EDZANI u vhona nga maṱo a muhumbulo ni tshi khou tshimbila vhusiku nahone kha nḓila ine na khou tshimbila khayo hu na swiswi ḽihulu. Naho hu kale ḓuvha ḽo kovhela, ni nga si xele ngauri no fara thotshi ine ya vha na tshedza tshihulwane. Musi ni tshi vhonetshela fhasi, ni a ṱavhanya u vhona zwavhuḓi zwithu zwine zwa vha phanḓa haṋu. Nahone musi ni tshi vhonetshela phanḓa, tshedza tshayo tshi kona u vhonetshela u swika kule vhukuma.

Nga hu fanaho, Bivhili i tou nga yeneyo thotshi. Samusi ro zwi guda kha thero dzo fhiraho, Ipfi ḽa Mudzimu ḽi nga ri thusa u vhona zwithu zwine zwa vha phanḓa hashu nga u ṱavhanya—thaidzo dzine roṱhe ra sedzana nadzo ḓuvha ḽiṅwe na ḽiṅwe kha ḽino shango. Fhedzi Bivhili i ita zwo engedzeaho. I dovha ya ri thusa uri ri kone u vhona zwithu zwa tshifhingani tshi ḓaho na u ri thusa uri ri kone u dzula ro takala u swika nga hu sa fheli. (Psalme ya 119:105) Nga nḓila-ḓe?

Kha ri ṱhogomele nḓila mbili dzine Bivhili ya nga ita ngadzo uri ri vhe na fulufhelo ḽo khwaṱhaho nga ha vhumatshelo: 1 I ri thusa uri ri vhe na tshipikwa vhutshiloni nahone 2 i ri funza nḓila ine ra nga vha ngayo na vhushaka ha tshoṱhe na Musiki washu.

Bivhili i ri ṋea nyeletshedzo ine ra nga i fulufhela ya nḓila ine ra nga tandulula ngayo thaidzo dzashu, fhedzi yo fhambana na bugu zwayo ya u thusa u piringulula vhuleme. Bivhili a i ri ṱuṱuwedzi uri ri dzule ro livhisa ṱhogomelo kha zwine zwa ri vhilaedzisa, fhedzi i ri gudisa uri ri kone u livhisa ṱhogomelo kha zwithu zwa ndeme vhutshiloni nṱhani ha u livhisa ṱhogomelo kha riṋe vhaṋe na mbilaelo dzashu. Zwenezwo zwi ita uri ri kone u ḓivha uri ri khou tshilela mini.

Sa tsumbo, ni nga shumisa nyeletshedzo ine ya vha Bivhilini ine ya ri: “U ṋea zwi ḓisa dakalo ḽihulu u fhira u ṋewa.” (Mishumo 20:35) Naa ni a humbula tshifhinga tshee na vhuya na thusa muṅwe muthu nga zwithu zwine a zwi ṱoḓa? Kana naa no thetshelesa nga vhuronwane musi khonani yaṋu a tshi ni tevhulela zwoṱhe zwi re mbiluni yawe? Naa a no ngo pfa no takala musi no thusa muṅwe muthu uri a vhe na ḓuvha ḽavhuḓi?

Ri takala vhukuma musi ri tshi ṋea ri songo lavhelela tshanḓa iya tshanḓa vhuya. Muṅwe muṅwali o ri: “Kanzhi  a zwo ngo leluwa u ṋea muthu tshithu ni songo lavhelela u wana zwo engedzeaho u fhira zwe na mu ṋea​—nga nnḓa ha musi no ṋea ni songo lavhelela u wana tshithu murahu.” Naho zwo ralo, ri a vhuyelwa musi ri tshi ṋea vhaṅwe, zwihuluhulu vhane vha nga si ri ṋee tshithu murahu. Ri a vhuyelwa vhukuma. Ri vha ri tshi khou shumisana na Musiki, ane a vhona zwine ra zwi ita zwi tshi nga ri khou zwi itela ene. (Mirero 19:17) U dzhiela nṱha zwine ra zwi itela vhashayi nahone u fulufhedzisa uri u ḓo ri ṋea vhutshilo vhu sa fheli paradisoni kha ḽifhasi​—ḽeneḽo ndi fulufhedziso ḽi takadzaho ḽa tshifhingani tshi ḓaho!​—Psalme ya 37:29; Luka 14:12-14. *

