TUTA shuj ñanta ricushcata yuyai. Shuj linternata charishcamantami maita rinata yachangui. Caruta shitajpipish cai linternapaj luzmi maita purinata ricuchinga.

Bibliaca cai linterna shinami can. Ñaupa temacunapi yachashca shinaca tucuicunami punllanta problemacunata charinchij. Bibliaca chai problemacunata ima shina allichinatami yachachin. Ashtahuancarin shamuj punllacunapi cushilla causangapaj imata ruranatapishmi ricuchin (Salmo 119:105).

Cai temapica: 1 Bibliata leyishpa cushilla causai tucushcatami ricushun. 2 Yaya Diospaj amigo cangapaj imata ruranatapishmi yachashun.

Problemacuna ricurijpi ima shina allichinatami Bibliaca yachachin. Mana shujtaj librocuna shina yangachu can. Ñucanchij problemacunapi yalli sustarishpa causanapaj randica shujtajcunamanta preocuparishpa ayudana cashcatami Bibliaca yachachin. Chashna ayudashpallami cushilla causashun.

Hechos 20:35-pi ima nishcata yuyai. Chapica: “Imatapish cujmi, cushcata japijta yalli cushicun” ninmi. ¿Quiquinca huajcha gentecunata ayudashcanguichu? ¿Cambaj amigo paipaj problemacunata parlacujpica allichu uyarcangui? ¿Shujtajcunata ayudashpaca manachu cushilla sintirircangui?

Shujtajcunata tucui shunguhuan ayudashpaca cushillami sintirinchij. Shuj yachaj runaca: “Mana imata japingaraiculla shujtajcunata ayudashpaca allimi causashun” nircami. Imata mana charijcunata tucui shunguhuan imapipish ayudajpica Diosca ñucanchijman dibiyacushca layami sintirin (Proverbios 19:17). Jehová Diosca shujtajcunata ayudajta ricushpaca cushillami sintirin. Ñucanchij chashna rurashcamantaca paraíso Allpapimi huiñai  causaita cushpa bendiciasha nin. Caita yachashpaca ¿manachu cushilla sintiringui? (Salmo 37:29; Lucas 14:12-14). *

Bibliapica Yaya Diosta alli adorashpallami cushilla causashun ninmi. Shinallataj paipaj mandashcacunata alli cazujcuna cachunmi mandan (Eclesiastés 12:13; Apocalipsis 4:11). Chashna rurashpami Yaya Diosta cushichinchij. Ashtahuancarin Yaya Diosca: “Ñuca huahualla, yachaisapa cayari” ninmi (Proverbios 27:11). Ñucanchijcuna imata ruragrishpapish Bibliapaj consejocunata catishpami alli decisioncunata agllana canchij. Shina rurajpimi Yayito Diosca achcata cushicunga. Paica ñucanchijmantaca achcatami sustarin, chaimantami paipaj mandashcacunata alli pajtachichun mandan (Isaías 48:17, 18).

Bibliaca Yaya Dioshuan ima shina amigo tucunatami yachachin. Por ejemplo, Santiago 4:8-pica. “Diosman cꞌuchuyaichij, paipish cancunapajman cꞌuchuyangami” ninmi. Tucuita ruraj Diospaj amigo tucunaca sinchimi canga ninguichari. Pero Bibliapica Yaya Diosca “ñucanchijmantaca mana carupichu” ninmi. Chaimantami paihuanca alli apanacui tucunchij (Hechos 17:27). Jehová Dioshuan alli amigo cashpallami shamuj punllacunapipish sumaj causaita charishun.

Cunan punllacunaca huañuimantaca ni pi mana quishpiri tucunchu. Huañuimi ñucanchijpajca shuj enemigo shina can (1 Corintios 15:26). Shinapish Yaya Diosca huiñai huiñaita causaj Diosmi can, paica nunca mana huañunchu. Chaimantami paita sirvijcunapish mana huañuchun munan. Ashtahuanpish Yayitu Jehová Diosca: ‘Ñucata sirvijcunaca unitami causangacuna’ ninmi (Salmo 22:26).

¿Quiquinca ima shinataj Dioshuan huiñaipaj apanacui tucungui? Bibliapi paimanta yachashpa catinataca manataj saquinachu cangui (Juan 17:3; 2 Timoteo 3:16). Diospaj Shimita intindingapajmi Yaya Diosta ayudata mañana cangui. Bibliapica, ‘yachai illaj cashpaca Diosta tucui shunguhuan mañaichij, paica mana mitsashpa yachana yuyaita cungallami’ ninmi * (Santiago 1:5). Shinallataj Bibliapi imalla yachashcacunataca causaipimi alli pajtachina cangui. Chashna rurajpillami Bibliaca cambaj chaqui sarunata achijyachicuj shina alli causaita charichun ayudanga (Salmo 119:105).