NOPA awaʼiy te yakat ta beel ta ijkʼal kʼinal ta tut be. Manchukme chʼayix bael te Kʼajkʼale, maba kʼax chʼayem ya awaʼiy aba, melel awichʼoj jchʼix foko. Te kʼalal ya atuch koele chikan ta ilel ta lek te bintik ay ta atojole. Te kʼalal ya atuch moele namalto ya xchiknaj te bee.

Jaʼ jich kʼoem te Biblia te bitʼil te foko-abi. Jich bitʼil la kiltikix ta yantik articuloetik, te sKʼop Dios ya skoltayotik ta sitintayel te wokoliletik te ay ta jtojoltike, jich bitʼil te bintik ya xkʼax ta jtojoltik ta jujun kʼajkʼal te ma naʼbiluk kuʼuntike. Pero ma jaʼuknax-abi. Jaʼnix jich ya yakʼ jnaʼtik te bin ya xkʼot ta pasel ta pajel chaʼbeje, melel ya yakʼ kiltik te be te ya x-ikʼawan bael ta stael te tseʼel-oʼtanil sok te ya skoltayotik ta stʼunele (Salmo 119:105). ¿Bin-utʼil ya spas?

Akʼa kiltik chaʼchajp bin-utʼil ya skoltayotik te Biblia ta stael te lekil kuxlejalil ta pajel chaʼbej: 1 Ya yakʼbey swentail te jkuxlejaltik sok 2 ya snojptesotik ta yamigoinel ta sbajtʼelkʼinal te Jpaswanej kuʼuntike.

Te Biblia ya yakʼbotik lekil tojobtesel yuʼun ya jsitintaytik te wokoliletike, kʼaxemtoxan-a te bitʼil yantik libroetik te ya yakʼik koltayele. Jaʼnix jich ya snojptesotik te ma jaʼuknax ya xbajtʼ ta koʼtantik te bintik ya jmel koʼtantik yuʼune, ya skʼan ya kichʼtik ta wenta te yantike. Teme jich ya jpastike ayme swentail ya xkʼot te jkuxlejaltike.

Nopa awaʼiy ta swenta te mantalil yuʼun te Biblia ini: «Ha bayel xan yutsil te machʼa ay bin ya yacʼ te bin utʼil ay bin ya yichʼ» (Hechos 20:35). ¿Aybal bin-ora ay machʼa la akoltay te maʼyuk stakʼin-ae? ¿O te la achʼambey awaʼiy skʼop jtul awamigo te la scholbat te bin yaʼiyel ya yaʼiy sba-ae? ¿Mabal jichuk te lek la awaʼiy aba te kʼalal ay machʼa la awakʼbey stseʼelil yoʼtane?

Kʼalal ma jmaliytik sujtib te bin ya kakʼtike ya yakʼbotikxan stseʼelil koʼtantik. Jtul winik jich la stsʼibay:  «Te kʼalal ya kakʼbeytik koltayel te yantike jaʼ bayalxan te bintik ya kichʼtik sujtesbeyele, jaʼnax teme yuʼun-nix maba ya jmaliybeytik sujtib-ae». Pero te kʼalal ya jpastik tulan ta skoltayel te yantike, jich bitʼil te machʼatik ma xjuʼ yuʼunik sujtesele, ay bin ya jtatik yuʼun. Kichʼojtik te mukʼul majtʼanil yuʼun pajal ya x-aʼtejotik sok te Jpaswanej kuʼuntik te jich ya yaʼiy sba te ay sbet ta jtojoltik te kʼalal ya kakʼbeytik yil yutsil koʼtantik te yantike (Proverbios 19:17). Te Diose bayal skʼoplal ta yoʼtan te bintik ya jpastik ta stojol te yantik sok jamal yaloj te ya stojbotik ta swenta kuxlejalil sbajtʼelkʼinal ta jun nichimal kʼinal liʼ ta Balumilal. ¡Kʼax lek te bin ya yakʼ jmaliytike! (Salmo 37:29; Lucas 14:12-14). *

