BUNYSI PENSARY que casaalo gueʼel ló néz ni nacayasquin. Ná ma xiroʼ ór de goló goyaais Govitz, radzelo néz ro saalo portín sanélo toib lámpara ni rasanídxich. Órni rasanílo layoo, rabiʼlo néz ro casaalo. Né, órni rasanílo niis delant, guiicu rasaníni guidopynac néz ro seelo.

De xidal mod, la Biblia nacni xomod lámpara ni bisetlano. Xomod ma bibiʼno ló temas ni godudyno ló, Xtiitz Dios racnéni lóono guicalóno galnagan dzú ná dzú ló gudxliogoxreʼ ro diti nanno xí guisaclono. Per diti ngúsi, láaca rasaníni lóono ló dzú ni sietra, portín racnéni lóono guibiʼno né saano ló néz ro labúu guibanyno goxtiguie por tipzó (Salmo 119:105). ¿Ximod?

Guisuidyno chop mod ni la Biblia racné lóono guibanyno sacró ló dzú ni sietra: 1 Racnéni lóono par diti nac nacsi guibanyno né 2 rasuidyni lóono guidzakno por tipzó Dios ni Bisaʼ lóono.

La Biblia ralitz lóono par guicalóno galnagan, láani diti nosi nacni toib libro ni racné lóono. Rasuidyni lóono diti tzoʼno ló galrrasaʼ por lóosino, xalagary ngú tzoʼno ló galrrasaʼ por stipnés. Nosi pal ronyno ngú diti nac nacsi sabanyno.

Bunysi pensary ló texto reʼ: «Noʼ más galrrabaladx órni raduidy buñ que órni racaʼ buñ» (Hechos 20:35). ¿Toibtica buelt gocnélo toib buñ ni cadudy ló galsii la? ¿O bicadiaglo ximiglo goleʼ guirá ni noʼ lainy xcalnabany la? ¿Sacró gosaclo por ni gocnélo láabu ja?

Más nakit nabanyno órni raduidyno ni napno né diti rabésno guidxiguetyibu láani lóono. Toib buñ bicaʼ scareʼ: «Órni raduidyno ni napno, guirá ór sioʼ ni sadxiguet láani lóono, per sácni scú pal raduidyno  ni napno sin cuésno guidxiguetyibu láani lóono». Per órni racnéno stipnés, né máspa buñ ni diti nap xitcal, noʼ ni racaʼno. Raduidyno cuent que diti nosi raquiin tzoʼno galrrasaʼ por lóosino. Órni ronyno ndeʼ ronyno dxiin toibsi né Dios ni Bisaʼ lóono, rioʼbu ló diʼin né lóono por cós tzaay ni ronyno (Proverbios 19:17). Par Dios nigolú rasac órni racnéno buñ ni cadudy ló galrrioʼob, né raduidybu xtiitzbu que saguiixbu lóono né galnabany tipzó ló toib Gudxlio móz. ¡Ndeʼ nac toib cós sacróyen ni cabésno! (Salmo 37:29; Lucas 14:12-14). *

Per la Biblia rasuidy lóono que pal rony adorarno Jehová, Dios ni nigolú, diti nac nacsi sabanyno. Xtiitzbu raiby lóono que non gonyxiroʼno, guiliskiaʼno né guisobno láabu (Eclesiastés 12:13; Revelación 4:11). Órni ronyno láani scú, ronyno que xcalnabany Dios ni Bisaʼ lóono rabaladx. Né raibybu lóono: «Goloʼ xcalrrienlo, xiingaʼna, né buny que guibaladx xcalnabani, par labúu guicabi ni cayony borla naʼ» (Proverbios 27:11). ¿Ma bunylo pensary ló ndeʼ toibtica buelt la? Órni ragoʼno guicno gonyno alga né racanalno xilitz la Biblia, Bixiosno ni noʼ guibá ni ronladx lóono rabaladx. ¿Xigony? Portín rioʼbu ló galrrasaʼ por lóono né nainy láabu guisobno ni nábu par tzeeni lóono galán (Isaías 48:17, 18). Scú láani, diti noʼ stoib cós ni labúu coʼ nakit lóono, que gonyno que Dios ni bisaʼ guidopynac guibá né Gudxlio guibaladx.

La Biblia láaca rasuidy lóono ximod guidzakno Dios ni Bisaʼ lóono. Xomod ná texto reʼ: «Colguibig ronoʼ Dios, né láabu sabigbu ronoʼto» (Santiago 4:8). Sigory rasac naganno guidzakno Dios ni nap xiroʼgolu galnadip. Per la Biblia raiby lóono que pal rayopyno láabu, sadzelno láabu, portín «diti noʼbu sit de cada toibno» (Hechos 17:27). La Biblia raiby lóono gacno ximig Dios, pal rasobno láani, ndeʼ sacné lóono tzoʼno puext ló dzú ni sietra. ¿Xigony?

Bunysi pensary: ná ronyno dada rutirigaʼlni lóono, ni toib de lóono labúu guixony de xi enemigno galgoity (1 Corintios 15:26). Per Dios nabanybu por tipzó. Láabu dipa saitybu né láaca raniiny láabu que ximigbu guibany por tipzó. Né diitz sacróyen reʼ nayaditsi Jehová raniʼ xí nainy láabu par buñ ni rayopy láabu: «Colguibany goxt por tipzó» (Salmo 22:26).

¿Né ximod labúu saló guidzaklo Dios por tipzó? Diti guisian guisuidylo de láabu ló Xtiitzbu la Biblia (Juan 17:3; 2 Timoteo 3:16). Gonab xcalrracnébu par guienlo láani. La Biblia raiby lóono, pal né guidopy xcalnabanyno ranabno Dios guiduidybu xcalnanbu lóono, láabu saduidybu láani lóono * (Santiago 1:5). Né, por último, buny xtem por gonylo ni rasuidylo; modcu Xtiitz Dios sácni «toib lámpara» ni guisaní ro casaalo né gacni «toib guii» ni guisaní néz ro seelo (Salmo 119:105).