WESISANIRIZE ngu oli mukurubata omu bwire bwakairirizi. N’obukiraaba ngu izooba limazire kulenga, torukutiina habwokuba oine toci ey’amaani. Obwogimulika hansi, ororra kimu byona ebiri hansi. Kandi obwogimulika omu maiso nambere orukugenda, ekyererezi kyayo kikukonyera kurora ebiri hara.

Omu mulingo nugwo gumu, Baibuli nayo eri nka toci. Nk’oku tuboinege omu bicweka eby’enyuma, Ekigambo kya Ruhanga nikisobora kutukonyera omu kasumi kanu​—muno muno omu bizibu ebiturukutangana buli kiro omu nsi enu etarukwesigwa. Baitu Baibuli tegarukiraaho, etukonyera n’okumanya ebintu ebirabaho omu maiso. Kandi kinu kitukonyera kurora ebitusemeriire kukora n’okurubatira omu muhanda ogurumu okusemererwa n’okumarwa. (Zabuli 119:105) Omu mulingo ki?

Katubazeeho emiringo ebiri Baibuli esobora kutukonyeramu kuba n’okunihira habw’obusumi obw’omu maiso: 1 Etukonyera kuba n’ekigendererwa omu bwomeezi, kandi 2 etwegesa n’omulingo tusobora kuba n’enkoragana enungi na Ruhanga etalihwaho.

Baibuli etuha obuhabuzi oburukwesigwa, obusobora kutukonyera kuraba omu bizibu byaitu kandi n’ekira ebitabu ebindi byona eby’obuhabuzi. Baibuli tetuletera kutekerezaaho ebizibu byaitu kwonka, baitu etwegesa n’okutekerezaaho ensonga ezindi enkuru. Kandi eki nikyo kiretera obwomeezi bwaitu kuba n’ekigendererwa.

Nk’ekyokurorraho, tekerezaaho omusingi gunu kuruga omu Baibuli: “Okugaba kwomugisa okukira okuhebwa.” (Engeso Ezabakwenda 20:35) Noijuka obuwakonyire omuntu wamuha ekintu eky’akaba nayetaaga? Rundi obuwahaireyo obwire bwawe kuhuliiriza omunywani arukukusoborra obujune bwe? Okehurra ota obuwakonyire omuntu ondi omu miringo egi?

Tutunga okusemererwa kw’amaani obutukonyera abantu abandi tutarukunihira ngu nabo nibaija kutukonyera. Omuhandiiki omu ow’ebitabu akagamba:  “Tosobora kwehayo kukonyera abandi otagasiirwe​—kakuba oyehayo otarukunihira kutunga empera.” Baitu, obwoyehayo kukonyera abandi​—na muno muno abo abatasobora kukusasura​—Mali otunga empeera. Omu mulingo ogu tuba nitufaaho abantu abandi. Mali, tuba nitukorra hamu n’Omuhangi waitu, ow’arora ebikorwa nk’ebyo eby’embabazi nk’ibanja ery’aine kutusasura. (Enfumo 19:17) Ruhanga n’asiima byona ebitukora kukonyera boona abali omu bwetaago kandi aturaganiza ngu naija kutusasura n’obwomeezi obutahwaho omu nsi empyaka​—mali okunihira kunu kakurungi habw’obusumi obw’omu maiso!​—Zabuli 37:29; Luka 14:12-14. *

Baitu ekirukukira obukuru kiri ngu, Baibuli etwegesa nk’oku kuramya Yahwe Ruhanga ow’amananu, nikyo kitukonyera kuba n’ekigendererwa ekihikire omu bwomeezi bwaitu. Kandi Ekigambo kye kitutererra kukora ebintu ebimusemeriire nk’okumukugiza, kumutekamu ekitinisa hamu n’okumworobera. (Omugambizi 12:13; Okusuku’rwa 4:11) Obutukora tuti, tuhikiriza ekintu eky’omuhendo mwingi: Kusemeza Omuhangi waitu. Kandi atutererra ngu: ‘Tufooke b’amagezi . . . tusemeze omutima gwe.’ (Enfumo 27:11) Tekerezaaho kinu​—obutukora encwamu ez’amagezi ezirukusigikirra ha misingi ya Baibuli, tuletera Isitwe ow’omwiguru kusemererwa. Habwaki? Habwokuba Ruhanga natufaaho kandi nagonza tugasirwe omu kuhondera obuhabuzi bwe. (Isaya 48:17, 18) Mali, busaho kigendererwa kyona ekirukukira kuramya Omulemi w’obuhangwa bwona n’okukora ebirukusemeza omutima gwe.

Baibuli n’etwegesa kufooka banywani ba Ruhanga. Ebyahandiikirwe bitugambira ngu: “Muirre haihi Ruhanga, nauwe alibairra haihi.” (Yakobo 4:8) Obumu, nitusobora kugurukyagurukya obukiraaba nikisoboka kufooka banywani ba Ruhanga ow’Obusobozi bwona. Baitu Baibuli n’etugumya ngu kakuba ‘tuserra Ruhanga,’ nitwija “okumuzora “ habwokuba “tali hara nomu wena haliitwe.” (Engeso Ezabakwenda 17:27) Kuhondera obuhabuzi bwa Baibuli obw’okufooka banywani ba Ruhanga kikuru muno habwokuba nitwija kutunga obusumi obw’omu maiso oburungi. Omu mulingo ki?

Tekerezaaho kinu: N’obutwakulengaho tuta titusobora kwiruka omunyanzigwa waitu arukukirayo​— nukwo okufa. (1 Abakolinso 15:26) Baitu, Ruhanga ayomerra ebiro byona. Talifa, kandi n’agonza n’abanywani boona kwomerra ebiro byona. Baibuli n’ekozesa ebigambo binu ebirungi kwoleka Yahwe ekyarukugondeza abo boona abarukumuserra: “Mwomerre omu kusemererwa ebiro byona.”​—Zabuli 22:26, NW.

N’osobora ota kwombeka obunywani na Ruhanga obutalihwaho? Kakuba ogumizaamu n’omwegaho kurabira omu Baibuli. (Yohana 17:3; 2 Timoseo 3:16) Musabe akukonyere kusobora kwetegereza Ebyahandiikirwe. Baibuli n’etugumya ngu kakuba twikara ‘nitusaba Ruhanga’ amagezi, naija kugatuha. * (Yakobo 1:5) Eky’okumalirra, wekambe kuta omu nkora ebyorukwega, kandi oikirize Ekigambo kye kibe ‘etabaza hali ebigere byawe’ kandi ‘omusana hali omuhanda gwawe’​—hati n’ebiro byona.​—Zabuli 119:105.