IMAJINA TOʼOK: Ita laʼo daudauk iha dalan neʼebé nakukun loos iha kalan. Maski nuneʼe, Ita la sente taʼuk tanba Ita kaer lampra ida. Bainhira Ita leno lampra neʼe ba rai Ita bele haree buat neʼebé besik Ita. No bainhira Ita leno lampra neʼe ba oin Ita bele haree dook.

Bíblia mós atu hanesan ho lampra neʼe. Maromak nia liafuan bele ajuda ita atu tahan hasoru problema loron-loron nian. Maibé laʼós neʼe deʼit, Bíblia mós bele ajuda ita atu hatene kona-ba futuru no ajuda ita laʼo iha dalan loos neʼebé sei lori ita ba moris kontente.​—Salmo (Mazmur) 119:105.

Mai ita haree dalan rua oinsá mak Bíblia fó esperansa ba ita kona-ba futuru: 1 Bíblia ajuda ita atu iha objetivu ba ita-nia moris, no 2 Bíblia hanorin ita oinsá atu sai Maromak nia belun ba nafatin.

Bíblia nia matadalan bele ajuda ita atu tahan hasoru problema sira. Bíblia mós hanorin ita atu tau fokus ba buat neʼebé importante liu duké hanoin deʼit kona-ba ita-nia problema rasik. Bainhira ita halo hanesan neʼe, ita-nia moris sei iha objetivu duni.

Porezemplu, Bíblia nia matadalan ida hatete: “Kontente liu atu fó duké simu.” (Apóstolu 20:35) Hanoin kona-ba tempu neʼebé Ita ajuda ona ema, karik Ita fó osan ka hahán, ka karik Ita fó Ita-nia tempu hodi rona ba belun ida bainhira nia laran-susar. Bainhira Ita ajuda ema seluk, Ita sente kontente, loos ka lae?

Ita bele sente kontente liu bainhira ita fó ba ema seluk hodi la hein sira atu selu fali. Hakerek-naʼin ida dehan: “Se ita fó ho laran ba ema seluk, no la hanoin atu sira bele selu fali ita, ita sempre hetan buat diʼak.” Se ita fó ba ema seluk neʼebé mak la bele selu fali, ita sei hetan duni kolen. No hodi halo  nuneʼe, ita hatudu katak ita mak Jeová nia maluk serbisu-naʼin, no katak ita fó-empresta ba Jeová. (Provérbios [Amsal] 19:17) Nia hafolin tebes buat neʼebé ita halo atu ajuda ema kiak, no nia promete atu selu fali ita hodi fó moris rohan-laek mai ita iha mundu paraízu. Neʼe esperansa neʼebé kapás, loos ka lae?​—Salmo (Mazmur) 37:29; Lucas 14:12-14. *

Laʼós neʼe deʼit, Bíblia mós hanorin katak hodi adora Maromak neʼebé loos, Jeová, ita bele iha objetivu ba ita-nia moris. Ninia liafuan anima ita atu halo tuir nia, fó glória no hahiʼi ba nia tanba nia merese simu ida-neʼe. (Eclesiastes [Pengkhotbah] 12:13; Apokalipse 4:11) Bainhira ita halo ida-neʼe, neʼe sei halo ita-nia Kriadór kontente. Loos duni, nia anima ita: “Sai matenek bá no halo haʼu-nia laran kontente.” (Provérbios [Amsal] 27:11) Hodi halo desizaun neʼebé matenek tuir Bíblia nia matadalan, ita bele halo ita-nia Aman iha lalehan laran kontente. Tanbasá? Tanba nia hanoin ita no nia hakarak ita atu hetan buat neʼebé diʼak. (Isaías [Yesaya] 48:17, 18) Hodi adora Maromak no moris tuir ninia matadalan sira, ida-neʼe sei halo nia kontente no mós ajuda ita atu iha objetivu ba ita-nia moris.

Bíblia mós hanorin ita oinsá atu bele habelun ho ita-nia Kriadór. Bíblia dehan: “Hakbesik ba Maromak, no nia sei hakbesik ba imi.” (Tiago 4:8) Karik, dala ruma ita duvida se ema bele sai belun ho Maromak ka lae. Tuir loloos, Bíblia hatete katak se ita “buka” Maromak, ita sei “hetan duni nia”, tanba “nia la dook husi ita ida-idak”. (Apóstolu 17:27) Bíblia nia konsellu kona-ba sai belun ho Maromak bele ajuda ita iha futuru. Oinsá?

Hanoin toʼok: Maski ita hakaʼas an, ita la bele halai sees husi ita-nia inimigu, mate. (1 Korinto 15:26) Maibé Maromak la iha rohan. Nia sei nunka mate, no nia mós hakarak ninia belun sira atu moris ba nafatin. Bíblia esplika katak Jeová hakarak ema atu “haksolok ho sira-nia moris ba nafatin”.​—Salmo (Mazmur) 22:26.

Oinsá mak Ita bele sai Maromak nia belun? Kontinua aprende kona-ba nia liuhusi ninia Liafuan, Bíblia. (João 17:3; 2 Timóteo 3:16) Husu ninia ajuda atubele komprende ninia Liafuan. Bíblia hatete katak se ita “kontinua husu ba Maromak” atu fó matenek ba ita, nia sei fó ida-neʼe. * (Tiago 1:5) Tuirmai, hakaʼas an atu aplika buat neʼebé Ita aprende iha Ita-nia moris, no husik Maromak nia Liafuan sai hanesan “ahi-oan neʼebé leno [Ita-nia] ain” no “fó naroman ba [Ita-nia] dalan” ohin loron no ba nafatin.​—Salmo (Mazmur) 119:105.