TUKULTEʼ táan a xíimbal de áakʼab tiʼ junpʼéel bej éeʼjochʼeʼen. Kex tsʼoʼok u chan máan hora tʼúubuk le Kʼiinoʼ maʼ saajkech saʼatliʼ tumen a machmaj junpʼéel foco jach sáasil u juul. Kéen a jul a beeleʼ chíikaʼan a wilik tuláakal. Kéen a jul maas náacheʼ chíikaʼan xan a wilik le bej tuʼux kan binoʼ.

Le Bibliaoʼ bey jeʼex le focooʼ. Jeʼex t-ilaj teʼ xookoʼob máanikoʼ, u Tʼaan Dioseʼ ku yáantkoʼon k-aktáant le problemaʼob ku yantaltoʼonoʼ. Baʼaleʼ yaan uláakʼ bix u yáantkoʼon. Ku yeʼesiktoʼon u bejil le kiʼimak óolaloʼ yéetel ku kaʼansiktoʼon baʼax jeʼel k-beetik utiaʼal k-pʼáatal mantatsʼeʼ (Salmo 119:105). ¿Bix u beetik?

Koʼox ilik kaʼapʼéel bix u yáantaj le Biblia utiaʼal ka yanaktoʼon kiʼimak óolaloʼ: 1 Ku tsʼáaik u biilal k-kuxtal yéetel 2 ku yáantkoʼon k-bisba mantatsʼ yéetel le Máax beetoʼonoʼ.

Le Bibliaoʼ ku tsʼáaik maʼalob tsolnuʼukoʼob utiaʼal k-aktáantik k-problemaʼob, chéen baʼaleʼ maʼ bey jeʼex u maasil libroʼob ku koʼonol utiaʼal u yáantaʼal máakoʼ. Le Bibliaoʼ maʼ chéen ku yaʼalik ka tuukulnakoʼon tiʼ baʼax ku yúuchultoʼoniʼ, baʼaxeʼ tak tiʼ baʼax ku muʼyajtik u maasil, wa k-beetkeʼ yaan u yantal u biilal k-kuxtal.

Tuukulnakoʼon xan tiʼ baʼax ku yaʼalik le Bibliaaʼ: «Maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (Baʼaxoʼob [Hechos] 20:35). ¿Tsʼoʼok wa a wáantik wa máax pʼáat jach minaʼan taakʼin tiʼ? ¿Yaan wa kʼiin tsʼoʼok a chʼenxikintik juntúul a amigo taak u tsikbaltiktech baʼax ku yúuchultiʼ? ¿Máasaʼ kiʼimakchaj a wóol úuchik a wáantik?

 Kéen k-tsʼáa wa baʼax sin ke k-páaʼtik u suʼutul u jeel toʼoneʼ maas ku kiʼimaktal k-óol. Juntúul máax tsʼíibtik libroʼobeʼ tu yaʼalaj: «Kéen k-tsʼáa wa baʼax sin ke k-páaʼtik u suʼutul u jeel toʼoneʼ deporsi yaan k-kʼamik u maasil». Chéen baʼaleʼ láayliʼ yaan baʼax k-kʼamik kéen k-beet wa baʼax yoʼolal le máaxoʼob maʼ tu páajtal u sutiktoʼon u jeeloʼ. Lelaʼ ku tsʼáaiktoʼon u privilegioil k-áantik le Máax beetmiloʼonoʼ, kéen k-áant u maasileʼ bey yaan baʼax k-tsʼáaik tiʼ Jéeoba u majáanteʼ yéetel letiʼeʼ yaan u boʼotiktoʼon (Proverbios 19:17). Dioseʼ nojoch baʼal u yilik le baʼax k-beetik yoʼolal u maasiloʼ, ku yaʼalikeʼ yaan u boʼotiktoʼon yéetel le kuxtal minaʼan u xuul tiʼ junpʼéel paraíso way Luʼumeʼ (Salmo 37:29; Lucas 14:12-14). *

