Koj puas xav paub txog lub neej tom hauv ntej seb yuav muaj li cas rau koj thiab koj tsev neeg? Tej zaum koj yeej xav paub seb koj puas yuav nrhiav tau noj tau haus? Koj puas yuav nrhiav tau ib tug txij nkawm zoo? Koj yuav muaj sia nyob ntev li cas? Txij thaum ntuj tsim teb raug los, tibneeg yeej kheev nug li no.

Niaj hnub no, muaj cov uas tshawb txog kev coj noj coj ua kom lawv thiaj paub kwv yees txog yav tom hauv ntej. Ib txhia yeej hais raug, tiamsis ib txhia hais yuam kev deb kawg li. Zoo li tus yawg Nkunkimau Makauni (Guglielmo Marconi) uas tsim tau xov tooj cua. Xyoo 1912 nws hais tias: “Nimno muaj xov tooj cua lawm, tiam tom ntej yeej tsis muaj kev tsov kev rog li lawm.” Xyoo 1962, muaj ib tug yawg sawv cev rau ib lub koom haum kaw nkauj (Decca Record Company) uas tsis kam kaw pab tub hluas ntaus nkauj hu ua Npidaum (Beatles). Vim nws xav tias tibneeg yeej tsis nyiam mloog cov nkauj ntawd. Tiamsis tom qab no pab ntawd nto moo tshaj.

Muaj coob tus saib yaig kom lawv paub txog yav tom ntej. Ib txhia nyiam saib hnub qub. Lwm cov ho saib tej ntaub ntawv los xam hnub nyoog. Muaj dua lwm cov mus cuag tej neeg txawj saib tes, saib hmoov.

Txheej thaud kuj muaj cov uas xav paub txog yav tom hauv ntej thiab. Lawv thiaj mus cuag tej neeg saib yaig saib sij. Zoo li tug Vajntxwv Khixa (Croesus) uas kav tebchaws Lidia. Nws xav paub seb puas tsim nyog nws mus ntaus Xailab uas kav tebchaws Pawxia. Khixa thiaj xa tej khoom muaj nqes heev mus pub tus yaj saub nyob Kili tebchaws seb nws puas ntaus yeej. Tus yaj saub teb tias yog Khixa mus ntaus Xailab ces ib lub tseem fwv loj heev yuav poob mus. Khixa tso siab heev nws thiaj npaj mus ntaus Xailab. Tiamsis thaum kawg Khixa swb kiag Xailab. Lub tseem fwv loj uas poob ntawd twb yog Khixa lub ntag!

Tus yaj saub ntawd cov lus pab tsis tau Khixa li! Txawm Khixa yeej thiab swb los, tej lus ntawd puavleej yog tibsi. Vim Khixa ntseeg yuam kev nws lub tseem fwv thiaj poob kiag. Ua li, niaj hnub no cov neeg uas tso siab rau tej neeg saib yaig saib sij, puas yog cia siab qhuav li Khixa xwb?