim iumi laef olowe long paradaes long earth, wea datwan hem nambawan hope wea iumi garem for future!—Sams 37:29; Luke 14:12-14. *

Main samting nao, Bible showimaot taem iumi worshipim trufala God, Jehovah, datwan nao bae mekem laef bilong iumi garem mining. Bible encouragem iumi for obeyim hem, worshipim hem, and praisem hem bikos hem fit for kasem datwan. (Eklesiastes 12:13; Revelation 4:11) Taem iumi duim olsem, datwan hem spesol samting, bikos iumi mekem God hapi. Hem sei: “Pikinini blong mi, sapos yu kamap waes, bae mi hapi.” (Provebs 27:11) Tingim diswan, taem iumi followim Bible principle and mekem gudfala disison, iumi mekem heart bilong dadi bilong iumi long heven hapi. Why nao olsem? Bikos hem lovem iumi and laekem iumi for kasem gud samting taem iumi followim toktok bilong hem long Bible. (Aesaea 48:17, 18) So, no eni samting savve mekem laef bilong iumi garem mining olsem wei for worshipim God and for duim olketa samting wea bae mekem hem hapi!

Bible savve helpem iumi tu for fren witim God. Hem sei: “Fren gud witim God and bae hem fren gud witim iufala.” (James 4:8) Samfala taem maet iumi tingse iumi no fit for fren witim Olmaeti God. Bat Bible hem sei sapos iumi “traem best for savve long God” bae iumi “savve long hem” bikos “hem no hard nomoa for savve long hem.” (Acts 17:27) Taem iumi followim advaes long Bible for fren gud witim God, datwan nao savve helpem iumi for garem hope for future. Long wanem wei?

Tingim diswan: Nomata wanem samting iumi duim, iumi no savve misstim datfala main enemy bilong iumi, dae. (1 Corinth 15:26) Bat God hem stap for olowe. Hem no savve dae, and hem laekem olketa fren bilong hem tu for laef olowe. Bible hem iusim olketa naesfala toktok hia for storyim wanem Jehovah laekem olketa wea lukaotem hem for kasem. Bible sei: “Mi laekem tumas fo olketa garem gudfala laef olowe.”—Sams 22:26.

Wanem nao iu savve duim for fren gud witim God for olowe? Gohed lane abaotem God taem iu readim Bible. (John 17:3; 2 Timothy 3:16) Prea long hem for helpem iu minim wanem iu readim. Bible sei sapos iumi “gohed askem God” for givim iumi wisdom, hem bae givim long iumi. * (James 1:5) Waka hard for followim wanem iu lanem and iusim Bible olsem “laet wea [iu] save falom” and for hem “saen long wei [road] blong [iu]” long distaem and for olowe.—Sams 119:105.