Zwa ndeme vhukuma, Bivhili i ri gudisa uri ri nga vha na tshipikwa vhutshiloni arali ri tshi gwadamela Yehova ane a vha Mudzimu wa ngoho. Ipfi ḽawe ḽi ri ṱuṱuwedza uri ri mu rende, u mu hulisa na u mu thetshelesa. (Muhuweleli 12:13; Nzumbululo 4:11) Musi ri tshi ita nga u ralo, ri vha ri tshi khou khunyeledza zwiṅwe zwithu zwavhuḓi zwine ra nga humbula nga hazwo: Zwine ra zwi ita zwi kwama Musiki washu. Vhukuma, u ri ṱuṱuwedza uri: ‘Ri ṱalifhe, ri takadze mbilu yawe.’ (Mirero 27:11) Humbulani uri musi ri tshi dzhia phetho dzine dza tshimbidzana na zwine Bivhili ya zwi funza, ri takadza mbilu ya Khotsi ashu wa ṱaḓulu. Ndi ngani? Ngauri u na ndavha na riṋe nahone u ṱoḓa ri tshi vhuyelwa nga u tevhela vhulivhisi hawe. (Yesaya 48:17, 18) A huna tshipikwa tshine tsha fhira u gwadamela Muvhusahoṱhe na u tshila nga nḓila ine ya takadza mbilu yawe!

Bivhili i dovha ya ri funza uri ri vhumbe vhushaka na Musiki washu. Bivhili i ri: “Sendelani tsini ha Mudzimu, na ene u ḓo sendela tsini haṋu.” (Yakobo 4:8) Nga zwiṅwe zwifhinga ri nga timatima arali zwi tshi konadzea u vha khonani na Musiki ane a vha ramaanḓaoṱhe. Fhedzi Bivhili i ri khwaṱhisedza uri arali ri tshi ‘ṱoḓa Mudzimu,’ ri ḓo ‘mu wana,’ ngauri ha “kule na muṅwe na muṅwe washu.” (Mishumo 17:27) Nyeletshedzo ya Bivhili ine ya amba nga ha u vha khonani ya Mudzimu ndi ya ndeme kha vhumatshelo hashu. Nga nḓila-ḓe?

Ṱhogomelani zwi tevhelaho: Naho ra ita zwoṱhe zwine ra nga kona, a huna na muthu na muthihi ane a nga kona u ponyoka lufu, swina ḽine ḽa vha na maanḓa. (1 Vhakorinta 15:26) Naho zwo ralo, Mudzimu u dzula e hone lini na lini. A nga si vhuye a fa nahone u ṱoḓa na khonani dzawe dzi tshi tshila nga hu sa fheli. Bivhili i sumbedza zwine Yehova a zwi ṱoḓa kha vhathu vhane vha mu ṱoḓa, i tshi shumisa maipfi avhuḓi na o leluwaho, ane a ri: “Dzimbilu dzavho dzi ḓo tshila lini na lini.”​—Psalme ya 22:26.

Ni nga vhumba hani honoho vhukonani ha tshoṱhe na Mudzimu? Nga u dzula ni tshi guda nga hae Ipfini ḽawe ḽine ḽa vha Bivhili. (Yohane 17:3; 2 Timotheo 3:16) Mu humbeleni thuso u itela uri ni kone u pfesesa Bivhili. Bivhili i ri khwaṱhisedza uri arali ri tshi ‘dzula ri tshi humbela Mudzimu’ uri a ri ṋee vhuṱali, u ḓo ri ṋea hone. * (Yakobo 1:5) Mafheleloni, ni fanela u lwela u shumisa zwe na zwi guda, u tendela Ipfi ḽa Mudzimu ḽi tshi shuma sa “ḓenzhe ḽa milenzhe [yaṋu]” na “tshedza tsha nḓila yaṋu,” zwino na nga hu sa fheli.​—Psalme ya 119:105.