FAAĀTA o loo e savali i se auala pogisa a ua leva le afiafi. E ui lava ua fai si leva ona goto le lā, ae o loo e iloa pea le auala ona o loo iai sau molī uila e mumū malosi. Pe a e kiina i lalo, e te iloa lelei atu mea o loo i luma tonu o oe. Ae pe a e kiina agaʻi i luma, o le a suluia atu le malamalama ma e iloa atu ai mea o loo mamao atu i luma o oe.

Ua pei le Tusi Paia o lenā molī uila. E pei ona tatou talanoaina i mataupu ua mavae, e mafai ona fesoasoani le Afioga a le Atua ina ia feagai ai ma tulaga o loo tatou fesagaʻia i le taimi lenei, po o faafitauli o loo tatou fesagaʻia i aso taʻitasi i lenei lalolagi lē mautonu. Ae e iai nisi mea ua fesoasoani mai ai le Tusi Paia. Ua saunia mai ai foʻi se vaaiga manino e faatatau i le lumanaʻi, ma ua mafai ai ona tatou iloa atu ma mulimuli i le ala e iʻu atu ai i le fiafia ma le faamalieina tumau. (Salamo 119:105) E faapefea?

Seʻi o tatou talanoaina auala e lua ua aumaia ai e le Tusi Paia iā i tatou se faamoemoe tāua mo le lumanaʻi: 1 Ua fesoasoani mai e maua ai se fuafuaga i o tatou olaga, ma lona 2 o loo aʻoaʻo mai ai le auala e tatou te atiaʻe ai se faauōga tumau ma Lē na faia i tatou.

O loo aumaia i le Tusi Paia fautuaga maufaatuatuaina ina ia feagai ai ma o tatou faafitauli. Peitaʻi, o le Tusi Paia e lē na o se tusi faitau e te saʻili i ai mo ni fautuaga. E lē o faalaeiau i tatou e le Tusi Paia e taulaʻi atu i o tatou popolega. Nai lo o lea, o loo aʻoaʻoina ai i tatou ia iloa o loo i ai sa tatou vaega i se fuafuaga e sili atu, lea e aofia ai mea e sili ona tāua. E na o le pau lenā o le auala e maua ai se fuafuaga tāua i o tatou olaga.

O se faaaʻoaʻoga, o le mataupu silisili lenei o le Tusi Paia: “E sili le fiafia e maua i le foaʻi atu i lo o le talia mai.” (Galuega 20:35) Pe e te manatua se taimi na e fesoasoani ai i se tasi na manaʻomia se fesoasoani i le itu faaletino? Pe atonu foʻi sa iai se taimi na e fesoasoani atu ai e ala i le faalogologo lelei a o sasaa mai e sau uō ona faalogona loloto? Pe e te leʻi lagona le fiafia ona ua e fesoasoani i se tasi ia lelei ona faalogona i lenā aso?

E tatou te matuā lagona le fiafia pe a tatou foaʻi atu  e aunoa ma le faatalitalia o se mea e toe taui mai ai. Na faapea mai se tusitala: “E mautinoa e sili atu le mea e te maua, pe afai e te foaʻi atu e aunoa ma le mafaufau e toe taui mai.” Pe a tatou fesoasoani atu aemaise lava i ē e lē mafai ona toe taui mai i tatou, ua tatou maua se taui. Ua faia so tatou sao i se mea e sili atu ona tāua. Ioe, ua tatou galulue soosootauʻau ma Lē na foafoaina mea, o lē e silasila i na gaoioiga agalelei ua pei o loo nonō atu iā te ia. (Faataoto 19:17) E matuā tāua iā te ia mea e tatou te faia i ē e faatauvaa, ma ua ia folafola mai e tauia i tatou i le ola e faavavau i le lalolagi parataiso, o se faamoemoe e sili ona matagofie mo le lumanaʻi!​—Salamo 37:29; Luka 14:12-14. *

E sili atu i lenā, o loo aʻoaʻoina i le Tusi Paia e mafai ona tatou maua se fuafuaga moni o le olaga, e ala i le tapuaʻi atu i le Atua moni o Ieova. O loo faalaeiau i tatou i lana Afioga ia avatu iā te ia le viiga, le mamalu, ma le usiusitaʻi lea e tatau ona ia mauaina. (Failauga 12:13; Faaaliga 4:11) Pe a tatou faia faapea, ua tatou ausia se mea mataʻina e mafaufau pea i ai: Ua tatou faia se mea e iai sona aafiaga lelei i Lē na faia i tatou. Ua fautua mai o ia e faapea: “Ia atamai oe ma faafiafia ai loʻu loto.” (Faataoto 27:11) Seʻi mafaufau i ai, pe a tatou faia filifiliga atamai e faavae mai i mataupu silisili o le Tusi Paia, ua tatou faafiafiaina la le finagalo o lo tatou Tamā alofa i le lagi. Aiseā? Talu ai e manatu mamafa mai o ia, ma e finagalo ia tatou maua aogā e ala i le mulimuli i ana taʻiala. (Isaia 48:17, 18) O le ā la se isi fuafuaga e sili atu nai lo o lo tatou tapuaʻi atu i le Pule Silisili Ese i le aoao o mea, ma ola i se auala e faafiafiaina ai lona finagalo?

O loo aʻoaʻoina foʻi i tatou i le Tusi Paia ia atiaʻe se faauōga ma Lē na faia i tatou. Ua taʻua i le Iakopo 4:8: “Ia outou mafuta vavalalata atu i le Atua, ona mafuta vavalalata mai lea o ia iā te outou.” O nisi taimi atonu e tatou te lē mautonu, pe e mafai moni ona avea i tatou ma uō a Lē e ona le malosi uma lava na foafoaina mea. Peitaʻi, ua faamautinoa mai i le Tusi Paia pe afai e tatou te “saʻili i le Atua,” o le a tatou “maua o ia” auā “e lē o mamao o ia mai iā i tatou taʻitoʻatasi.” (Galuega 17:27) E matuā tāua mo lo tatou lumanaʻi le fautuaga a le Tusi Paia ia avea ma uō a le Atua. E faapefea?

Seʻi manatu foʻi: Po o ā lava a tatou taumafaiga, e leai se tasi o i tatou e mafai ona sao mai i le fili mataʻutia o le oti. (1 Korinito 15:26) Peitaʻi, e soifua e faavavau le Atua. E lē taitai ona maliu o ia, ma e finagalo foʻi ia ola e faavavau ana uō. Ua faapea mai le Salamo 22:26: “Tau ina ia tumau pea e faavavau o outou loto.” O loo faaaogā i le Tusi Paia nei upu faigofie ma matagofie, e faaleo mai ai le finagalo o Ieova mo ē o loo saʻili atu iā te ia.

E faapefea ona e atiaʻe se faauōga tumau ma le Atua? Ia faaauau ona aʻoaʻoina mea e faatatau iā te ia e ala mai i lana Afioga le Tusi Paia. (Ioane 17:3; 2 Timoteo 3:16) Ia ōle atu mo lana fesoasoani ina ia e malamalama i le Tusi Paia. Ua faamautinoa mai i le Tusi Paia, pe afai e tatou te “ōle atu pea” i le Atua mo le atamai, o le a ia foaʻi mai iā i tatou. * (Iakopo 1:5) O lea, ia taumafai malosi e faatatau mea ua e aʻoaʻoina, ma ia avea le Afioga a le Atua e fai ma ʻsulu i ou vae’ ma le “malamalama i [ou] ala,” i le taimi nei seʻia oo i le faavavau.​—Salamo 119:105.