KON MEKI WI TAKI DATI wan neti yu e waka na tapu wan dungru pasi. Aladi a son saka bun langa kaba, toku yu no e frede fu di yu abi wan bun flashlight na ini yu anu. Te yu e skèin en go na gron, yu man si wantewante pe yu e poti yu futu. Te yu e skèin en go na yu fesi, yu man si bun fara na yu fesi.

Wi kan agersi a Bijbel nanga so wan flashlight. Leki fa wi si na ini den artikel na fesi, dan Gado Wortu kan yepi wi fu lusu den problema di wi e kisi ibri dei na ini a bruya grontapu disi. Ma a no dati wawan. Neleki a flashlight Bijbel e sori wi tu san de bun fara na wi fesi. Disi e yepi wi fu waka wan pasi di o meki wi de koloku fu têgo èn pe wi no o abi nowan broko-ede (Psalm 119:105). Fa so?

Meki wi go luku tu fasi fa Bijbel e gi wi howpu gi a ten di e kon: 1 A e sori wi fa wi kan de koloku trutru, èn 2 a e leri wi fa wi kan tron bun mati fu a Gado di meki wi.

Bijbel e gi wi bun rai di e yepi wi fu lusu problema. Ma Bijbel no e du dati wawan. A no e gi wi deki-ati fu poti prakseri na wi eigi problema, ma a e leri wi taki wi musu broko wi ede nanga trawan tu. Soso te wi e du dati wi o de koloku trutru.

Fu eksempre, luku a Bijbel rai disi: „Wan sma sa de moro koloku te a e gi sani, leki te a e kisi sani” (Tori fu den apostel 20:35). Prakseri fa yu ben e firi di yu yepi wan sma di ben de na nowtu. Noso kande yu ben teki yu ten fu arki wan mati di ben wani lekti en ati. Yu no ben firi koloku taki yu yepi wan sma fu firi switi baka?

Wi o de moro koloku te wi e gi sani sondro fu prakseri taki wi o kisi sani baka. Wan skrifiman ben taki: „Efu wi e gi trawan sani èn wi no e fruwakti fu  kisi wan sani baka, dan furu leisi a e pasa taki wi e kisi moro leki san wi gi.” Èn aladi wi no e fruwakti taki sma o pai wi baka te wi du wan sani gi den, toku wan sma de di o pai wi. Te wi e du sani gi trawan, dan wi e wroko makandra nanga a Gado di meki wi. A e si den bun sani di wi e du gi sma leki wan paiman di a musu pai wi (Odo 19:17). A e warderi den bun sani di wi e du gi mofinasma èn a e pramisi taki a o pai wi nanga têgo libi na ini wan paradijs na grontapu. Dati na wan moi howpu di wi abi gi a ten di e kon!​—Psalm 37:29; Lukas 14:12-14. *

San moro prenspari na taki Bijbel e leri taki wi kan de koloku trutru te wi e dini a tru Gado, Yehovah. En Wortu e gi wi a deki-ati fu prèise en, fu gi en grani èn fu arki en fu di a e frudini dati (Preikiman 12:13; Openbaring 4:11). Prakseri san a wani taki te wi e du dati: Wi kan meki a Gado fu wi firi bun. Na en e taigi wi: „De koni èn meki mi ati prisiri” (Odo 27:11). Sobun, te wi e gebroiki den rai na ini Bijbel fu teki bun bosroiti, dan wi e meki na ati fu wi hemel Papa prisiri. Fu san ede? Fu di a e broko en ede nanga wi èn a wani taki wi teki a tiri fu en so taki sani kan waka bun nanga wi (Yesaya 48:17, 18). Iya, a moro bigi grani di wi abi na fu anbegi a moro Hei Tiriman èn fu libi na wan fasi di e meki en ati prisiri.

Bijbel e leri wi tu taki wi kan tron mati fu a Gado di meki wi. Yakobus 4:8 e taki: „Kon krosibei na Gado èn a o kon krosibei na unu.” Son leisi wi kan tweifri efu wi kan de mati fu a Mekiman di abi ala makti. Ma Bijbel e sori taki wi kan de seiker taki efu wi e ’suku Gado’, wi o „feni en trutru” fu di „a no de fara fu nowan fu wi” (Tori fu den apostel 17:27). A bun fu teki a rai disi fu Bijbel èn fu tron wan mati fu Gado fu di dati o bepaal fa wi libi o waka na ini a ten di e kon. Fa so?

Prakseri a tori disi: Awinsi o furu muiti wi e meki, nowan fu wi kan lon gi a moro bigi feanti fu wi, dati na dede (1 Korentesma 15:26). Ma Gado e libi fu têgo. A no man dede èn a wani taki den mati fu en musu libi fu têgo tu. Bijbel e sori san Yehovah wani gi den sma di e suku en. Nanga wan tu moi wortu a e taigi wi: „Meki a de so, taki un ati tan naki fu têgo.”​—Psalm 22:26.

Fa wi kan de mati fu Gado fu têgo? Tan studeri en Wortu fu leri sabi en (Yohanes 17:3; 2 Timoteyus 3:16). Suku yepi na en fu frustan Bijbel moro bun. Bijbel e leri wi taki efu wi e „tan aksi Gado” fu gi wi koni, dan seiker a o gi wi dati (Yakobus 1:5). * Wan lasti sani na taki yu musu pruberi fu du san yu e leri. Meki Gado Wortu de leki ’wan lampu gi yu futu èn wan leti na tapu yu pasi’, now èn fu ala ten.​—Psalm 119:105.