TIYELEZGERE kuti mukwenda mu kanthowa kanyake usiku. Nangauli kwafipa, kweni mukopa yayi chifukwa muli na tochi wankhongono. Mwati mwalika, mukuwona makora chomene. Kweniso para mwalika kunthazi, mukuwona makora chomene.

Baibolo nalo ndimo liliri. Nga umo tawonera mu nkhani izo zajumpha, Baibolo lingatovwira kugega masuzgo kweniso umo tingachitira na masuzgo agho tikusangana nagho. Baibolo lingatovwiraso kumanya ivyo vichitikenge munthazi, na kutovwira kuti tende makora mu nthowa yakuya ku umoyo wamuyirayira uko tizamukondwa na kukhorwa na umoyo. (Salimo 119:105) Kasi ivi vizamuchitika wuli?

Wonani nthowa ziŵiri izo Baibolo likutovwilira kuŵa na chigomezgo cha munthazi: 1 Likutovwira kuŵa na chilato pa umoyo, na 2 likutisambizga ivyo tingachita kuti tikhozge ubwezi withu na Mlengi.

Baibolo likutipa ulongozgi uwemi chomene wa umo tingachitira na masuzgo. Ni buku lakovwira chomene ndipo likupambana chomene na mabuku ghanyake. M’malo mwakuti tiŵikenge waka maghanoghano pa masuzgo ghithu, Baibolo likutovwira kuŵa na chigomezgo cha munthazi apo tizamuŵa na umoyo wakukhorweska.

Baibolo pa Milimo 20:35 likuti: “Uyo wakupeleka wakukondwa chomene kuluska uyo wakupokera.” (Milimo 20:35) Kasi mphawuli apo mukawovwirapo munthu wakusoŵerwa panji kutegherezga chomene apo mubwezi winu wakamuphaliraninge masuzgo ghake? Kasi mukakondwa yayi kovwira munthu wakusoŵerwa kuti nayo vimwendere makora?

Tikukondwa chomene para tikupeleka na chilato chakuti uyo tamupa wakazatipeso yayi. Munthu  munyake wakati: “Para tikupeleka kanandi tikusangaso vinandi kuluska ivyo tapeleka, chikuru tikupeleka kwambura kukhazga kuti ŵatiwezgerenge.” Tikutumbikika chomene usange tikupeleka, chomene usange tikupeleka ku ŵanthu awo mbakuti ŵangatiwezgera yayi. Nadi, para tikuchita nthena ndikuti tikugwilira lumoza ntchito na Mlengi, uyo wakuwona kuti para talongora munthu lusungu ndikuti tabwerekeska iyo. (Zintharika 19:17) Chiuta wakukondwa chomene para tawovwira ŵakusoŵerwa, ndipo wakutilayizga kuti wazamutipa chawanangwa cha umoyo wamuyirayira mu paradiso.—Salimo 37:29; Luka 14:12-14. *

Chakukondweska ntchakuti, Baibolo likutisambizga kuti tingaŵa na umoyo wakukhorweska para tikusopa Chiuta waunenesko, Yehova. Baibolo likutichiska kuti tikwenera kumulumba, kumuchindika, na kumupulikira. (Mupharazgi 12:13; Chivumbuzi 4:11) Para tikuchita nthena, vikutovwira kuti tighanaghanirenge fundo yakuzirwa chomene yakuti Yehova wakukondwa chomene para tikuchita ivi. Nakuti iyo wakutichiska kuti: “Uŵe wavinjeru . . . na kukondweska mtima wane.” (Zintharika 27:11) Para tikusankha vinthu kuyana na ivyo Baibolo likuyowoya, tikukondweska mtima wa Adada ŵithu ŵakuchanya. Chifukwa wuli? Chifukwa ntchakuti ŵakutipwelelera ndipo ŵakukhumba kuti vinthu vitenderenge makora para talondezga ulongozgi wawo. (Yesaya 48:17, 18) Nadi, ntchakukondweska chomene kuti tikusopa na kukondweska Fumu yachilengiwa chose.

Baibolo likutisambizgaso kuti tikwenera kukhozga ubwezi na Mlengi withu. Baibolo likuti: “Sendelerani kwa Chiuta, ndipo iyo wasendelerenge kwa imwe.” (Yakobe 4:8) Nyengo zinyake tingakayika usange munthu wangaŵa nadi paubwezi na Mlengi wankhongono zose. Kweni Baibolo likutisimikizgira kuti para ‘tikumupenja Chiuta, timusangenge’ chifukwa iyo “wali kutali yayi na waliyose wa ise.” (Milimo 17:27) Kuŵa paubwezi na Chiuta nkhwakuzirwa chomene kuti vinthu vizakatendere makora munthazi. Mwawuli?

Wonani fundo iyi: Nanga tingayezga wuli, palije icho tingachita kuti tigwenthe nyifwa. (1 Ŵakorinte 15:26) Kweni Yehova ngwamuyirayira. Iyo wazamufwapo yayi, ndipo wakukhumba kuti ŵabwezi ŵake nawo ŵazakakhalenge kwamuyirayira. Yehova wakuyowoya fundo yakukondweska chomene kwa wose awo ŵakumupenja, wakuti: “Mukondwe na umoyo muyirayira.”—Salimo 22:26.

Kasi mungachita wuli kuti muŵe paubwezi na Chiuta kwamuyirayira? Mukwenelera kulutilira kusambira Baibolo. (Yohane 17:3; 2 Timote 3:16) Mupemphani kuti wamovwirani kupulikiska Baibolo. Baibolo likusimikizgira kuti para ‘tamulomba Chiuta’ na mtima wose kuti watipe vinjeru, iyo wazamutipa. * (Yakobe 1:5) Paumaliro, ŵikanipo mtima kulondezga ivyo mukusambira, na kuzomerezga kuti Mazgu gha Chiuta ghaŵe ‘nyali ku malundi ghinu’ kwamuyirayira.—Salimo 119:105.