Bixuiʼlú maʼ huaxhinni ne zizaluʼ lu ti neza nacahui. Neca maʼ napa ratu de biaaziʼ gubidxa, peru nannuʼ qué zunítiluʼ purtiʼ zineluʼ ti linterna ni guizáʼ ruzaaniʼ. Ora guzaaniluʼ layú, nayaʼniʼ ruuyaluʼ ra zizaluʼ. Ne ora guzaaniluʼ delante de lii, biaaniʼ naroʼbaʼ stini ruzaaniʼ ni zitu ne randa ruuyaluʼ neza que.

Zanda guininu, Biblia ca naca ni casi ti linterna. Casi maʼ bidúʼyanu lu ca tema gudídinu ca, Stiidxaʼ Dios racané ni laanu gudxíʼlunu ca guendanagana ni ridxaagalunu guiráʼ dxi ndaaniʼ guidxilayú ra rizaaca stale cosa ni cadi cabézanu. Peru ni jma galán nga: Laaca rabi ni laanu xi chiguizaaca despué, purtiʼ racané ni laanu guidúʼyanu ne zanu lu neza ni zudii laanu ti guendanayecheʼ ni qué zaluxe (Salmo 119:105). ¿Ximodo racané ni laanu yaʼ?

Guidúʼyanu chupa modo racané Biblia laanu para cuézanu ti futuro jma galán: 1 Racané ni gánnanu xi pur nabáninu ne 2 rusiidiʼ ni laanu qué chuʼ dxi gusaana de gaca xhamígunu Dios ni bizáʼ laanu.

Zanda gacané ca conseju zeeda lu Biblia laanu para gudxíʼlunu ca guendanagana tiidinu, cadi naca diʼ ni ti libru de autoayuda o ni racané binni guibani nayecheʼ. Rusiidiʼ ni laanu cadi cuʼ xaíquenu ca guendanagana si stinu, sínuque guizaaláʼdxinu xcaadxi binni. Pa gúninu ndiʼ la? zacané ni laanu guiénenu xi pur nabáninu.

Guníʼ ique lu principiu stiʼ Biblia riʼ: «Jma nayeche ni rudii que ni ricaa» (Hechos 20:35). ¿Ñee huayacaneluʼ tuuxa ni huaxiéʼ napa bueltu la? O ¿ñee huabeeluʼ tiempu para gucaadiágaluʼ ti xhamíguluʼ ni cayacaná la? ¿Ñee cadi dxandíʼ galán biʼniʼ sentirluʼ ra gucaneluʼ sti binni la?

Riuʼnu jma nayecheʼ ora rudiʼnu de ni nápanu sin cuézanu gudiicabe laanu xiixa. Ti escritor ná: «Qué zanda diʼ gacanenu xcaadxi binni pa cabézanu gudiicabe laanu xiixa, peru zanda gúninu ni pa gudiʼnu sin cuézanu xiixa de laacaʼ». Peru ora  gaca sacrificarnu pur xcaadxi, jmaruʼ si pur cani qué gapa modo quixe laanu, ricaanu ndaayaʼ. Ni dxandíʼ nga, racanenu Dios ni bizáʼ laanu, purtiʼ runi sentirbe casi ora nuzaabibe laanu ra gácanu nachaʼhui né binni (Proverbios 19:17). Guizáʼ rusisaca Dios stipa rúninu ra gacanenu binni, ne maʼ guniʼbe zaguíxebe laanu ra gudiibe laanu ti guendanabani ni qué zaluxe ndaaniʼ Guidxilayú riʼ ora gaca ni ti paraísu. ¡Guizáʼ galán esperanza ca! (Salmo 37:29; Lucas 14:12-14). *

Peru ni rusiidiʼ Biblia nga pa racaláʼdxinu guibáninu jma galán ne nayecheʼ caquiiñeʼ guni adorarnu Jiobá, Dios ni dxandíʼ. Stiidxabe riguu gana laanu para gudxíʼbanu, gusisácanu ne guzúʼbanu stiidxabe (Eclesiastés 12:13; Revelación 4:11). Ora rúninu ni: rusiéchenu Dios ni bizáʼ laanu. Laapebe canábabe laanu: «Guluu xpiaanuʼ xiiñehuiineʼ ne bisiecheʼ ladxiduáʼ» (Proverbios 27:11). ¿Ñee huaníʼ íqueluʼ ndiʼ la? Ora chinándanu ca conseju stiʼ Biblia para guicaanu ti decisión, rusiéchenu Bixhózenu ni nuu guibáʼ. ¿Xiñee yaʼ? Purtiʼ rizaaláʼdxibe laanu ne racaláʼdxibe chinándanu ca conseju stibe ti cueendunu ni galán (Isaías 48:17, 18). Ni dxandíʼ la? gástiruʼ sti cosa ni jma rusiecheʼ laanu que guni adorarnu Dios ni jma Nandxóʼ lu guidubi naca universu ne gusiéchenu ladxidóʼ.

Biblia laaca rusiidiʼ laanu ximodo zanda gaca xhamígunu Dios ni bizáʼ laanu. Biblia ruzeeteʼ: «Laidxiña gaxha de Dios, ne laa zadxiña gaxha de laatu» (Santiago 4:8). Zándaca gaca nagana para laanu guni crenu zanda gaca xhamígunu Dios ni jma nandxóʼ. Peru Biblia cayabi laanu, pa guyúbinu laabe la? zadxélanu laabe, purtiʼ «cadi zitu nuu be, sínuque gaxha doʼ nuu be de cada tobi de laanu» (Hechos 17:27). Pa chinándanu conseju stiʼ Biblia de gaca xhamígunu Dios, zacané ni laanu chuʼnu listu para ni gueeda despué. ¿Xiñee yaʼ?

Guníʼ ique ndiʼ: nin tobi de laanu qué zanda guilanu de enemigu stinu, guendaguti, neca racaláʼdxinu (1 Corintios 15:26). Laaca naquiiñeʼ gánnanu, qué gapa Dios ra guiluxe. Qué ziuu dxi gátibe ne ngueca racaláʼdxibe para ca xhamígube. Né ca diidxaʼ sicarú riʼ, cusihuinni Jiobá xi racalaʼdxiʼ para cani ruyubi laabe: «Laguibani sin chuʼ dxi cuezadxí ladxidoʼto» (Salmo 22:26).

¿Ximodo zanda gaca xhamíguluʼ Dios ne cadi gusaanaluʼ laabe yaʼ? Cadi gusaanaluʼ de guiziidiluʼ de laabe ora gúʼndaluʼ Stiidxabe, Biblia (Juan 17:3; 2 Timoteo 3:16). Gunabaʼ laabe gacanebe lii guiéneluʼ ni. Biblia cayabi laanu, pa cadi cayénenu xiixa la? de guidubi ladxidoʼno guinábanu Dios gacané laanu ne laabe zacanebe laanu * (Santiago 1:5). Últimu la? biʼniʼ stipa pur gúniluʼ ni caziidiluʼ, ne zacá zeeda gaca Stiidxaʼ Dios casi «ti lámpara» ni guzaaniʼ ra zizaluʼ yanna ne «ti biaaniʼ» ni guzaaniʼ neza stiluʼ para siempre(Salmo 119:105).