HANNI TENNE HEDI: Hashsha tunsichunni doogo hadhanni nootto. Tunse xiꞌminoha ikkirono, anga warri yite xabbanno baatire adhootto daafira hakkeeshsha dimasootto. Baatire uullara qolte ganatto wote mulekki noori baalu leellannohe. Albira qolte ganatto wote kayinni xeertowa noori baalu waraꞌa yee leellannohe.

Qullaawu Maxaafino mite doogganni laꞌniro baatirete gedeeti. Saꞌu birxichuwara ronsummonte gede, Maganu Qaali mulenke noo qarra yaano barru baala iillannonke fonqolo dandee saꞌꞌate kaaꞌlannonke. Ikkollana Qullaawu Maxaafi kaaꞌlo tenne calla diꞌꞌikkitino. Qullaawu Maxaafi albillittete daafira hagiirsiissanno hexxo kulannonke; tini qolte hegere heeshshowa massitanno doogo anfeemmo gedenna hatte doogo haꞌneemmo gede kaaꞌlitannonke. (Faarso 119:105) Hiittoonni?

Hanni Qullaawu Maxaafi albillittete hexxo daafira kulannota lame doogo laꞌno. Maganu Qaali, 1 hagiirraame heeshsho heeꞌneemmo garanna 2 Kalaqaanchu ledo hegere jaalooma kalaqiꞌra dandiineemmo gara kulannonke.

Qullaawu Maxaafi qarra qeele saꞌꞌate kaaꞌlitanno amaale aannonke; ikkollana Qullaawa Maxaafa wole qarra tirate calla kaaꞌlitanno maxaaffa gede assine laꞌꞌa dihasiissannonke. Qullaawu Maxaafi uminke daafira calla heda agurre wolootu daafirano hendeemmo gede rosiisannonke. Hagiirraame heeshsho heeꞌneemmohu hatto assinummoro callaati.

Lawishshaho hanni “adhannonkunni aannohu baꞌraaꞌrinoho” yaannoha Qullaawu Maxaafiha xintu seera hedi. (Soqqamaasinete Looso 20:35) Qarraminoha laꞌe kaaꞌlootto yanna qulli yitannohe? Woy mitu manni mitiinsinonsa coye hasaaphanna seekkite macciishshootto yanna qaagatto? Qarrantinore kaaꞌlakkinni lowo geeshsha dihagiidhootto?

Baalunkunni roore hagiidhineemmohu, anga qollankere yine hendummokki woloota kaaꞌlineemmoha ikkirooti. Mittu borreessaanchi, “Anga qolahera agadhittokkinni qarramino mancho kaaꞌlattoha ikkiro oottorinni roorsite afiꞌratto” yiino. Hakko iso anga qole afannokki manna uminke fajjonni kaaꞌlineemmoha ikkiro, lowo atoote afiꞌneemmo. Qarrantinore kaaꞌlineemmoha ikkiro Kalaqaanchu ledo mitteenni loonsanni heeꞌnoommo yaa dandiinanni; korkaatuno isi buxanete uyinoonnire isira liqiissinoonnihu gede asse laꞌꞌanno. (Lawishsha 19:17) Yihowa qarrantinore kaaꞌlate assineemmore lowo geeshsha naadanno, hattono gannate ikkitanno uullara hegere heeshsho oye assinoommore baala qolannonke; tini hagiirsiissanno hexxooti!​—Faarso 37:29; Luqaasi 14:​12-14. a

Qullaawu Maxaafi baalunkunni roore hagiirraame heeshsho heeꞌrate kaaꞌlitannonketi halaalaancho Magano Yihowa magansiꞌra ikkitinota kulanno. Maganu Qaali, Yihowara guweenyanna ayirrinye uyinammosira hattono hajajammeemmosi gede jawaachishannonke. (Rosiisaancho 12:13; Yohaannisi Ajuuja 4:​11) Tenne amaale harunsineemmoha ikkiro Kalaqaanchonke hagiirsiinseemmo; kuni qole kaajja coyeeti. Maganu ‘egennaamma ikkitine hagiirsiisseꞌꞌe’ yee amaalinonke. (Lawishsha 27:11) Mitto coye dhoodhineemmo wote Qullaawu Maxaafihu xintu seeri garinni doodhineemmoha ikkiro, iimi Anninke wodana tashshi assineemmo. Mayira? Korkaatuno isi ninkera hedanno daafira biddishshasi harunsine horo afiꞌnammora hasiꞌranno. (Isayaasi 48:​17, 18) Kalqete alamera Aliidiha ikkino Magano magansiꞌratenna iso hagiirsiisanno garinni heeꞌratenni roore tashshi assannori dino!

Qullaawu Maxaafi Kalaqaanchinke ledo jaalooma kalaqiꞌneemmo gede rosiisannonke. Qullaawu Maxaafi, “Maganunniwa shiqqi yiiyye; isino kiꞌnewa shiqqi yaanno” yee amaalannonke. (Yaiqoobi 4:8) Mito wote woꞌmanka dandaanno Kalaqaanchi ledo jaalooma kalaqiꞌra dandaattokkiha lawahera dandaanno. Ikkollana Qullaawu Maxaafi Magano ‘hasiꞌnummoro afiꞌra’ dandiineemmotanna Isi ‘ninkewiinni xeertiꞌrinokkita’ kulannonke. (Soqqamaasinete Looso 17:27) Qullaawu Maxaafi Maganu ledo kalaqiꞌnanni jaaloomi daafira amaalannonke amaale albillittete heeshshonkerano lowo geeshsha kaaꞌlitannote. Hiittoonni?

Hanni tenne hedi: Aye geeshsha sharrammummorono jeefote diina ikkitinota reyo miliqa didandiineemmo. (1 Qorontoosi 15:26) Yihowa kayinni hegere Maganooti. Isi horo direyanno, jaallasino hegerera heedhara hasiꞌranno. Qullaawu Maxaafi giddo nooti “Insa heeshshonsa diri baalunkunni qawaaxxidhe heedhanno” yitanno hedo Yihowa iso hasidhannori hagiirraame heeshsho heedhara hasiꞌrannota leellishshanno.​—Faarso 22:26.

Ikkina hegere geeshsha Maganu ledo jaalooma kalaqiꞌra dandaattohu hiittoonniiti? Qullaawu Maxaafinni isi daafira rosa agurtooti. (Yohaannisi 17:3; 2 Ximootewoosi 3:​16) Qaalesi huwata dandaatto gede kaaꞌlahera huuccatto assiꞌri. Qullaawu Maxaafi, ayyaannasi afiꞌrate agurrummokki ‘Magano huucciꞌnummoro’ Isi aannonketa kulannonke. b (Yaiqoobi 1:​5) Rosootto roso harunsattoha ikkiro, Maganu Qaali xaano ikko hegerera ‘lekkakkira caabbicho, doogokkira xawaabba’ ikkannohe.​—Faarso 119:105.