TIYERUZGIYI kuti mutenda ndi usiku ndipu kwe mdima. Chinanga kuti pajumpha nyengu yitali kutuliya po lumwi laserere, kweni mufipa mtima cha chifukwa chakuti mwe ndi tochi yo waŵala ukongwa. Asani mwambulika pasi, muwona chechosi cho che panthazi pinu. Asani mwambulika kunthazi, tochi yo watikumbulikiyani nthowa yosi, ndipu muwona patali.

Munthowa yinyaki, Bayibolu liyanana ŵaka ndi tochi wakuŵala ukongwa mwenuyu. Nge mo tawone mu nkhani zajumpha, Mazu ngaku Chiuta ngangatiwovya kumalana ndi masuzgu ngo tosi tikumana nangu zuŵa ndi zuŵa m’charu chiheni ichi. Kweni Bayibolu lingatiwovya so munthowa zinyaki. Ilu lititikambiya so vinthu vo vichitikengi kunthazi. Venivi vititiwovya kuziŵa vo tingachita kuti tisaniyi likondwa chayilu kweniso kuti tikhorwengi ndi vo tenavu. (Sumu 119:105) Kumbi lingatiwovya wuli?

Tiyeni tiwoni nthowa ziŵi zo zilongo mo Bayibolu lititiwovye kulindiza vinthu vamampha kunthazi: 1 Lititiwovya kuziŵa vo tingachita kuti tijengi mwalikondwa, kweniso 2 lititisambiza vo tingachita kuti tije pa ubwezi wambula kumala ndi Mulengi widu.

Bayibolu lipambana ukongwa ndi buku linyaki lelosi chifukwa lititipaska ulongozgi wamampha ukongwa wa mo tingamalisiya masuzgu ngo tikumana nangu. Ilu lititisambiza kuti tikhumbika kuŵanaŵaniya vinthu vakukhumbika ukongwa pa umoyu widu m’malu mwakuŵanaŵaniyanga ŵaka masuzgu ngo tikumana nangu. Kuchita viyo, kutiwovyengi kuja ndi umoyu walikondwa.

Mwakuyeruzgiyapu, wonani fundu ya m’Bayibolu iyi: “Kupaska kuchitiska kuti munthu wakondwengi ukongwa kuluska kulonde.” (Machitidu 20:35) Ŵanaŵaniyani nyengu yo mungupaskapu munthu munyaki vinthu vo wasoŵekanga. Pamwenga so ŵanaŵaniyani zuŵa lo munguvwisiya munyinu wachikukonkhoskiyani masuzgu ngaki. Mutenere kuti mungukondwa ukongwa mumtima mwinu mwati mwawovya munthu munyaki yo wakhumbikanga chovyu.

Tikondwa ukongwa asani tipaska anyidu kwambula kuja ndi mtima wakuti azitiweze kunthazi. Munthu munyaki yo walemba mabuku wakulemba kuti: “Asani  munthu wapereka vinthu ndi mtima wosi kwambula kuŵanaŵaniya kuti azimuweze, vichitiska kuti walonde vinthu vinandi kuphara vo wapereka.” Venivi vilongo kuti asani tipaska ŵanthu anyaki, ukongwa wo tiwona kuti angatiweze cha, titumbikika ukongwa. Ivi vichitisa kuti tiŵanaŵaniyengi vinthu vakukhumbika ukongwa pa umoyu widu. Kukamba uneneska, asani tichita viyo, tigwira ntchitu ndi Mulengi widu. Iyu wawona kuti asani tichitiya lisungu ŵanthu wo akhumbika chovyu, ndikuti titimubwerekesa. (Nthanthi 19:17) Yehova wawonga ukongwa asani tiwovya ŵanthu wo akhumbika chovyu. Iyu walayizga kuti wazakutiweze mwa kutipaska umoyu wamuyaya m’Paradayisu pacharu chapasi. Ivi ndi vinthu vamampha ukongwa vo tilindiza kunthazi.—Sumu 37:29; Luka 14:12-14. *

Kuphara vosi, Bayibolu lititisambiza kuti tingaja mwalikondwa asani tisopa Chiuta wauneneska Yehova. Mazu ngaki ngatitichiska kuti titenere kumuthamika, kumupaska ulemu kweniso kumuvwiya. (Wakutaula 12:13; Chivumbuzi 4:11) Asani tichita viyo, tifiska chinthu chinyaki chakuzirwa ukongwa cho nkhukondweska Mulengi widu. Iyu watitikambiya kuti: “Uje wazeru . . . ndipu ukondwesi mtima wangu.” (Nthanthi 27:11) Aŵanaŵaniyani fundu iyi. Asani tisankha vinthu mwazeru mwakukoliyana ndi fundu za m’Bayibolu, tikondweska mtima wa Awusefwi akuchanya wo atitiyanja ukongwa. Ntchifukwa wuli tikamba viyo? Chifukwa chakuti iyu watitiŵanaŵaniya ukongwa ndipu wakhumba kuti tiyanduwi chifukwa chakulondo ulongozgi waki. (Yesaya 48:17, 18) Kukamba uneneska, kusopa Yehova yo ndi Fumu ya chilengedu chosi kweniso kuchita vinthu vo vitimukondweska, kungatiwovya kuti tijengi mwalikondwa.

Bayibolu lititisambiza so vo tingachita kuti tije pa ubwezi ndi Mulengi widu. Ilu likamba kuti: “Ndereni kufupi ndi Chiuta, ndipu nayu wanderengi kufupi ndi yimwi.” (Yakobe 4:8) Nyengu zinyaki tingakayikiya asani vingachitika nadi kuja pa ubwezi ndi Mulengi yo ngwanthazizosi. Kweni Bayibolu lititisimikiziya kuti asani ‘tipenja Chiuta,’ ‘timusaniyengi’ chifukwa chakuti iyu “we kutali cha ndi weyosi waku isi.” (Machitidu 17:27) Ulongozgi wa m’Bayibolu wo ungatiwovya kuti tije pa ubwezi ndi Chiuta, ngwakukhumbika ukongwa kuti tizisaniyi umoyu wamuyaya kunthazi. Ntchifukwa wuli tikamba viyo?

Ŵanaŵaniyani fundu iyi: Kaya tingayesesa wuli, pakutija tingamuthaŵa cha murwani widu yo ndi nyifwa. (1 Akorinto 15:26) Kweni Chiuta walivi chiyambi kweniso umaliru. Iyu wazamukufwa cha ndipu wakhumba so kuti mabwezi ngaki ngajengi kwamuyaya. Bayibolu likonkhoska mazu ngakukondweska ukongwa ngo ngalongo vo Yehova wakhumba kuchitiya ŵanthu wo atimupenja. Ilu likamba kuti: “Mukondwi ndi umoyu kwamuyaya.”—Sumu 22:26.

Kumbi mungachita wuli kuti mulutirizi kuja pa ubwezi ndi Chiuta mpaka muyaya? Lutirizani kusambira vakukwaskana ndi iyu mwa kuŵerenga Mazu ngaki Bayibolu. (Yohane 17:3; 2 Timote 3:16) Mumupemphengi kuti wakuwovyeni kuvwisa Malemba. Bayibolu lititisimikiziya kuti asani ‘tilutiriza kupempha Chiuta’ kuti watipaski zeru, iyu watipaskengi. * (Yakobe 1:5) Pakumaliya, muyesesengi kugwirisiya ntchitu vo musambira kweniso muwonengi Mazu ngaku Chiuta nge ndi “nyali ku malundi” nginu ndipuso nge “ukweru wo umbulika panthowa” yinu nyengu zosi.—Sumu 119:105.