HUNAHUNAA nga nagbabaktas ka ha masirom nga dalan ha katutnga han gab-i. Bisan kon maiha na nga natunod an adlaw, diri ka nababaraka kay may malamrag ka nga ispat. Kon iginlalawag mo ito ha ubos, nakikita mo dayon an aada ha imo atubangan. Ngan kon iginlalawag mo ito ha unhan, nakikita mo an imo paglalaktan kay hirayo an naaabot han kapawa hito.

Ha pipira nga paagi, an Biblia pariho hito nga ispat. Sugad han aton hinbaroan ha nauna nga mga artikulo, an Pulong han Dios makakabulig ha aton ha pag-atubang ha kon ano an aada ha aton atubangan—mga problema ha kada adlaw dinhi hinin waray kasigurohan nga kalibotan. Pero diri la ito an nahihimo han Biblia. Naghahatag liwat ito hin klaro nga hulagway han tiarabot, salit nabubuligan kita nga makita ngan masubay an dalan nga nagtutugway ngadto ha nagpapadayon nga kalipay ngan kakontento. (Salmos 119:105) Ha ano nga paagi?

Tagdon naton an duha nga paagi nga an Biblia naghahatag hin paglaom ha tidaraon: 1 Nabulig ito ha aton nga magkaada katuyoan ha kinabuhi, ngan 2 nagtututdo ito ha aton kon paonan-o magkakaada nagpapadayon nga pakigsangkay ha aton Maglalarang.

An Biblia naghahatag hin masasarigan nga sagdon ha pag-atubang ha mga problema, pero labaw gud ito kay ha mga libro nga naghahatag la hin mga sagdon kon paonan-o naton susulbaron an aton problema. Imbes nga aghaton kita nga magpokus ha aton la personal nga problema, gintututdoan kita han Biblia nga kitaon an aton kalugaringon sugad nga bahin han usa ka daku nga katuyoan. Hito la nga paagi magkakaada tinuod nga kahulogan an aton kinabuhi.

Pananglitan, tagda ini nga prinsipyo ha Biblia: “Mas makalilipay an paghatag kay ha pagkarawat.” (Buhat 20:35) May nahinunumdoman ka ba nga imo nabuligan ha pinansyal? O bangin naghatag ka hin oras ha pagpamati samtang iginsusumat han imo sangkay an iya mga kabaraka? Diri ba umabat ka hin kakontento nga may nabuligan ka nga magin malipayon?

Naabat kita hin daku gud nga kalipay kon nahatag kita nga diri naglalaom hin bisan ano nga kabalyo. Usa nga awtor an nagsiring: “Imposible gud nga maghatag  ka nga diri ka makarawat hin labaw pa han imo iginhatag—basta maghatag ka nga diri naglalaom hin bisan ano nga balos.” Kondi kon naghahatag kita hin panahon, labi na ha mga diri makakabalos, ha pagkamatuod nakarawat kita hin balos. Nagigin bahin kita ha usa ka daku nga katuyoan. Oo, nagbubuhat kita kaupod han Maglalarang mismo, nga nagtatagad han aton ginbuhat sugad nga utang niya ha aton. (Proberbios 19:17) Iya gud ginpapabilhan an aton ginbubuhat para ha minos nga mga tawo, ngan nagsasaad hiya nga babalosan kita hin kinabuhi nga dayon ha paraiso nga tuna—usa nga makalilipay gud nga paglaom!—Salmos 37:29; Lucas 14:12-14. *

Labaw ha ngatanan, an Biblia nagtututdo nga mahimo magkaada tinuod nga katuyoan an aton kinabuhi pinaagi ha pagsingba ha tinuod nga Dios, hi Jehova. An iya Pulong nag-aaghat ha aton nga ihatag ha iya an pagdayaw, pagpasidungog, ngan pagsugot nga angayan gud para ha iya. (Eklesiastes 12:13; Pahayag 4:11) Kon ginbubuhat naton ito, nahihimo naton an usa nga butang nga maopay gud pamalandungon: Napapalipay naton an aton Maglalarang. Ngani, hiya nag-aaghat ha aton: “Pagmakinaadmanon, ngan himoa an akon kasingkasing nga malipayon.” (Proberbios 27:11) Hunahunaa la—kon naghihimo kita hin maaramon nga desisyon uyon ha mga prinsipyo ha Biblia, napapalipay naton an aton mahigugmaon nga Amay ha langit. Kay ano? Kay hinigugma kita niya ngan karuyag niya nga magpahimulos kita pinaagi ha pagsunod han iya giya. (Isaias 48:17, 18) Oo, waray na gud labaw nga katuyoan an aton kinabuhi kay han pagsingba ha Soberano han uniberso ngan pagkinabuhi ha paagi nga nakakapalipay ha iya!

An Biblia nagtututdo liwat ha aton nga makigsangkay ha aton Maglalarang. Ito nasiring: “Magin duok kamo ha Dios, ngan magigin duok hiya ha iyo.” (Santiago 4:8) May panahon nga bangin magruhaduha kita kon posible gud ba magin sangkay han makagarahum-ha-ngatanan nga Maglalarang. Pero ginpapasarig kita han Biblia nga kon “pamilngon” naton an Dios, ‘hiaagian gud’ naton hiya kay “hirani hiya ha tagsa ha aton.” (Buhat 17:27) An sagdon han Biblia nga magin sangkay han Dios mapulsanon gud para ha aton kabubuwason. Ha ano nga paagi?

Tagda ini: Ano man an aton himoon, waray bisan usa ha aton an makakatalwas tikang ha aton kaaway—an kamatayon. (1 Corinto 15:26) Kondi an Dios waray tubtoban. Diri hiya mamamatay, ngan karuyag niya nga mabuhi liwat ha kadayonan an iya kasangkayan. Pinaagi hinin simple kondi makaruruyag nga mga pulong, iginpahayag han Biblia kon ano an karuyag ni Jehova para hadton namimiling ha iya: “An iyo kasingkasing mabuhi unta ha kagihaponan.”—Salmos 22:26.

Paonan-o ka magkakaada hiton nagpapadayon nga pakigsangkay ha Dios? Padayon nga mahibaro mahitungod ha iya pinaagi han iya Pulong, an Biblia. (Juan 17:3; 2 Timoteo 3:16) Aroa an iya bulig basi masabtan ito. Nagpapasarig ito ha aton nga kon sinsero ngan ‘padayon nga mangangaro kita ha Dios’ hin kinaadman, iya ito ihahatag ha aton. * (Santiago 1:5) Katapos, pangalimbasugi nga iaplikar an imo hinbabaroan pinaagi ha paghimo han Pulong han Dios nga “lawag ha [imo] mga ti-il, ngan suga ha [imo] agi-an” yana ngan ha kadayonan.—Salmos 119:105.