AGANICISYE kuti akwenda m’litala line lyakwe lyakogoya soni kusa kuswele. Atamose kuti lyuŵa likapile nambo akulimbape mtima ligongo lyakuti akwete toci jamacili m’miyala mwawo. Tociji jikwakamucisya kulola cenene pakuŵandika soni pakutalicila.

Mpela mwatuyiwonele mu ngani sine sila, Baibulo jili mpela toci jeleji. Maloŵe ga Mlungu mpaka gatukamucisye pa yakusawusya yatukusimana nayo. Nambope Baibulo mpaka jitukamucisyesoni pakwamba ya yindu yamsogolo. Yeleyi mpaka yitukamucisye kuti citusangalale ni umi wambone kwangamala. (Salimo 119:105) Ana yeleyi mpaka yikombolece mwamtuli?

Kwende tulole matala gaŵili gele Baibulo mpaka jitukamucisye kola umi wambone apano soni msogolo. 1 Jikusatukamucisya kumanyilila cakulinga ca umi wetu, soni 2 Jikusatujiganya mwampaka tuŵele paunasi wangamala ni Mkupanganya jwetu.

Baibulo jikusasala yindu yampaka yitukamucisye pakulimbana ni yakusawusya yatukusimana nayo apano. Nambosoni mpaka jitukamucisye kuti twaganicisyeje ŵandu ŵane. Kutenda yeleyi mpaka kutukamucisye kola umi wambone mnope.

Mwambone, Baibulo jikusasala kuti, “Kupeleka kukusamtendekasya mundu kuŵa jwakusangalala kulekangana ni kupocela.” (Masengo 20:35) Ana pakwete pamkamucisye mundu jwine kupata cindu caŵalajilaga? Kapena ana pakwete pampikanile mjawo ali mkwasalila yosope yakumtima kwakwe? Ana kutenda yeleyi nganikwakamucisya kulipikana cenene?

Kusala yisyene, tukusaŵa ŵakusangalala naga tukupeleka cindu ni mtima wosope, soni naga ngatukusajembeceya kupata kane kakwe kutyocela kwa  mundujo. Mkulemba jwine jwatite, “Mundu jwakusagaŵila acimjakwe akusapata yindu yejinji kupunda yapeleceyo. Yeleyi yikusatendekwa naga mundujo akupeleka cinduco ni mtima wosope, soni ngakwembeceya kuti apate kane kakwe.” Nambope patukwakamucisya ŵandu ŵakuti nganaŵa akombwele kutupa kandu kalikose, tukusapata mbote. Tukusaŵa ŵandu ŵakusosekwa mnope pameso pa Yehofa. Kusala yisyene, patukutenda yeleyi tukusaŵa tuli mkumkamucisya Mkupanganya. Nambosoni Yehofa akusayiwona yeleyi mpela ngongole jakwete kwa m’weji. (Miyambo 19:17) Yehofa, ngaŵa mkuyiliŵalila yindu yambone yatukusatenda pakwakamucisya ŵandu ŵakulaga. Jwalakwe cacituwucisya mwakutupa umi wangamala m’paladaiso pacilambo capasi. Mwangakayicila tukwete sogolo jambone.—Salimo 37:29; Luka 14:12-14. *

Konjecesya pelepa, Baibulo mpaka jakamucisyesoni kola umi wambone apano soni msogolo. Yeleyi mpaka yikombolece naga akusamlambila Mlungu jwakuwona, Yehofa. Maloŵe gakwe gakusatulimbikasya kuti jwalakwe ali jwakuŵajilwa kumlumba, kumcimbicisya soni kumpikanila. (Mlaliki 12:13; Ciunukuko 4:11) Kutenda yeleyi kucimsangalasya Mkupanganya jwetu. Ni ligongo lyakwe Baibulo jikusatulimbikasya kuti, “Mŵeje jwalunda, ni m’wusangalasye mtima wangu.” (Miyambo 27:11) Naga tukusasagula yakutenda pakamulicisya masengo yajikusasala Baibulo, nikuti tucisangalasya mtima wa Mlungu jwetu jwacinonyelo ŵali Atati ŵetu ŵakwinani. Ligongo cici tukuti m’yoyo? Ligongo lyakuti jwalakwe akusasamala ya m’weji, soni akusasaka kuti yindu yitujendeleje cenene mwakupikanila malamusi gakwe. (Yesaya 48:17, 18) Kusala yisyene, kumlambila Mlungu, Jwakulamulila Jwamkulungwa jwa cilambo cosope, soni kutenda yindu yakusangalasya mtima wakwe kukusatukamucisya kola umi wambone apano soni msogolo.

Baibulo jikusatukamucisyasoni mwampaka tutendele kuti tuŵe paunasi ni Mkupanganya jwetu. Jikusati, “Amŵandicile Mlungu, soni jwalakwe cacaŵandicila.” (Yakobo 4:8) Ndaŵi sine mpaka tuganisye kuti nganiyiŵa yikombolece kuŵa paunasi ni Mkupanganya Jwamaciligose. Nambope Baibulo jikusatulimbikasya kuti, “Asosesose Mlungu,” soni ‘tacimpata’ pakuŵa “jwalakwe nganaŵa kutali ni jwalijose jwetuwe.” (Masengo 17:27) Yajikusajiganya Baibulo pakwamba ya mwampaka tuŵele paunasi ni Mlungu, yili yakamucisya kuti tukole sogolo jambone. Mwamtuli?

Ana akusayiwona kuti ŵandu pajika akakombwele kuŵambala m’magongo jwamkulungwa, ciwa? (1 Akolinto 15:26) Mwangakayicila, ngamkaniyikomboleka. Nambope Mlungu cacitama mpaka kalakala. Jwalakwe ngasawa soni akusasaka kuti ŵali acimjakwe atameje kwangamala. Baibulo jikusakamulicisya masengo maloŵe gakusangalasya pakusala yakusasaka Yehofa pakwamba ya ŵandu ŵakusamsosasosa jwalakwe. Jikusati, “Umi wawo uŵe wakusangalala mpaka kalakala.”—Salimo 22:26.

Ana mpaka atende wuli kuti aŵe paunasi wangamala ni Mlungu? Ajendelecele kulijiganya Baibulo kuti amanyilileje yakwamba jwalakwe. (Yohane 17:3; 2 Timoteo 3:16) Asosesoseje cikamucisyo kuti apikanicisyeje Malemba. Baibulo jikusatulimbikasya kuti naga ‘tukusamŵenda Mlungu’ mwakuwona mtima kuti atupe lunda, mwangakayicila jwalakwe cacitupa. * (Yakobo 1:5) Naga akulingalinga kukuya yajikusajiganya Baibulo paumi wawo, Maloŵe ga Mlungu gaciŵa mpela “nyali ja ku sajo [kwawo]” soni mpela “lilanguka lya petala [pawo],” kutandila apano soni mpaka kalakala.—Salimo 119:105.