PAQASCHÖ juk nänipa ëwëkanqëkiman pensari. Inti jeqashqana kaptimpis, juk alli aktseq luz de mänusniki kaptinmi oqrakänëkipaq kaqtaqa pensankitsu. Jinamampis, tsë luz de mänusnikiwan patsaman alumbraptikiqa imëkatapis clärum rikanki. Y alli aktsiptinmi, puntëkiman alumbrarpis ëwëkanqëki nänita karuyaq rikärinki.

Imëkachömi Diospa Palabranqa tsë luz de mänus cuenta. Wakin yachatsikïkunachö ninqantsiknömi, Diospa Palabranqa kanan witsan imëka problëmapa pasashqapis yanapamantsik. Peru manam kanan tiempullatsu yanapakun, sinöqa shamoq tiempuchö kushishqa kawakunapaqmi yanapamantsik (Salmus 119:105). ¿Imanötaq yanapamantsik?

Shamoq tiempuchö alli kawakunapaq Biblia imanö yanapamanqantsikta rikärishun: 1 Kushishqa kawanapaq y 2 Diosnintsikwan imëpis amïgu kanapaqmi yachatsimantsik.

Bibliapa consëjunkunaqa problëmantsikkunata altsanapaqmi yanapamantsik, peru manam juk shumaq consejakoq librunöllatsu. Kikintsikpa problëmantsikkunallaman mana yarparäkunapaqmi yachatsimantsik, sinöqa wakinkunamampis. Tsëta rurarninllam rasumpa kushishqaqa kashun.

Biblia kënö consejakunqanman pensë: “Imatapis qokïmi imata chaskipitapis mas kushikïtaqa apamun” (Hëchus 20:35). ¿Imëllapis wanëkaqkunata qellënikiwan yanaparqunkiku? ¿O juk amïguïki imanö sientikunqanta parlapäshuptiki shumaq wiyarqunkiku? ¿Manaku pillatapis kushishqa sientikunampaq yanapanqëkita musyarninqa qampis kushishqa sientikurqëki?

Imatapis mana chaskinantsikrëkurlla qarakushqam mas kushishqaqa kantsik. Librukunata qellqaq  juk nunam kënö nirqan: “Pitapis yanapëqa imatapis mana chaskinantsikrëkurllam kanan, tsënö mana rurarqa manam wakinkunata shonqupita patsëtsu yanapëkashwan”. Imatapis mana shuyarashpa rasumpa wanëkaqkunata yanaparninqa, Jehovä ruranqanchömi yanapakïkantsik. Wakinkunata yanapanqantsikrëkur imëkata ruranqantsikpitaqa, jaqantsik cuentam Jehoväqa sientikun (Proverbius 19:17). Jehoväqa alläpam valoran wakinkunata yanapashqa. Tsëta ruranqantsikrëkurmi, shamoq tiempuchö mana wanushpa kawakïta qomänantsikpaq änikushqa. Y ¡tsëqa alläpa shumaqmi kanqa! (Salmus 37:29; Lücas 14:12-14). *

Rasumpa kaq Diosnintsik Jehoväta adorarnin kushishqa kawakunapaqmi, Bibliaqa yachatsimantsik. Jinamampis, Pëllata adoranapaq, respetanapaq y cäsukunapaqmi Bibliaqa nimantsik (Eclesiastes 12:13; Revelacion 4:11). Tsëkunata rurarninqa, kamamaqnintsik Jehovätam kushitsishun. Porqui Pëmi këta nimantsik: “Yachaq kë wamrallä y shonqüta kushitsimï” (Proverbius 27:11). Këman pensari: Biblia ninqanmannö imatapis decidirqa teytantsik Jehovätam kushitsishun. ¿Imanir? Porqui Pëqa noqantsikpaqmi yarpachakun, y consëjunkunata cäsukurnin kushishqa kawakunatam munan (Isaïas 48:17, 18). Rasumpa kaqchöqa, Ciëluchöpis y Patsachöpis Autoridäyoq Jehoväta adorëwan y kushitsiwanqa manam ni imapis igualantsu.

Dioswan amïgu kanapaqmi Bibliaqa yachatsimantsik. Këta ruranapaqmi nimantsik: “Diosman witiyë, y pëqa qamkunamanmi witimunqa” (Santiägu 4:8). Llapanta puëdeq Diosnintsikpa amïgun këta mana puëdinqantsikta itsapis pensashwan. Peru Bibliaqa nimantsik, Pëman witishqaqa noqantsikmampis witimunampaq kaqtam. Porqui Diosqa “manam noqantsikpita alläpa karuchötsu këkan” (Hëchus 17:27). Diospa amïgun kanapaq Biblia ninqanta kanan witsan cäsukushqaqa, shamoq tiempupaqpis alistakïkäshunmi.

Këman pensari: imëkata rurashqapis manam alläpa chikimaqnintsik wanïpitaqa escapakïta puëdintsiktsu (1 Corintius 15:26). Peru Diosqa imëpis këkanqallam. Pëqa manam imëpis wanunqatsu y tsëtam amïgunkunapaqpis munan. Jehoväqa kë shumaq y entiendillapaq palabrakunawanmi, pëta sirwita munaqkunata kënö nin: “Shonqïkikunam imëyaqpis kawanqa” (Salmus 22:26).

¿Imatataq rurankiman Jehoväwan mas amïgu kanëkipaq? Pëpitam Palabran Bibliachö yachakurnin sïguinëki (Juan 17:3; 2 Timoteu 3:16). Y Palabranta entiendinëkipaqmi Diosman mañakunëki. Yachaq kanëkipaq shonqupita patsë mañakur sïguiptikiqa, Pëqa yanapashunkim * (Santiägu 1:5). Jina yachakunqëkimannö kawëta procuraptikiqa, Diospa Palabranqa “lamparinnömi” imatapis cläru rikätsishunki y ëwëkanqëki nänita rikänëkipaqmi ‘aktsinö’ imëpis yanapashunki (Salmus 119:105).