Oi bona emu ruma bese ena vaira nega maurina be nega ta oi lalohadailaia, a? Umui be taga o ogogami maurina do umui noholaia, eiava do umui moale o lalohisihisi? Do oi mauri daudau eiava lasi? Lagani momo lalonai taunimanima be unai bamona henanadai idia laloa.

Hari inai negai diba bada taudia be tanobada ai idia vara gaudia idia stadilaia, unai amo edia lalohadai vaira nega totona idia gwauraia. Ena be idia gwauraia gaudia haida be idia vara momokani, to haida be idia vara lasi. Hegeregere, lagani 1912 ai, wireless telegraph ia karaia tauna, Guglielmo Marconi, ia gwau: “Nega vaira ai wireless telegraph do idia gaukaralaia dainai, tuari be do ia vara momo lasi.” Bona Decca Record Company ai ia gaukara tauna ta be lagani 1962 ai, miusiki band ta ladana Beatles ia dadaraia, ia gwau, gita idia gadaralaia taudia momo be gabeai taunimanima ese do idia ura henidia lasi.

Momo be vaira negana idia diba totona babalau taudia edia heduru idia tahua. Ma haida be hisiu stadilaia babalau taudia edia heduru idia tahua; idia ta be horoscopes, ia be nega momo magasin bona niuspepa ai ia noho. Haida be babalau taudia ma haida amo heduru idia tahua, unai babalau taudia be vaira nega ai do idia vara gaudia idia gwauraia totona tarot kadi, numera idia gaukaralaia, eiava ima palapalana ena toana idia tahua.

Idaunegai, haida be idia ura vaira nega ai do idia vara gaudia idia diba totona oracles o vaira nega gwauraia taudia edia heduru idia tahua​—pris tauna o pris hahinena be ena dirava koikoina amo ia abia herevana be ma haida dekenai ia hadibaia. Hegeregere, Lydia ena King Croesus ese dava bada harihari gaudia momo ia siaia lao oracle ta, Delphi, Greece dekenai, unai amo do ia diba dahaka do ia vara bema Parasa ena king, Kurese ida ia tuari. Unai oracle ia gwau, Croesus ese “basileia badana ta” do ia hadikaia bema Kurese tuari henia totona ia lao. Croesus ese unai ia kamonai neganai, ia abia dae do ia kwalimu, unai dainai tuari totona ia lao. To do idia hadikaia basileia badana be iena basileia ia herevalaia!

Unai oracle ena hadibaia herevana be koikoi; ena be dahaka ia vara to dokonai tuari ai basileia badana ta idia hadikaia. Croesus be unai hadibaia hereva koikoina dainai gau ibounai ia haboioa. Hari, taunimanima momo idia ura unai bamona dala idia tahua vaira nega idia diba totona, to idia kwalimu, a?