Pero te bin mukʼxan skʼoplal ya yakʼ ta nopel te Biblia yuʼun ay swentail ya xkʼot te jkuxlejaltike jaʼ te ya skʼan ya kichʼtik ta mukʼ te Jehová, te smelelil Diose. Te sKʼope ya stij koʼtantik yuʼun ya kalbeytik yutsilal, yichʼel ta mukʼ sok te jaʼnax ya skʼan ya jchʼuunbeytik te smantale (Eclesiastés 12:13; Apocalipsis 4:11). Te kʼalal jich ya jpastike ay bin kʼax lek ya xlokʼ kuʼuntik-a, jaʼ te ya kakʼbeytik stseʼelil yoʼtan te Jpaswanej kuʼuntike. Jaʼ jich ya skʼanbotik: «Jnichʼan, ayuc me spʼijil awoʼtan, hich me yac awacʼ tseʼejinuc coʼtan» (Proverbios 27:11). ¿Aybal jich anopoj-abi? Te kʼalal ya kichʼtik ta swenta te tsitsel yuʼun te Biblia te kʼalal ay bin ya jnoptik spasel ta jkuxlejaltike, yame kakʼbeytik stseʼelil yoʼtan te jTatik te ay ta chʼulchane. ¿Bin yuʼun? Melel ay jkʼoplaltik ta yoʼtan sok ya skʼan te ya jtʼunbeytik te tsitsel yuʼun swenta lek ya xkʼootik ta lokʼel-a (Isaías 48:17, 18). Jich yuʼun ¿aybal bin yan ya yakʼbey swentail te jkuxlejaltik jich bitʼil te yichʼel ta mukʼ te Mukʼul Ajwalil yuʼun chʼulchan sok Balumilal sok te ya kakʼbeytik stseʼelil yoʼtane?

Te Biblia jaʼnix jich ya snojptesotik bin-utʼil ya xjuʼ ya kamigointik te Jpaswanej kuʼuntike. Jich ya yal: «Nohpojanic ta stojol Dios, hich ya xnohpoj ta atojolic» (Santiago 4:8). Ayniwan ma schʼuun koʼtantik te ya xjuʼ ya kamigointik te Jpaswanej te spisil ya xjuʼ yuʼune. Pero jamal ya yal te Biblia teme ya jletik te Diose yame jtatik, melel «ma ba namal ay ta jtojoltic» (Hechos 17:27). Ta stʼunel te tsitsel ya yakʼ te Biblia ta swenta yamigoinel te Diose, ¿bin yuʼun jaʼ ya skoltayotik yuʼun ya schajpanotik ta swenta te pajel chaʼbeje?

Nopa awaʼiy ini: manchukme ya jpastik tulan yuʼun maba ya staotik te lajele, ma xjuʼ ya x-anotik ta stojol te jkontratik-abi (1 Corintios 15:26). Yan stukel te Diose sbajtʼelkʼinal kuxul, maʼyuk bin-ora ya xlaj sok ya skʼan te ya xkuxinik ta sbajtʼelkʼinal-euk te yamigotake. Te Jehová jich ya yal ta tʼujbil kʼopetik te skʼanojel yoʼtan ta stojol te machʼatik ya xleot yuʼune: «Cuxul ya xhil awoʼtanic sbahtel qʼuinal» (Salmo 22:26).

Pero ¿bin-utʼil ya xjuʼ ya awamigoin ta sbajtʼelkʼinal te Diose? Jaʼ te kʼalal maba ya awijkʼitay ta snopel te sKʼope, melel tey ya anaʼbeyxan sba-a (Juan 17:3; 2 Timoteo 3:16). Kʼanbeya koltayel yuʼun ya xkʼot ta awoʼtan te bin ya anope. Te Biblia jamal ya yal te ya yakʼbotik spʼijil koʼtantik te Dios teme sok spisil koʼtantik maba ya jkom jbatik ta skʼanbeyele * (Santiago 1:5). Ta slajibal pasa tulan yuʼun ya apas ta akuxlejal te bintik ya anop ta sKʼop Diose, jaʼme jich «tsumbil cʼahcʼ» ya xkʼot awuʼun ta ora ini sok jaʼme «ya sacubtes te be» awuʼun ta sbajtʼelkʼinal (Salmo 119:105).