PENSARIPAI, shuj yana yana tutapi rijushcanguiman. Indi ñana punchayachijujpipash, shuj jatun linternata charijuimandami na yapata manllanayachinguiman. Chai linternahuan chaqui ladoman punchayachishpaca ñaupajpi ima tiajujtaca alimi ricungui. Cutin caruman punchayachijpica ñandaca carutami punchayachin.

Bibliaca shuj linternagushnami can. Imashinami ñaupa temacunapi yachajurcanchi, Bibliami ñucanchitaca, ñucanchi chaqui saruna pushtuta punchayachinshna cada punlla charishca problemacunata aguantachun ayudan. Shinallata, Bibliami caruta punchayachinshna ñucanchitaca jipacunaman cushilla causangapaj imata ruranata yachachun ayudan (Salmo 119:105). ¿Imashinata ayudan?

Ishcai yuyaicunata ricupashun: 1 ñucanchi causaihuan imata ruranata yachachunmi ayudan, 2 Tucuita Ruraj Taita Dioshuan para siempre ali amigocuna tucuchunmi ayudan.

Bibliami problemacunata aguantachun ayudan. Shinapash ali sintirichun ayudaj librocunashnaca na canllu. Bibliaca ñucanchipilla pensarijunapa randica, shujcunapi pensarishpa ñucanchi causaihuan imata ruranata yachachunmi ayudan.

Pensaripai Bibliapica ninmi: “Carajpi japijcunatapash yalimi carajcunaca, ninanda cushijun” nishpa (Hechos 20:35). ¿Nachu ima horapash culqui faltajlla amigota, o pihuanbash parlangapaj munajuj amigota ayudapashcangui? ¿Nachu ayudashpaca ali sintiriparcangui?

Tucui shunguhuan carashpaca ashtahuanmi cushijunchi. Shuj escritorca nircami: “Na randi carachun shuyashpa, carana munaihuan carashpaca siempremi  ashtahuan charinchi” nishpa. Ashtahuanbachaca, na randi carai ushajcunaman carashpami Tucuita Ruraj Taita Diosta ayudana bendicionda charinchi. Taita Diosca, ñucanchicuna shujcunaman carajta ricushpami ñucanchiman dibijuj cuenda sintirin (Proverbios 19:17). Ashtahuangarin, ninanda cushijushpami Jehová Diosca, shamuj punllacunapica shuj Paraíso Alpagupi para siempre causana bendiciondami carasha nin. Chaica alipachami can (Salmo 37:29; Lucas 14:12-14). *

Shinapash, ñucanchi causaihuan ciertopacha imata ruranata yachangapaca Jehová Diostami adorana canchi. Bibliapica yachachinmi, Taita Diostami alabana, adorana, cazuna canguichi nishpa (Eclesiastés 12:13; Apocalipsis 4:11). Shina rurashpaca Taita Diostami cushilla sintichinajunchi. Bibliapica Taita Diosca ninmi: “Ñuca huahualla, aliguta yachajushca cashpa, ñuca shungupi cushichihuayari” nishpa (Proverbios 27:11). ¿Chaitaca yachaparcanguichu? Bibliapi consejocunata catishpa ali decisiongunata agllashpaca, ñucanchi Taita Diostami cushilla sintichinajunchi. Paica ñucanchitaca juyanmi. Ñucanchillata ali causachun munashpami, paipa consejocunata cazuchun munan (Isaías 48:17, 18). Shinaca ¿nachu ñucanchi causaipica Tucuita Mandaj Taita Diosta cazushpa, paipa shunguta cushilla sintichina ashtahuan importante can?

Bibliapica ninmi: “Taita Diospajman quimirichi. Shina quimirijpica, paipash cangunapajman quimiringami” nishpa (Santiago 4:8). Shinaca Taita Diospa ali amigocuna caita ushanchimi. Chaita crinaca tal vez ashata shinllimi canga. Shinapash Bibliapica ninmi: ‘Taita Diosta mascaichi paica ñucanchimandaca na carupi canllu’ nishpa (Hechos 17:27). Taita Diospa amigo tucushpami shamuj punllacunapi ali causangapaj prepararinajunchi. ¿Imamandata shina nipanchi?

Pensaripai, munashpapash huañuimanda escaparitaca pipash na ushanchichu (1 Corintios 15:26). Shinapash Taita Diosca siempremi causashca. Paica nunca na huañungachu, paipa amigocunapash para siempre causachunmi munan. Jehová Diosca paita mascajcunamanga cai juyailla shimicunatami nin: “Cangunapaj shungupica, causaita causanatami charinguichi” nishpa (Salmo 22:26).

Taita Dioshuan para siempre ali amigocuna cangapaca, paita ashtahuan ali rijsishpa catingapami, Bibliata yachajuna capangui (Juan 17:3; 2 Timoteo 3:16). Paitaca, canba Shimiguta intindingapaj ayudahuai nishpami mañana capangui. Bibliapica ninmi, ali yachaita carahuai nishpa Taita Diosta mañajpica paica carangallami nishpa * (Santiago 1:5). Ashtahuangarin, Bibliapi yachajushcata pactachingapami esforzarina capangui. Shinami Taita Diospa Shimi Bibliaca quiquinba ‘chaqui sarunata punchayachijuj lamparagushna’ quiquinba ‘ñanda punchayachijuj michagushna’ cachun munashcata ricuchipangui (Salmo 119:105).