TINGIM olsem em apinun tru na yu wokabaut long wanpela rot. Maski san i go daun pinis, yu no pilim olsem yu bai lus bikos yu holim wanpela tos i gat strongpela lait. Taim yu putim lait bilong tos i go daun long rot, yu inap lukim gut ol samting i stap long fran. Na taim yu apim tos na putim lait i go long fran, strongpela lait bilong en i givim lait long rot yu bai wokabaut long en.

Baibel i kain olsem dispela tos. Olsem yumi stori long ol atikol i kamap paslain, Tok Bilong God inap helpim yumi long karim ol hevi—ol hevi yumi bungim long olgeta wan wan de. Na tu, Baibel i tokim yumi long ol samting bai kamap bihain, na yumi lukim na bihainim rot we inap helpim yumi long i stap amamas na belgut. (Song 119:105) Wai na yumi inap tok olsem?

Yumi ken stori long 2-pela samting em Baibel i mekim bilong helpim yumi: 1 Em i helpim yumi long save olsem laip i gat mining, na 2 em i skulim yumi long kamap pren bilong Krieta inap oltaim oltaim.

Baibel i kamapim gutpela edvais bilong helpim yumi long karim ol hevi. Na tu, em i no kirapim yumi long tingim hevi bilong yumi yet tasol, nogat, em i skulim yumi long tingim tu ol narapela. Long dispela rot, laip bilong yumi i gat mining.

Tingim dispela stiatok bilong Baibel: “Amamas bilong givim samting i winim amamas bilong kisim samting.” (Aposel 20:35) Yu inap tingim wanpela taim we narapela i sot tru long klos, kaikai, o mani, na yu helpim em? O ating yu putim yau long wanpela pren na larim em i kamapim ol tingting i stap long bel bilong em? Taim yu mekim ol dispela samting, ating yu yet i kisim bikpela amamas, laka?

Yumi kisim bikpela amamas tru taim yumi givim ol samting long ol narapela na yumi no tingting long ol bai bekim dispela samting. Wanpela man bilong raitim buk i tok: “Sapos yu givim bel olgeta long helpim narapela, yu bai kisim planti samting moa winim ol samting yu givim—dispela bai kamap  sapos yu givim helpim na yu yet i no tingting long kisim wanpela pe.” Tasol tru tru yumi save kisim pe taim yumi givim bel olgeta long helpim narapela—moa yet em ol man husat i no gat rot bilong bekim gutpela pasin bilong yumi. Yumi mekim yumi yet i kamap wanwok bilong ol narapela. Yumi wok bung wantaim God—em i tingim gutpela pasin bilong yumi olsem dinau em i mas bekim. (Sindaun 19:17) Em i tingim tru ol samting yumi mekim bilong helpim ol man nating, na em i tok promis long givim gutpela pe tru long yumi—em laip oltaim long Paradais long graun! Dispela em gutpela samting tru yumi ken bilip na wet long en!—Song 37:29; Luk 14:12-14. *

Baibel i tok laip bilong yumi bai i gat mining sapos yumi lotuim Jehova, em God tru. Baibel i kirapim yumi long preisim, onarim, na bihainim tok bilong God. (Saveman 12:13; Revelesen 4:11) Taim yumi mekim olsem, gutpela samting tru i kamap: Yumi mekim Krieta bilong yumi i amamas. Olsem na em i tok: “Yu mas kisim gutpela tingting na save na bai mi belgut tru.” (Sindaun 27:11) Tingim: Taim yumi bihainim ol stiatok bilong Baibel na mekim gutpela disisen, yumi amamasim tru Papa bilong yumi long heven. Bilong wanem? Em i tingim tru yumi na em i laik helpim yumi, olsem na em i laik bai yumi bihainim tok bilong em. (Aisaia 48:17, 18) Laip bilong yumi bai i gat mining tru bilong en sapos yumi lotuim King bilong heven na graun na mekim em i belgut!

Baibel i skulim yumi long kamap pren bilong Krieta bilong yumi. Baibel i tok: “Yupela i mas i go klostu long God, na em bai kam klostu long yupela.” (Jems 4:8) Krieta em Man i gat olgeta strong, olsem na yumi inap kisim tupela tingting olsem ating i no gat rot long kamap pren bilong em. Tasol Baibel i tok sapos yumi “painim God,” yumi bai “painim em tru” bikos “em i no stap longwe long yumi olgeta wan wan.” (Aposel 17:27) Baibel i givim gutpela edvais bilong kirapim yumi long kamap pren bilong God bikos dispela bai helpim laip bilong yumi long bihain. Olsem wanem dispela bai helpim yumi?

Tingim: Maski yumi traim olgeta kain rot, i no gat wanpela bilong yumi inap ranawe long nambawan birua bilong yumi—dai. (1 Korin 15:26) Tasol God i save stap oltaim oltaim. Em i no inap tru long i dai, na em i laik bai ol pren bilong em tu i stap laip inap oltaim oltaim. Baibel i mekim naispela tok i soim klia samting em Jehova i laik givim long ol man i lotuim em: “God i ken mekim ol i stap gut oltaim.”—Song 22:26.

Hau bai yu inap i stap pren bilong God inap oltaim? Wok yet long kisim save long em long rot bilong Baibel. (Jon 17:3; 2 Timoti 3:16) Askim em long helpim yu long kliagut long tok bilong Baibel. Baibel i tok sapos yumi “wok long askim God” long givim savetingting long yumi, em bai givim long yumi. * (Jems 1:5) Wok strong long bihainim ol save yu kisim na larim Tok Bilong God i stap olsem “lam bilong helpim [yu] long wokabaut stret” na olsem “lait bilong soim rot long [yu].”—Song 119:105.