Chéen baʼaleʼ le Bibliaoʼ ku kaʼansikeʼ utiaʼal u yantal u biilal k-kuxtaleʼ unaj k-adorartik le u juntúuliliʼ jaajil Diosoʼ, Jéeoba. Ku yaʼalik xan ka k-alabarte yéetel ka k-uʼuy u tʼaan tumen chéen letiʼ jach tu jaajil náajmatik (Eclesiastés 12:13; Apocalipsis 4:11) Kéen k-beet lelaʼ k-kiʼimakkúuntik u yóol le Máax beetmiloʼonoʼ. Letiʼeʼ ku yaʼalik: «In xibil paal, yanak a wojéelajil utiaʼal a beetik u kiʼimaktal in wóol» (Proverbios 27:11). ¿Tsʼoʼok wa a tuukul kaʼach tiʼ lelaʼ? Kéen k-beet baʼax maʼalob yéetel u yáantaj le Bibliaoʼ k-kiʼimakkúuntik u yóol k-Taata yaan teʼ kaʼanoʼ. ¿Baʼaxten? Tumen letiʼeʼ u yaabiltmoʼon yéetel u kʼáat u nuʼuktoʼon utiaʼal ka xiʼiktoʼon maʼalobil (Isaías 48:17, 18). ¡Minaʼan uláakʼ baʼax maas ku beetik u yantal u biilal u kuxtal máak jeʼex u adorartik Jéeoba, le Máax beetmil tuláakal baʼaloʼ!

Le Bibliaoʼ ku kaʼansik xan toʼon bix jeʼel k-amigotik le Máax beetmiloʼonoʼ, ku yaʼalik: «Natsʼabaʼex tiʼ Dios, letiʼ túuneʼ bíin u natsʼuba tiʼ teʼex» (Santiago 4:8). Maʼ xaaneʼ maʼ tu páajtal k-creertik wa jeʼel u páajtal k-amigotik le Máax beetmiloʼon yéetel jach yaan u páajtaliloʼ. Baʼaleʼ le Bibliaoʼ ku yaʼalik ka k-kaxt Dios tumen «letiʼeʼ maʼ náach yanil tiʼ cada juntúul tiʼ toʼoneʼexiʼ» (Baʼaxoʼob 17:27). K-amigotik Dioseʼ junpʼéel baʼax jeʼel u yáantkoʼon utiaʼal u bintoʼon maʼalobil ichil k-kuxtaleʼ. ¿Baʼaxten?

Tuukulnakoʼon tiʼ lelaʼ: Kex jach k-kʼáateʼ maʼ tu páajtal k-púutsʼul tiʼ le maas nojoch enemigo yaantoʼonoʼ: le kíimiloʼ (1 Corintoiloʼob 15:26). Baʼaleʼ Dioseʼ mix bikʼin bíin xuʼuluk, mix bikʼin kun kíimil, le oʼolal u kʼáat xan ka kuxlak mantatsʼ u amigoʼob. Letiʼeʼ ku yaʼalik baʼax u kʼáat ka yanak tiʼ u amigoʼob, ku yaʼalik: «Kuxlakeʼex yaʼabkach jaʼaboʼob» (Salmo 22:26).

¿Bix jeʼel a biskaba mantatsʼ yéetel Dioseʼ? Maʼ u xuʼulul a kaanbal tiʼ letiʼ, xok le Bibliaoʼ (Juan 17:3; 2 Timoteo 3:16). Kʼáattiʼ ka u yáantech a naʼate. Le Bibliaoʼ ku yaʼalikeʼ wa tu jaajil k-óol k-kʼáatik u naʼat Dioseʼ, letiʼeʼ yaan u tsʼáaiktoʼon * (Santiago 1:5). Tu tsʼookeʼ tsʼáa ichil a kuxtal le baʼax táan a kanikoʼ, beyoʼ u Tʼaan Dioseʼ yaan u sáasilkuntik a beel wa yaan u nuʼuktik a kuxtal utiaʼal mantatsʼ (Salmo 119:105).