Yu eva wanda weh di fyoocha wahn bee laik fi yoo ahn yu famili? Yu tink yu wahn ga lata moni er yu wahn en op poa? Yu wahn fain lov er yu wahn en op bai yuself? Yu wahn liv lang er yu laif wahn geh kot shaat? Fi towznz a yaaz peepl chrai fain di ansaz tu dehndeh kweschan.

Tudeh, sohn ekspert stodi how tingz chaynj oava taim ahn bays pahn dat dehn pridik weh wahn hapm eena di fyoocha. Wahn lata di tingz weh dehn pridik kohn chroo, bot noh aala dehn; som a dehn kompleetli rang. Fi egzampl, eena 1912, Guglielmo Marconi, di man weh mi invent wahn way fi kamyoonikayt chroo rayjo, mi seh: “Dis faam a kamyoonikayshan wahn mek waar impasabl.” An eena 1962, wahn man weh mi ga wahn hai pozishan da di Decca Record Company, mi rijek di Beatles bikaaz hihn mi feel laik eni myoozik groop weh play gitaar neva mi wahn stay papyula.

Pahn di ada han, lata peepl ton tu spiritizm fi fain owt tingz bowt di fyoocha. Dehn goh tu peepl weh stodi di staarz fi pridik di fyoocha. Ahn yu ku fain dehndeh sayhn pridikshan eena di horoskoap eena lata nyoozpaypa ahn magazeen. Adaz goh da peepl weh klaym seh dehn ku tel di fyoocha di reed kyaad, di yooz nombaz, er di reed han.

Way bak eena di paas, peepl yoostu goh da sohn man er uman weh da-mi prees fi chrai fain owt weh wahn hapm eena di fyoocha. Dehndeh prees mi klaym fi geh dehn infamayshan fahn di gaad weh dehn mi-di serv. Sohn peepl seh dat dat da weh King Croesus a Lydia mi du. Bifoa hihn mi gaahn waar gens Sairos a Perzha, ih mi sen wahn lata ekspensiv gif tu wahn prees da Delphi, Greece, soh dat ih kuda mi fain owt weh mi wahn hapm. Di prees mi tel di king dat if ih mi atak Sairos, ih mi wahn dischrai “wahn grayt kingdom.” King Croesus mi shoar dat ih wuda win di waar gens Sairos soh ih gaahn hed. Bot da fi hihn oan kingdom mi geh dischrai!

Di pridikshan mi yoosles bikaaz ih mi wahn kohn chroo noh mata hoo win di waar. Da rang infamayshan mi kaaz wahn lata sofarin fi Croesus. Yu tink di peepl eena fi wee taim weh yooz papyula wayz fi pridik di fyoocha ga beta rizolts?